Yese Chyáng Mâ É Akoq
11
Yesea akoq mâ é a-ngùt mai a-nyùq ra-nyùq nyún htoq lô râ nghut lhê;Yhâng é a-myìt pé mai yùq lo é Akoq gi, ashi zui râ nghut lhê.
2 Haû Yhûmsîng Garaî é Sô nghut é,
hpàqchyî byéng-yá eq sê gyô é u-nuq bo é Sô,
hpàqchyî byî é eq hpungwup a-tsam bo é Sô,
hpàqchyî bo é eq Yhûmsîng Garai lé gyùq hkúnggâ é Sô gi, yhâng chyáng nyi nyì râ nghut mù,
3 yhang gi, haû Yhûmsîng Garai lé gyùq hkúnggâ é hkyô lé myìt nguì ô naù râ nghut lhê.
Yhang gi, yhâng é myòq èq myang é eq rajung za jéyáng râ a nghut é htoq agó,
yhâng é nohkyap èq wó gyô é eq rajung za le myìt hpyit râ a nghut;
4 nghut kôlhang, yhang gi, asho awuî é bang lé díngmán é hkyô dông jéyáng byi mù,
myìdàm htoq mâ é myùng bâng é matú, târâ ràp-rá é dông mû hpyit byi râ nghut lhê.
Yhang gi, myìdàm htoq lé, yhâng é nhut mâ é gán-yâng èq bàt mù,
agè ashop é bang lé, yhâng nhutwuî mâ é soq èq sat pyám râ nghut lhê.
5 Díngmán é hkyô gi, yhâng é hpyihit dùt râ nghut mù,
jujúm é hkyô gi, yhâng é hpyidum má yùp é hpyihit long dùt râ nghut lhê.
6 Wàmhkui gi, sau zo eq rahá nyì râ nghut lhê;
lo-ká mó gi, bainám zo eq rahá ùp râ nghut lhê;
nojûng zo, hkanghkyi eq xu yúng é gaunyhaû pé gi, rahá nyì kôrâ nghut lhê;
zoshâng zo gi, haú pé lé shê râ nghut lhê.
7 Haû nojûng gi, wàm eq rahá mhan chôm zo mù,
haú pê é azo pé gi, rahá chôm up kôrâ nghut lhê;
haû hkanghkyi gi, no su hkówá zo râ nghut lhê.
8 Zonú gi, lhângmuì hkyûng yàm má gyâkún râ nghut lhê;
zoshâng zo gi, dùq htân lhângmuì sut má lòq nhop râ nghut lhê.
9 Ngá é chyoiyúng bùm bànshoq htoq má,
yhángmòq yhangchang, dàm tap lhûm é le, lhoqhten lhoqhpyoq lhûm é le, kut kôrâ a nghut;
hkâsu mù gâ le, haû Yhûmsîng Garai lé sê é hkyô gi, wuimau má wuì byíng zan tô é su,
myìdàm htoq má byíng to râ nghut lhê.
10 Haú buìnyì má, Yese akoq mâ é A-myìt haû gi, byu pê é matú donghkón dùt râ nghut mù, gótû a-myû wuì gi, yhang lé lùmhkaû kôrâ nghut luî, yháng nyi é jowò gi, hpúng bo nyì râ nghut lhê. 11 Haú buìnyì má, haû Yhûmsîng gi, í dâm nghû râ dàm Yhâng é lòq lé lhâm kat luî, wó lùt nyi myìt tô é Yhâng é byu pé lé, Asuri mau mai le, Egutuq ming A-o Túm mai le, Egutuq ming Ahtoq Túmb mai le, Hkusha mau mai le, Elam mau mai le, Babeloni-a mauc mai le, Hamat mau mai le, Medihteri-an Wuimau mâ é zinlóng mai le, tsing shuî tsîng yù râ nghut lhê.
12 Yhang gi, byù myû wui é matú donghkón tû mù,
byo myín tô é Isira-elaq byu pé lé shuî tsîng yù râ nghut lhê;
Yhang gi, byo myín tô é Yudaq byu pé lé,
myìdàm htoq myi chyûn mai shuî zùp zing râ nghut lhê.
13 Ehprim a-myû wui é manôn hkyô gi, byùq byùq râ nghut mù,
Yudaq a-myû wui é gye pé gi, lhoqhtên pyâm é hui kôrâ nghut lhê;
Ehprim a-myû wuì gi, Yudaq a-myû wuì lé a mânon lo kôrâ nghut mù,
Yudaq a-myû wuì gi, Ehprim a-myû wuì lé gyè kut râ a nghut lo.
14 Yhángmòq í myû gi, buìwàng hkyam shut nyi é Hpilisiti byu pé lé ê htîm sat kôrâ nghut lhê;
yhángmòq gi, buìhtoq hkyam shut nyi é byu pê é sùtzè lé rahá ê lú sing yù kôrâ nghut lhê.
Yhángmòq gi, Edom mau eq Moba mau lé ùp sing yù kôrâ nghut mù,
Ammon byu pé gi, yhángmòq é a-ô má dùt byùq kôrâ nghut lhê.
15 Haû Yhûmsîng Garai gi,
Egutuq wuimau mó é achyûn lé lhoqkyuq huî pyám mù,
hkyíng hkyíng nyé é laì lé,
Yhâng é lòq èq Uhprat Wuìlàng mó htoq má he kat luî,
haú lé wuìlàng nyhit lâng dùt nhâng râ nghut mù,
ó yùq le, hkyî dông wó laî byìt kôrâ nghut lhê.
16 Isira-elaq byu pé Egutuq ming mai dòq lò kô é hkun lhê su,
Asuri mau mai htoq lo é, nyi myìt tô é Yhâng é byu pê é matú, hkyô mó dùt râ nghut lhê.