Hkya-on Kúngton É Mahkôn Pé
12
Haú buìnyì má, nàng gi,“Yhûmsîng Garai ê, ngò gi, Nàng lé hkya-on râ nghut lhê.
Nàng gi, ngo lé nhikjum yo kôlhang,
Náng é myìt lhoqzîm pyám mù,
ngo lé nhiktíng byi bê nghut ri.
2 Gè gè yhang, Garai Gasang gi, ngá é hkyi yù hkyô nghut ri;
ngò gi, Yhâng lé lùmhkaû râ nghut mù, gyùq râ a nghut.
Yhûmsîng Garai, haû Yhûmsîng Garai yhang, ngá é wum-o eq ngo lé hung nyì Sû nghut lhê;
Yhang gi, ngá é hkyi yù hkyô dùt bê nghut ri.” ga taí râ nghut lhê.
3 Núngmòq gi, gabú myìt èq,
hkyi yù hkyô nghut é wuìhtúng mai wuì hkâm kôrâ nghut lhê.
4 Haú buìnyì má, núngmòq gi,
“Haû Yhûmsîng Garai lé hkya-on keq;
Yhâng é myìng lé taî pyô keq;
Yhang kut bê hkyô lé, byù myû wui chyáng sé nhâng mù,
Yhâng é myìng wàq toq hui bê nghû taî pyô keq.
5 Haû Yhûmsîng Garai lé mahkôn hkya-on keq;
hkâsu mù gâ le, Yhang gi, hpungwup bo é múzó pé kut bê nghut ri;
shí hkyô lé, myìdàm gón mâ é bang sé kó sháng gàq.
6 Zi-un má nyi é bang ê, gabú myìt mai, htê mó èq mahkôn hkya-on keq;
hkâsu mù gâ le, Isira-elaq byu pê é Chyoiyúng Sû gi, núngmòq chyáng kô hkìk nyi ri.” ga taí kôrâ nghut lhê.