Babelon Lé Htuqhtîng É Myìqhtoi Dang
13
Amozi é yhang zo Esai-a myang é, Babelon lé htuqhtîng é myìqhtoi dang gi, a-ô mâ é eq rajung za nghut ri.2 Bùm pyut htoq má donghkón tu xuq keq;
gyèzô pé lé htê mó èq wùt garu keq;
zaugun wui é hkum pé má wàng râ matú,
yhángmòq lé lòqlìk lìk keq.
3 Ngò gi, majân é matú hkyin htoq tô é bang lé hkunmó hkyó bê nghut lhê;
Ngò gi, Ngá é nhikmó-yo hkyô lé châng kut byi râ matú,
Ngá é ûngmyuq hkyô má hkye gabú nyî bang nghut é, Ngá é sarhê pé lé ji tsîng to bê nghut lhê.
4 Gyô wú keq, byù mòqmó garû é htê su gâ é garu garín htê,
bùm htoq pé má garû myhîng ri nhung!
A-myû wuì rahá chôm zùp míng é htê su ga,
mîngdán pé chôm míng garû bum ri nhung!
Haû gi, Wum-o a-tsam dìk shoq bò Sû Yhûmsîng Garai mai,
majan zan râ matú gyèwum tsîng é nghut ri.
5 Ra-mau gón lé lhoqhten lhoqhpyoq pyám râ matú,
haû Yhûmsîng Garai eq rahá Yhâng é nhikmó-yo shâm lhâm gi,
mauhkûng yàm mai le,
wê é mau mai le, jé râ nghut lhê.
6 Haû Yhûmsîng Garaî é buìnyì chyâng lò bê nghut é yánmai, ngaùhkyûng ngaùyang kut nyî keq;
haû gi, Wum-o a-tsam dìk shoq bò Su chyáng mâ é lhoqhten lhoqhpyoq hkyô mó su jé râ nghut lhê.
7 Shí hkyo é yánmai, lòq pé bànshoq gi, wúm yom byùq mù,
i-myìt nhiklhum hkangmó gi, gyùq luî ròp ròp gâ bùm kôrâ nghut lhê.
8 Yhángmòq gi, gyùq ngha bùm kô é htoq agó,
no hpû é eq hkê no hpuzo kôrâ nghut lhê;
yhángmòq gi, zohkû nò no é myiwe su, no hpû bùm kôrâ nghut lhê.
Yhángmòq gi, rayùq eq rayùq wú ngha lhûm bùm kôrâ nghut lhê;
yhángmòq é myòqdong gi, gyùq chiq luî, myishâm su dùt bùm kôrâ nghut lhê.
9 Wú keq, maumyî haú lé chamchyuîyuì kut pyám mù,
haú má nyi é yubàk byu pé lé lhoqhtên pyám râ matú,
wuîhkê dik é, haû Yhûmsîng Garaî é buìnyì gi,
nhikmó-yô é eq nhik-ûm bùq é èq jé lé râ nghut lhê.
10 Mauhkûng mâ é kyî pé eq kyî hpúng azòng pé gi,
a dùq bó lo kôrâ nghut lhê;
buì htoq kôlhang, buì haû mauchut byùq râ nghut lhê;
lha-mó gi, a tso byùq râ nghut lhê.
11 Ngò gi, mingkan lé, yhâng é agè ashop é yánmai,
haû agè ashop é bang lé, yhángmòq é marâ é yánmai,
mara dam byi râ nghut lhê.
Ngò gi, myìt myhâng nghutbun bâng é nghutbun hkyô lé lhoqhtûm pyám mù,
shogyo myìt a bò bâng é nghutbun hkyô lé lhoqnyhum pyám râ nghut lhê.
12 Ngò gi, byu pé lé, hîng gyíng htoq le,
Ohpira hîng htoq le, shau nhâng râ nghut lhê.
13 Haû mù, Wum-o a-tsam dìk shoq bò Sû Yhûmsîng Garai nhikmó-yo luî,
Yhang nhik-ûm bùq é buìnyì má,
Ngò gi, mauhkûng lé lhoqnhún mù,
myìdàm htoq lé, yhâng é jowò mai lhoqnhún râ nghut lhê.
14 Haú hkûn, byu pé bànshoq bang gi,
sho bik sû hkat hkyut huî nyi é xat su le,
sau zúng sû a nyi é sau su le,
yhángmòq é yhummau, yhángmòq é byu pê chyáng hpang taû ló bûm kôrâ nghut lhê.
15 Châng hkyit é hui sû ó yùq nghut kôle, htaû ròt sat pyâm é hui râ nghut lhê;
wó chyup yu é bang bànshoq lé gi, sham èq sat pyám râ nghut lhê.
16 Yhángmòq é nyheqnú pé gi, yhángmòq é myòq hí mîyhang wàq htûng sat pyâm é hui kôrâ nghut lhê;
yhángmòq é yhûm pé gi, myàq zo myàq shuq pyâm é hui mù,
yhángmòq é yhûmsîng myhî pé gi, rhoi pyâm é hui kôrâ nghut lhê.
17 Wú keq, yhángmòq lé htim râ matú, Ngò, Medi byu pé lé lhoqtoq râ nghut lhê;
haú bang gi, ngùnhtung lé le haî su a ngàm,
hîng lé le ô nau é myìt a bo é bang nghut akô nghut ri.
18 Haú bâng é lai pé gi, zorâm wui lé bàt hkyop râ nghut lhê;
haú bang gi, nyheqnú pé lé shogyo nhikmyin myìt a bo tô é htoq agó,
zoshâng lé le shogyo kôrâ a nghut.
19 Haû mù, mîngdán pê é hpungwup shingkang,
Hkalade byua pê é nghutbun jang eq hpungwup shingkang nghut é, Babelon gi,
Sodom eq Gomora wà su,
Garai Gasâng èq lhoqhtên pyâm é hui râ nghut lhê.
20 Wà mó haû gi, hkâ-nhám le dum xuq râ a nghut é htoq agó,
pyàt bán hkangmó, ó le haú má nyì râ a nghut lo;
Arabi byu pé gi, haú má zúm saí kôrâ a nghut lo;
sau zúng bang le, yhángmòq é sau pé lé haú má ùp nhâng râ a nghut lo.
21 Nghut kôlhang, yòsô zè pé gi, haú má ùp kôrâ;
dànghkuî pé gi, haú mâ é yhûm pé má byíng bûm kôrâ nghut lhê;
hkungbup pé gi, haú má nyì kôrâ;
yo pé gi, haú má byam gó kôrâ nghut lhê.
22 Dànghkui mó pé gi, hau é gingtíng jowò má û ngau nyì kôrâ;
dànghkuî pé gi, hkìkhkam é yhûm mó má wàp ngau nyì kôrâ nghut lhê.
Babelon ihkyùp gyó râ ahkyíng chyáng bê nghut mù,
yhâng é buìnyì pé gi, myáng râ a nghut lo nghut ri.