14
Haû Yhûmsîng Garai gi, Yakup lé shogyo nhikmyin râ nghut lhê;Yhang gi, Isira-elaq lé radàm dum hkyin yù mù,
yhángmòq lé, yhûmsing é mau má nyì nhâng râ nghut lhê.
Byù bíng pé gi, yhángmòq eq xoq luî,
Yakup é awùt ashín pé eq rading ralhum za dùt byùq râ nghut lhê.
2 Gótû a-myû wuì gi, yhángmòq lé shuî lò mù,
ó le ô é mau má lo dé râ nghut lhê.
Haú hkûn, Isira-elaq byu pé gi, gótû a-myû wuì lé sing yù mù,
haû Yhûmsîng Garaî é maumyî má, haú bang lé jùn myhí jùn hpó kut kó luî,
yhángmòq lé shúm kut yu é bang lé, shúm kut yû mù,
yhángmòq lé zìk zô é bang lé, ùp zo kôrâ nghut lhê.
3 Haû Yhûmsîng Garaî èq, nang lé, nàng hpu zô é wuîhke jamjau hkyô eq hpû é shô é hkyô mai le, gyai wuîhkê é jùn mû mai le, bán no nhang é hkûn, 4 nàng gi, a-ô mâ é, Babelon hkóhkâm lé htuqhtîng é sânghkyang taí râ nghut lhê:
Haû zìk zo zìk shuq sû gi, htûm byùq bu-nhung lhî!
Yhang, htân htân zìk zô é hkyô gi, htûm byùq bu-nhung lhî!
5 Haû Yhûmsîng Garai gi, agè ashop bâng é gán-yang lé le,
ùp zo bâng é ùphkâng gán-yang lé le, lhoqhkyuî pyám bê nghut ri;
6 haû gi, byu pé lé,
nhikjum yô é èq a no loshoq bàt kyop nyi é eq,
a-myû wuì lé, nhikmó-yô é èq,
a wó hkûm zing pyám shoq ùp zô nyi é hkyô nghut ri.
7 Haû mù, maumyî bànshoq gi, bánno nguì ngón nyi ri;
byu pé gi, gabú mahkôn hkon bum akô nghut ri.
8 Lebanon mâ é kyám gâm eq htángmó gâm lháng,
náng é yánmai gabú nhik dìk luî,
“Ahkuî, nàng gi, lêng gyòp byùq bê nghut mù,
ngá-mòq lé, ó le a lé htuq lheng lo râ nghut lhê.” ga taî akô nghut ri.
9 A-ô mosumhkung gi, nàng jé lé lo é hkûn lhom pang yù râ ga,
bànshoq lé lhoqbyông kat bê nghut mù,
nang lé hui râ matú,
myìdàm htoq má hkyô-u shê bang kut laî lo é sôbyô pé lé nhaû toq kat bê nghut ri;
hau htoq agó, a-myû wui é hkóhkâm kut laî lò bang lé,
yhángmòq é hkóhkâm tánghkuq mai toq nhâng bê nghut ri.
10 Yhángmòq bànshoq bang gi, nang lé,
“Nàng le, ngá-mòq su wum nyhôm byùq bu-nhung!
Nàng le, ngá-mòq su dùt byùq bê nghut ri.”
ga rhoî dang taí kôrâ nghut lhê.
11 Náng é hpungwup a-tsam bànshoq gi, náng é tíng sámpyí pé mying é htê eq rahá,
mosumhkung má gyó jé bu-nhung!
Lùq pé gi, náng é a-ô má hkâng to mù,
bau pé gi, náng lé nghop to bê nghut ri.
12 Nàpsûn maubó é yhang zo, bó-myhû ê,
nàng gi, mauhkûng mai byìt gyó bu-nhung!
Byù myû wuì lé zing-ri sû ê,
myìdàm htoq má dú hkyô kat é hui bu-nhung lhî!
13 Nàng gi, náng é i-myìt hkaû má,
“Ngò gi, mauhkûng má dòq ló râ nghut lhê;
ngò gi, ngá é zùng tángmyhâng lé,
Garai Gasâng é kyî pê htoq má tu kê to râ nghut lhê;
ngò gi, mautsûng mâ é je myhang é jowò nghut é,
chôm zùp zîng é bùma htoq má zùng râ nghut lhê.
14 Ngò gi, je myhang é mhut htoq má dòq râ nghut lhê;
ngò gi, Myhang Htáng Sû su dùt shoq kut râ nghut lhê.” ga taî ri.
15 Nghut kôlhang, nàng gi,
mosumhkung mâ é nìk dik é dong má lhoqhkyô pyâm é hui bê nghut ri.
16 Nang lé myang é bang gi, nang lé rago wú tsuq to mù,
“Shí yùq gi, myìdàm htoq lé lhoqnhún luî,
mîngdán pé lé gyùq nán nhâng sû a nghut lhí?
17 Yhang gi, mingkan lé yòso mó kut pyám luî,
haú mâ é wà mó pé lé lhoqhtên pyám mù,
shúm byu pé lé, yhûm a taû ló nhang é sû a nghut lhí?”
ga, náng é hkyô lé myìt maú akô nghut ri.
18 Byù myû wui é hkóhkam pé bànshoq bang gi, ó le ô é lùp hkaû má,
xânghpoq nge wó hkyô eq yhup tô bum akô nghut ri.
19 Nghut kôlhang, nàng gi, nhiklhum alhô é sikkoq lé su,
náng é lùp mai dú htoq pyâm é hui zo bê nghut lhê;
nàng gi, haû sham èq htaû kyâng sat pyám bê bâng èq nghop pyâm é hui luî,
lùp mâ é lùqgòk pê htoq má du lheq tô é màng pé su,
náng é gùngsôm le nâng pyeq pyâm é huî ri.
20 Nàng gi, náng é maumyî lé lhoqhtên pyám mù,
náng é byu pé lé sat pyám bê nghut é yánmai,
yhángmòq eq rahá myhup yhûm pyâm é hui râ a nghut.
Haû agè ashop bâng é awùt ashîn pê é myìng lé gi,
hkâ-nhám le a taî htoq lo kó sháng gàq.
21 Yhángmòq é îchyí îwa pê é yubàk marâ é yánmai,
yhâng é zodù wuì lé tsing sat pyám râ jowò hen to keq;
haú hkûn, haú bang gi, maumyî haú lé sîng râ matú a wó toq lô lo mù,
myìdàm gón má, yhángmòq é wà mó pé a wó lhoqpyíng lo râ nghut lhê.
22 Haû Wum-o a-tsam dìk shoq bò Sû Yhûmsîng Garai gi,
“Ngò, yhángmòq lé toq htîm sat râ nghut lhê.” ga taî pyo ri.
Haû Yhûmsîng Garai gi, “Ngò, Babelon é myìng eq nyi myìt gyó tô é bang lé le,
zodù wuì eq awùt ashîn pé lé le, lhoqhtûm pyám râ nghut lhê.”
ga taî pyo ri.
23 Haû Wum-o a-tsam dìk shoq bò Sû Yhûmsîng Garai gi,
“Ngò, yhang lé, hkungbup pé nyì jang eq,
wuìwúm htum dùt nhâng râ nghut lhê;
Ngò gi, yhang lé, lhoqhten lhoqhpyoq hkyô gâ é bunshûm èq shum râ nghut lhê.” ga taî pyo ri.
24 Haû Wum-o a-tsam dìk shoq bò Sû Yhûmsîng Garai gi,
“Gè gè yhang, Ngò myìt hen tô é eq rajung za dùt râ nghut lhê;
Ngò myìt htung tô é eq rajung za dùt htoq râ nghut lhê.
25 Ngò gi, Asuri byu pé lé, Ngá é maumyî má lhoqhkyop pyám râ nghut lhê;
Ngò gi, yhángmòq lé, Ngá é bùm pé má nâng pyeq pyám râ nghut lhê.
Ngá é byu pê chyáng mai yhángmòq é kyaú lé yu pyám byi mù,
yhángmòq é gòqsân pé mai, yhángmòq é wòlai lé hkyut pyám byi râ nghut lhê.” ga dâkam ri.
26 Haû gi, mingkan gón é matú myìt hen tô é hkyô nghut ri;
haû gi, byù myû wuì bànshoq bang lé htim râ matú lhâm kat é lòq nghut ri.
27 Hkâsu mù gâ le, haû Wum-o a-tsam dìk shoq bò Sû Yhûmsîng Garai myìt htung tô é lé, ó wó hkûm zìng râ lhú?
Yhang lhâm kat é lòq lé, ó wó she tau râ lhú?
Hpilisiti Eq Sêng É Myìqhtoi Dang
28 A-ô mâ é gi, Hkóhkâm Ahaza shi é zàn má jé é myìqhtoi dang nghut lhê.
29 Hpilisiti byù bànshoq bang ê, núngmòq lé bàt é gán-yang gyuî byùq é yánmai,
hkâ gabú kó;
haû lhângmuì a-myû a-ngùt mai, dùq htân lhângmuì mó htoq lô mù,
hau é azô pé gi, dàt dâng é myishâm lhângmuì dùt bùm râ nghut lhê.
30 Je riyhang myung kyuq é bang gi, zoshuq myang hô mù,
asho awuî é bang gi, ngón za myang lèq kôrâ nghut lhê.
Nghut kôlhang, Ngò gi, náng é myìt gyo tô é a-pûn awang lé, mùtmó gyó é èq lhoqhtên pyám râ nghut lhê;
náng é nyi myìt gyó tô é bang lé sat pyâm râ nghut lhê.
31 Hkum ê, yón ngaû aq ô! Wà mó pé ê, ngaùhkyûng ngaùyang kut àq ô!
Hpilisiti byù bànshoq bang ê, gyùq ngha bùm keq ô!
Hkâsu mù gâ le, mautsûng mai myihkau htoq nyi ri;
yhang laî ló é jang má, ó le a wó nyi myìt gyó to nghut ri.
32 A-myû hau é lagyô pé lé,
hkâsu nghû tû taí râ lhú?
Haû Yhûmsîng Garai gi, Zi-un wà mó lé xuq tô é nghut mù,
Yhâng é byu pé mâ é hpû nyì shô nyi é bang gi, haú má myang nghêhkaû kôrâ nghut lhê.