Moba Lé Htuqhtîng É Myìqhtoi Dang
15
Moba lé htuqhtîng é myìqhtoi dang gi, a-ô mâ é eq rajung za nghut ri.Ra-myìn má za, Moba ming mâ é Ara wà gi,
lhoqhten lhoqhkyop pyâm é hui bu-nhung!
Ra-myìn má za, Moba ming mâ é Kira gi,
lhoqhtên lhoqhkyop pyâm é hui bu-nhung!
2 Dibon wà mâ é bang gi, hau é noqkuq yhûm má dòq ê kômù,
wùt ngaù râ matú myhang é jowò shut e akô nghut ri;
Moba byu pé gi, Nebo wà eq Medeba wà é matú yón ngau bum akô nghut ri.
Yùq hkangmó gi, uwuq byi huî é eq
nhutmui wùq pyám byî é huî akô nghut ri.
3 Yhángmòq gi, wà hkyô mó pé má jimê tû wut bum akô;
yhángmòq bànshoq bang gi, yhûmhkûng htoq má le, byù zîng é jowò pé má le,
yón ngaû kômù,
ngaùhkyûng ngaùyang dùt bùm bekô nghut ri.
4 Heshibon wà byù eq Ele-ale wà byù wuì gi, wùt ngau garu kô é nghut mù,
yhángmòq é htê lé gi, Yahazi wà mai lháng wó gyô ri.
Haû mù, Moba mâ é sarhê pé gi, wùt ngau garû é htoq agó,
yhángmòq é i-myìt nhiklhum gi, gyùq nán bûm bekô nghut ri.
5 Ngá é i-myìt nhiklhum gi, Moba é matú ngau garû ri;
haú mai hpang é bang gi, Zora wà jé shoq le,
Egilat Shelishiya jé shoq le hpang akô nghut ri.
Yhángmòq gi, ngaù uchyang,
Luhit wà shut ê râ matú bùm shut dòq ló bum akô nghut ri.
Yhángmòq gi, Horona-im wà shut e ló é hkyô má,
yhángmòq htên byòq byùq é hkyô eq séng luî, ngaù hkyangsang akô nghut ri.
6 Nimrim mâ é wuì pé gi, kân byùq mù,
mhan pé gi, nyhuî kyuq byùq bê nghut ri;
mhan zo hpoq zo le a jòq lo dùt byùq mù,
nyui é haî lháng a myìt to lo nghut ri.
7 Haû mù, yhángmòq gi, yhángmòq wó tô é eq hkong tô é sùtzè pé lé,
Sikxû gàm Langhkung lai shoq yu ló akô nghut ri.
8 Yhángmòq wùt garû ngau é htê gi, Moba maukyo cháng luî, langhtâng tû ri;
yhángmòq yón ngau é htê gi, Egilim wà má lháng jé hkyang ri;
yhángmòq ngaùhkyang sang é htê gi, Beri-elim wà má lháng hkyang ròt ri.
9 Dimona mâ é wuì pé gi, sui byíng bum ri;
nghut kôlhang, Ngò gi, wuîhke jamjau je lhoqmyo nhâng râ nghut lhê.
Moba mâ é wó hpang lùt bâng é ahtoq má le,
haú mau mâ é nyi myìt to bâng é ahtoq má le,
Ngò, hkanghkyi jé nhâng râ nghut lhê.