Zìk Zô É Hkyô, Zui Saî Shi-kùt É Hkyô Eq Luzúm A Wó Hkyô
4
Ngò dum wú kat le, buì ô má dùt htoq é zìk zô é hkyô bànshoq lé myang kat ri;zìk zo huî é bang ngaùbyi htoq kôle,
yhángmòq lé nhiktíng byî é byù a nyì nghut ri.
Wum-o a-tsam gi, zìk zo bâng chyáng shèq nghut mù,
yhángmòq lé nhiktíng byî é byù a nyì nghut ri.
2 Haû mù, shi ló byùq bê bang gi,
ahkuî chyungxe dui nyì bâng htoq je ge ri nghû,
ngò taî é nghut lhê.
3 Nghut kôlhang, a hku lé shi mù,
buì ô má kut htoq é agè ashop hkyô lé a myàng shî é sû gi,
haû í yùq é htoq má je ge ri.
4 Ngò gi, rayùq eq rayùq mânon lhum mù, wó ho yu é hkyîshi lòqshi bànshoq eq zui saî shi-kùt é hkyô bànshoq lé dum myìt tû wú é nghut lhê. Haû le, akôm za nghut byùq mù, laì lé châng hkat é za dùt byùq ri.
5 Ngòk sû gi, lòq pyik htik kut to mù,
yhânggùng yhang lhoqhten lhoqhpyoq pyâm ri.
6 Lòq ra-tsup èq za wó nyì ngón yùqyo é sû gi,
zui saî shi-kùt mù lòq í tsup byíng luî,
laì lé châng hkat é su htoq je ge ri.
7 Ngò gi, buì ô má akôm za nghut byùq é mú lé dum myang ri;
8 yhang baú za nghut é byù rayùq nyi ri;
yhang gi, zodù le a wó, gu-mang wuì le a wó nghut ri;
yhang zui saî é hkyô gi, htum nghu é a jòq kôlhang,
yhâng é myòqjí gi, yhâng é sùtzè lé a wú lùq bun nghut ri.
Haû mù, yhang gi, “Ngò gi, ó yùq é matú zui saî shi-kùt byi luî,
ngá gûng ngò nyì yuq a yò dùt nyi lhê lhú?” ga myî ri.
Haû le, akôm za dùt byùq mù,
zuî hkyik zuî pa é múzó za nghut ri nhung!
9 Í yùq gi, rayùq za nghut é htoq je ge ri;
hkâsu mù gâ le, yhángnhik gi, yhûmsîng zui saî shi-kùt é mai,
ge é ahpau wó kôrâ nghut lhê.
10 Rayùq lèqbàt jáng, rayùq tu toq byi râ nghut lhê;
rayùq za nghut sû lèqbàt jáng kúm gi,
yhang lé tu toq byi râ byù a nyì mù, lòm zô ri.
11 Hau htoq agó, í yùq rahá yhup jáng gi, nye râ nghut lhê;
rayùq baú za kúm gi, hkâsu wó lhoqnyê yù râ lhú?
12 Rayùq lé za gi, wó htuqhtîng ûng râ nghut kôle,
í yùq lé gi, wó htuqhtîng ung pyám râ a nghut.
Tui sum hkat lé shûm tô é tui gi, luì za wó lâng hpyit râ a nghut.
Kô Myhang Lo É Le Akôm Za Nghut Byùq É Hkyô
13 Sidìq byî é lé a dàt hkam yu é, uhpyû zuì nè bê nghut é, ngòk é hkóhkâm hpô htoq, hpàqchyî byéng-yá bo é, asho awuî é zorâm zo gi, je ge ri. 14 Zorâm haû gi, mîngdán hkaû má asho awui hku lé lo é nghut kôlhang, asho awui hkyô nghut é htóng mai wó lùt htoq lô luî, hkóhkâm dùt é nghut ri. 15 Buì ô má chyungxe duì luî, sô nyi é lhúnglhâng bang gi, haû hkóhkâm hkô má xoq zung é zorâm haú yùq é htâng má châng nyi bùm kô é lé, ngò myang ri. 16 Yhang ùp é mingbyû wuì gi, a ung nghap loshoq myô ri; nghut kôlhang, htâng má hku lé lo é bang gi, yhâng é hkyô lé a myìt nguì kó nghut ri. Haû le, akôm za nghut byùq mù, laì lé châng hkat é za dùt byùq ri.