Hkóhkâm Lemu-ela É Myhîhpô Dang
31
Hkóhkâm Lemu-ela lé yhâng nu mhoq byî é
myìqhtoi dang nghut é,
yhâng é myhîhpô dang gi,
2 “Ngá zo ê,
ngá é zoyhûm mâ é ngá zo ê,
ngò danghtum htûm tô é sû zo ê,
3 náng é wum-o lé,
myiwe wui pê chyáng hkâ lhoqpân pyám;
náng é a-tsam lé,
hkóhkam pé htên byòq râ hkyô má hkâ lhoqpân pyám.
4 Lemu-ela ê,
tsibyiq wing gi,
hkóhkam pé shuq râ matú a nghut,
hkóhkam pê é matú a nghut ô;
îhpe gi,
zaugun wuì shuq naû râ matú a nghut.
5 Yhángmòq shuq jáng gi,
târâ lé tô-myhî pyám mù,
zìk zo hui bang bànshoq é ahko ahkáng lé,
a târa é dông kut pyám byi kôrâ lé chiq ri.
6 Htûm ló byùq nyi é bang lé,
îhpe byi huq mù,
myìt htûm nyi é bang lé,
tsibyiq wing byi huq aq.
7 Yhángmòq gi,
shuq luî,
myung kyuq é hkyô lé,
tô-myhî pyám mù,
yhángmòq ihkyùp hui zô é hkyô lé,
a myìtbun lo dùt kó sháng gàq.
8 Yhûmsing matú a ge taí bang lé,
bo taí byi mù,
lùm byù a nyì bâng é ahko ahkáng lé,
bo magûm byi aq.
9 Toq taí mù,
díngmán é dông jéyáng aq;
asho awuî é bang eq myùng bâng é ahko ahkáng lé bo hûng byi aq.”
gâ é nghut ri.
Siri Bo É Myiwe Myhî É Hkyô
10 Siri bo é myiwe myhí lé,
ó yùq myang ho lhê lhú?
Yhang gi,
ne jung lungsêng htoq hpau je dàp ri.
11 Yhâng é yhûmsîng hpó gi,
myìt mai yhang lé rago wó lum to bê nghut mù,
a-kyû bo jung haî le a langhpyùt râ nghut ri.
12 Yhang gi,
yhâng é i-pyàt buìnyì pé bànshoq má,
yhâng é yhûmsîng hpô é matú
agè ashop é hkyô a kut é za,
ge é hkyô baú nghut ri.
13 Yhang gi,
saumaú eq jihkyîng ho yù mù,
yhâng é lòq èq yhang gabú myìt mai wòqgan wòq ri.
14 Yhang gi,
wuìloq kut é wuìsanghpo su,
we we mai zoshuq yu lo ri.
15 Yhang gi,
myòq a myàng shi mai,
yhup toq mù,
yhâng é yhûmbyù wui lé,
zoshuq lajang byi luî,
yhâng é duìnhâng myiwe zo wuî lé,
mû tsing gàm byî ri.
16 Yhang gi,
yò eq séng luî myìt wú mù,
rahkyang wui yu ri;
yhang wó ho yu é ngun èq,
tsibyiq hkyam le saî ri.
17 Yhang gi,
hpyidum má,
wum-o nghut é hpyihit hit to mù,
yhâng é múzó é matú,
lòqbú lòqyìn bò nhang tô ri.
18 Yhang gi,
yhâng é wuìloq,
a-myàt htoq é lé myang ri;
myín lé,
yhâng é myibung gi,
a shi byùq nghut ri.
19 Yhâng é lòq gi,
hkyîng duì zè lé zuî to mù,
yhâng é lòqshi gi,
wáng dui nyi ri.
20 Yhang gi,
myùng bang lé,
lòq lham garúm byi mù,
asho awuî é bang lé,
yhâng é lòq èq htuqbáng yu ri.
21 Yhâng é yhûmbyù wuì bànshoq gi,
ne é pán htû myang wùt to kô é nghut mù,
yhang gi,
gyo gyó kôlhang,
yhâng yhûmbyù wui é matú,
a myìt chiq nghut ri.
22 Yhang gi,
yhâng é yhuphpyâng é matú,
hkâng nghop zè saí mù,
nú nhâm é eq me mê é pán hkyup wùt chung ri.
23 Yhâng é yhûmsîng hpó gi,
wà hkum nàm má,
mû hpyé nhik bò wuî eq zùng mù,
hkúngga hpautap é huî nyi ri.
24 Yhang gi,
nú nhâm é buhîng pé saî ung mù,
wuìloq kut bang lé hpyihit ung byî ri.
25 Wum-o a-tsam eq siri gi,
yhâng é mèbu nghut mù,
yhang gi,
jé lô râ buìnyì pé má
myang wui gabú râ nghut lhê.
26 Yhang gi,
hpàqchyî dang taí mù,
yhâng é nhutshô má gi,
jujúm myìt mai mhoqshit é dang bo ri.
27 Yhang gi,
yhâng é yhûmbyù wuì lé,
rago wú gon mù,
lagon luî wó é zoshuq a zo nghut ri.
28 Yhâng é zodù wuì gi,
toq mù,
yhang lé,
shimân jeju wó sû gâ akô;
yhâng é yhûmsîng hpó le,
yhang lé hkya-ôn é gi,
29 “Hkúngga gíng é myiwe myo myo nyì kôlhang,
nàng gi,
bànshoq bâng htoq má je gyaú sû nghut ri.”
gâ ri.
30 Gùnghkyâng yúng é gi,
mhaû é za nghut mù,
isâm yúng é gi,
akôm za nghut ri;
nghut kôlhang,
haû Yhûmsîng Garai lé gyùq hkúnggâ é myiwe gi,
hkya-on gíng é sû nghut ri.
31 Yhang zui saî é hkyî shi lòq shi lé,
yhang lé byi keq;
yhang zui saî é múzó gi,
wà hkum má yhang lé hkya-on nhâng sháng gàq.