5
Nàng wùt wú aq; nghut kôlhang, nang lé ó yùq tu byi râ lhú?Chyoiyúng bâng chyáng mâ é ó yùq chyáng, nàng wó taû ló râ lhú?
2 Myìt tot é hkyô gi, nghâ sû lé sat pyâm ri;
mânon é hkyô gi, hpàqchyî a bò sû lé sat pyâm ri.
3 Ngò gi, ngha é sû awang gîng nyì bê nghut é lé myang ri;
nghut kôlhang, yhâng é yhûm gi, byò dàn tung nhîng pyâm é huî byùq ri.
4 Yhâng é zodù wuì gi, nguì ngón hkyô eq wê byùq nyi ri;
yhángmòq gi, hung yu é byù a nyì é za târâ hpyit wàp má zìk kyop pyâm é hui zô akô nghut ri.
5 Yhâng é kyôshi myuishi lé gi, zò-mut bâng èq zô pyám byi luî,
zu púng mâ é lháng yu pyám byi râ nghut lhê;
yhâng é sùtzè lé gi, wuìshit bâng èq myhui pyám byi râ nghut lhê.
6 Hkâsu mù gâ le, wuîhke hkyô gi, myigùng mai htoq lo é a nghut;
jamjau hkyô gi, myìdàm htoq mai yùq htoq lo é a nghut.
7 Nghut kôlhang, myizik gi, maulat shut dâng é eq rajung za,
byù gi, wuîhke jamjau hui zo râ matú hku lé lo é nghut ri.
8 Nghut kôlhang, ngò ru nghut le gi, Garai Gasang lé hô râ nghut lhê;
ngá é mú pé lé, Yhâng é hí má àp to râ nghut lhê.
9 Yhang gi, a ung sê gyô é maúhpo múzó pé lé kut shit mù,
a ung nghap é làklaí múzó pé lé kut htoq ri.
10 Yhang gi, myìdàm htoq má mau wô nhâng mù,
yò pé má wuì bam nhang ri.
11 Yhang gi, lhoqnyhum pyâm é bang lé, wàq toq to mù,
yón nyi é bang lé, nguì ngón é jang má lhoqtoq to bê nghut ri.
12 Hpuq lô lhik lô kut bâng é lòqmú pé a wó ûngmyuq sháng gàq ga,
Yhang gi, haú bang htung é hkyô pé lé lhoqhtên pyám byî ri.
13 Yhang gi, hpàqchyî bò bang lé, yhángmòq é hpuq lô lhik lô hkyo èq lòm zo nhâng mù,
mò zo mò shuq bang htung é hkyô pé lé, lhoqmhuq pyám byi bê nghut ri.
14 Yhángmòq gi, nyí lé, mauchut é hui zo mù,
nyí-káng lé, myín má su sop so kôrâ nghut lhê.
15 Yhang gi, asho awuî é bang lé, shâm su htoq é dang mai le,
wum-o a-tsam bò bang zuî kîng tô é lòq mai le, hkyi xe yù bê nghut ri.
16 Haû mù, myùng bang gi, myòqbyù jang wó mù,
târâ a chung é bang gi, yhángmòq é nhut lé myhî pyâm é nghut ri.
17 Garai Gasâng èq lhoqjo byî é hui sû gi, hkungsô wó nyi ri;
haû mù, Wum-o a-tsam dìk shoq bò Sû mhoqshit é hkyô lé, hkâwú tiq pyám.
18 Yhang gi, dàm lhoqtap byi kôlhang, htup byi mù,
gò tóng byi kôlhang, Yhâng é lòq èq lhoqgê byî ri.
19 Yhang gi, wuîhke jamjau hpu zo hkyô hkyuq hkat mai nang lé hkyi xe yù râ nghut mù,
nyhit hkat má le, nang lé wó lhoqnhô râ a nghut.
20 Yhang gi, mùtmó gyó é hkûn, shi é jang mai le,
majan htoq é hkûn, shámsó mai le, nang lé hkyi yù râ nghut lhê.
21 Nàng gi, lùmù gànsang é mai mâgum yu é hui mù,
htên byòq hkyô jé lô kôlhang, gyùq nó a ra nghut ri.
22 Nàng gi, htên byòq hkyô eq mùtmó gyó hkyô lé wui pyám byi râ nghut mù,
tân jung yòsô zè pé lé gyùq nó a ra râ nghut lhê.
23 Hkâsu mù gâ le, nàng gi, yò pé mâ é lùqgòk pé eq dangshikaq to râ nghut mù,
tân jung yòsô zè pé gi, nàng eq nguì ngón hkyô yù râ nghut lhê.
24 Nàng gi, náng é zúm nguì ngón yùqyò é lé wó sé mù,
náng é sau hpúng lé wú le, haî le a byùq tô é myàng râ nghut lhê.
25 Nàng gi, náng é zodù wuì myô lò mù,
náng é awùt ashín pé, myìdàm htoq mâ é wàhu su dùt é lé, wó sé râ nghut lhê.
26 Nàng gi, yàm-yòq jé jáng yâm yu é gùqding su,
u hpyû zui nè shoq nyì luî, lùpdùng má jé râ nghut lhê.
27 Shí hkyô lé ngá-mòq jep wú bê nghut lhê; haû têng ri.
Haû mù, gyô yù luî, haú lé nàng yhang chung jaì àq.” ga taî ri.