Yobaq
6
Haú hkûn, Yobaq tû taî é gi,2 “Ngò dìk shoq hpu zô é hkyô lé chîn wú mù,
ngò hpu hke zô é hkyô bànshoq lé jàng má kê wú râ mhaî!
3 Haû gi, wuìshuq lung-aû mâ é se-muî htoq lai râ za nghut lhê;
haû mù, ngá é dang bùt shun htoq lo é ru nghut lhê.
4 Wum-o a-tsam dìk shoq bò Su é myoshi pé gi, ngá chyáng zùq tô é nghut mù,
ngá é sô gi, haú pê é dùq lé chyup yu nyi ri;
Garai Gasâng é gyùq chiq hpo mó gi, ngo lé htim râ hen nyi ri.
5 Loze gi, mhan jòq jáng mying garu râ lhú?
No gi, mhan jòq jáng bò myìng râ lhú?
6 Màn a bo é zoshuq lé, xo a kat é ge zo râ lhú?
Wòq-ú mâ é ûhpyû gi, hai màn bò râ lhú?
7 Ngò gi, haú lé záng râ lháng a kâm é nghut mù,
zoshuq haú lé ôn byùq ri.
8 Ngò dûng tôngbán é hkyô wó yû sháng gàq;
ngò myìt myòqbyu é hkyô lé, Garai Gasang gyo byi sháng gàq;
9 Garai Gasang gi, ngo lé lhoqhkyop pyám luî,
Yhâng é lòq lhâm kat mù, ngá é chyungxe hpyit pyám byi sháng gàq!
10 Haû jáng, ngò gi, dìk shoq hpu zo kôlhang,
Chyoiyúng Su é dang pé lé a he-ngìk pyâm é nghut mù,
nhiktíng byî é hkyô eq gabú é hkyô myang hkam yù râ nghut lhê.
11 Ngò hai wum-o bò mù, myòqbyu nyì shirâ lhú?
Ngá é jihtûm haî nghut mù, ngò jân nyì râ lhú?
12 Ngá é wum-o gi, lùqgòk wum su nghut lhê lhú?
Ngá é gùngsho gi, gyi nghut lhê lhú?
13 Ngá gûng ngò a wó garúm yu é, a nghut lhí?
Ûngmyuq hkyô lé gi, ngá chyáng mai hkat htoq hpyuq bê, a nghut lhí?
14 Luzúm wuî gi, myìt wum gyui sû le, shogyo nhikmyîn yù âng ri; haû a nghut jáng, yhang gi,
Wum-o a-tsam dìk shoq bò Sû lé gyùq hkúnggâ é myìt tô pyám râ nghut lhê.
15 Nghut kôlhang, ngá é gu-mang wuì núngmòq gi, wuìlàng zo yui é su, a wó lûm kô é bang nghut mù,
wuìhkyo mai yui laî ló byùq é wuìlàng zo su, byùq byùq bekô nghut ri.
16 Wuì haû gi, nghânhtung yuì jáng nòq byùq mù,
gyo nyé yuî jáng nghop hpyuq bê nghut ri.
17 Nghut kôlhang, nyé nám jé jáng a yui byùq lo mù,
nyé é yánmai, wuìhkyo mai byùq ló byùq bê nghut ri.
18 wuìloq kut bang gi, hkyô haú pé mai sô nghoq ló mù,
kyuq huî é jang má sô wang ló luî, htûm byùq bekô nghut ri.
19 Tema mau mâ é wuìloq kut bang gi, ûchyam ho akô;
Sheba mâ é wuìloq kut bang gi, myìt myòqbyu to mù, ûchyam ho akô nghut ri.
20 Yhángmòq gi, myìt myòqbyu to kôlhang, myìt myo ûng wôm byùq luî,
haú má jé kôjáng, myìt wum gyuî byùq bekô nghut ri.
21 Ahkuî, núngmòq le, haû eq rajung za haî a wó garúm kô é hkyô tûn shit bekô nghut ri;
núngmòq gi, gyùq chiq hpo lé myàng mù, gyùq nán bûm bekô nghut ri.
22 Ngò gi, núngmòq lé, ‘Ngá chyáng chyûnghuq yu lé byi keq;
núngmòq é sùtzè mai ngá é matú bo byi keq;
23 gyè pê é lòq mai ngo lé hkyi xe yù keq;
byù jûm pê é lòq mai ngo lé hkyi yù keq.’ nghû taî wú é lhú?
24 Ngo lé mhoq byi keq; ngò zim za nyi to râ nghut lhê;
ngò kut shut é hkyô lé tûn shit keq.
25 Tengmán é dang pé gi, hkâ-í yhang myìt no é hkyô nghut ri nhung!
Nghut kôlhang, núngmòq dangnyhin nyhîn é hkyô pé gi, haî nghut akô lhú?
26 Núngmòq gi, ngò taî é dang lé lhoqnyhâng byi mù,
ngá é myìt htum dang pé lé laì dông sôn pyám byi kôrâ lhú?
27 Núngmòq gi, hkyîn shosé she é dông chuízô pé lé lháng gyòp gyó nhâng mù,
núngmòq é luzúm wuî lé wuìloq zè dông sôn pyâm akô nghut ri.
28 Nghut kôlhang, ahkuî, ge é myìt mai ngo lé wú keq;
núngmòq é myòq hí má mhaû é dang ngò taí râ a nghut.
29 Dum myìt lhîng keq; târâ a ràp-rá é hkyô hkâkut kó;
dum myìt tû wú keq; ngá é hkyô gi, díngmán é hkyô nghut lhê.
30 Ngá é nhutwuî má gi, agè ashop é hkyô rajung jung dàp ri lhú?
Ngò gi, ge é eq a ge é lé, a dàt gam hkoq é nghut lhê lhú?