7
Xângzo wuì gi, myìdàm htoq má mú zuî shi-kùt râ dùt é nghut lhê, a nghut lhí?Yhángmòq é buìnyì pé gi, langchyâng pê é buìnyì su nghut lhê, a nghut lhí?
2 Jùn gi, myínhtâng buìshûm lé myìt tuî nyi é su le,
langchyâng pé gi, langchyáng hpau wó râ lé láng nyi é su le,
3 ngò gi, lhôhkyap myo myo wuîhke hkyô hui zo mù,
no hpu hkê nyi é myín pé gi, ngá é matú tô to byi bê nghut ri.
4 Ngò gi, lèq é hkûn, ‘Ngò hkâ-nhám yhup toq lô râ lhú?’ nghû myìt é nghut lhê.
Sûn lûm hîng mù, ngò gi, maubó shoq hpuq kat lhik kat kut nyi é nghut lhê.
5 Lùq eq hi-kyap gi, ngá é gùngsho má dàp nghop byùq mù,
ngá é sho-kuq pé gi, gòq hâ lò luî, mòwìng htoq nyi ri.
6 Ngá é buìnyì pé gi, wòqgan nghat pé htoq lawán luî,
myòqbyù jang a jòq é za laî ló byùq bê nghut ri.
7 Garai Gasang ê, ngá é chyungxe gi, soq rashê za nghut é lé myìtbun byi aq;
ngá é myòqjí gi, gabú hkyô lé dum myàng râ a nghut lo.
8 Ahkuî, ngo lé myang é myòqjí pé gi, ngo lé dum myàng râ a nghut lo;
núngmòq gi, ngo lé hô kôrâ nghut kôlhang, ngò gi, a nyi byùq lo râ nghut lhê.
9 Mhut zó wùp ló mù, byùq byùq é su,
mosumhkung má gyó ló bê sû gi, dum wó taû lò râ a nghut.
10 Yhang gi, yhâng é yhûm má hkâ-nhám le dum lò râ a nghut;
yhâng é jowò gi, yhang lé sé râ a nghut lo.
11 Haû mù, ngò gi, zim za nyì râ a nghut;
ngò gi, ngá é sô no hpu hkê nyi é mai dang nyô râ nghut lhê;
ngò gi, ngá é i-myìt sô hkâm zo wuî nyi é mai hkyang sâng dang taí râ nghut lhê.
12 Ngò gi, wuìshuq lung-aû, a nghut jáng, nìk é jang mâ é mànjùng mó nghut luî,
nàng, ngo lé wú zúng nyi lhê lhú?
13 Ngá é yhupgyàp gi, ngo lé nhiktíng byi mù,
ngá é hpyang gi, ngá é hkyang sâng dang lé lhoqzîm pyám byi râ nghû, ngò myìt é hkûn,
14 nàng gi, ngo lé yhupmòq pé mai kyuq luî,
shing-rán pê èq kyuq ngha to bê nghut ri;
15 Haû mù, ngò gi, ngá é showui gyòng dùt é gùngdu shî lé ô naù râ htoq,
tuî shi pyám râ lé je ô nau é nghut lhê.
16 Ngò gi, ngá é chyungxe lé wú tiq lhê; ngò gi, ahtum abyùq chyungxe kâm dui nyì râ a nghut;
ngo lé baú nyhi to keq; ngá é buìnyì pé gi, akôm za nghut ri.
17 Waxâng zo gi, haî wá nghut luî, Nàng, yhángmòq lé shigyaú mù,
yhángmòq é hkyô lé myìt tê byî nyi é htoq agó,
18 nàp wuì yhángmòq lé kûm wú mù,
ahkyíng hkangmó yhángmòq lé chyam wú nyi lhê lhú?
19 Nàng gi, ngo lé a wú é za hkâ-nhám lhing ló luî,
ngá é sôkan wó myuî shoq, ngo lé baú hkâ-nhám tô to râ lhú?
20 Ngá-mòq kut é jung hkangmó lé myàng Sû ê,
ngò mara kut shut é nghut jáng, Nang lé haî záng kut bê lhú?
Nàng, haî mù ngo lé wing díng to jang kut lhê lhú?
Ngò gi, Náng é wòlai dùt bê lhú?
21 Nàng gi, haî mù, ngò shut é hkyô pé lé a lhut pyám byî é eq,
ngá é mara lé a hkyut pyám byî é lhú?
Hkâsu mù gâ le, ngò gi, hân za hpuílhup má shi lèq yâng byùq râ nghut lhê;
Nàng gi, ngo lé hô râ nghut kôlhang, ngò gi, a nyi byùq lo râ nghut lhê.” gâ ri.