Bilidat
8
Haú hkûn, Shu-a byù Bilidat tû taî é gi,2 “Nàng gi, hkâ-myháng jé shoq dang haú pé taî nyì râ lhú?
Náng é dang pé gi, hkâ-myháng jé shoq laìdun mó su myô nyì râ lhú?
3 Garai Gasang gi, târâ ràp-rá hkyô lé a nghut é dông chung é nghut lhê lhú?
Wum-o a-tsam dìk shoq bò Sû gi, díngmán é hkyô lé a nghut é dông chung é nghut lhê lhú?
4 Nungzô pé mai Yhang lé mara shut kô é hkûn,
Yhang gi, yhángmòq lé, yhángmòq é mara dam hui zo nhâng bê nghut ri.
5 Nghut kôlhang, nàng gi, Garai Gasang lé hkúngga hpautap myìt mai hô mù,
Wum-o a-tsam dìk shoq bò Sû lé dûng tôngbán luî,
6 sân-yúng é eq i-myìt díng é nghut jáng,
ahkuî lháng, Yhang gi, náng é gùnglik dông toq mù,
nang lé nyì ngón yùqyò nhâng râ nghut lhê.
7 Nàng gi, sânghi má asho awui dùt kôlhang,
ló htáng má kô làm râ nghut lhê.
8 Góhkun lhê é i-pyàt lé myî jep wú mù,
yhángmòq é îchyí îwâ pé wó mhoq yu é hkyô pé lé ho gôn htoq yû àq;
9 hkâsu mù gâ le, ngá-nhúng gi, anyí-nap mai za hku é bang nghut mù, haî le a sé nghut ri;
myìdàm htoq má ngá-nhûng é buìnyì pé gi, wùpzo za nghut ri.
10 Góhkun lhê é bang gi, nang lé a mhoqshit, a taî kyo kut kôrâ nghut lhê lhú?
Yhángmòq gi, yhángmòq hpàqchyî bo é dang pé lé a lhoqhtoq shit kôrâ nghut lhê lhú?
11 Hkabap a jòq le gi, jàm tsaí gâm wó kô myhang é nghut lhê lhú?
Wuì a jòq le gi, jàm gàm wó yùq é nghut lhê lhú?
12 Haû gi, yùq to mù, a hpyit pyám kôlhang,
wàhu htoq hân nyhuî kyuq byùq râ nghut lhê.
13 Garai Gasang lé tô-myhî pyâm é bànshoq bang gi, haû eq rajung za dùt byùq râ nghut mù,
Garai Gasang lé a lùm bâng é myòqbyù hkyô gi, htûm ló byùq râ nghut lhê.
14 Yhángmòq lùmhkau é jang gi, wum nyhôm é nghut mù,
yhángmòq nghêhkau é jang gi, gangmyhá sut dùt byùq râ nghut lhê.
15 Yhángmòq gi, yhángmòq é sut má nghe to kôlhang, haû ging râ a nghut;
yhángmòq gi, haú má lèq nghe to kôlhang, haû a gyòp râ a nghut.
16 Yhángmòq gi, buì tsô jang má yùq yúng luî,
hkyâm má a-nyùq nyún byíng tô é agàm su dùt ri.
17 Yhángmòq é a-myìt gi, lùq bùm pé má chîn ló mù,
lùq cham gyoro má jowò hkyó râ ho wún ri.
18 Nghut kôlhang, yhâng é jowò mai nùt htoq pyâm é hkûn,
myigùng haû gi, ‘Ngò, nang lé a myang wú é nghut lhê.’ ga, yhang lé he-ngìk pyám râ nghut lhê.
19 Yhángmòq é chyungxe gi, haú dông nyhuî shi byùq râ nghut mù,
jowò haú má gótû agàm pé yùq byùq râ nghut lhê.
20 Gè gè yhang, Garai Gasang gi, mara a bò sû lé he-ngìk pyám râ a nghut;
Yhang gi, agè ashop bâng é lòq lé htuqbáng byi râ a nghut.
21 Yhang gi, náng é nhut lé wuì nhâng mù,
náng é nhutwuî lé gabú garu nhâng râ nghut lhê.
22 Náng é gyè pé gi, hoq hpu hkyô byíng zan byùq mù,
agè ashop bâng é zúm gi, a jòq lo dùt byùq râ nghut lhê.” gâ ri.