Yobaq
9
Haú hkûn, Yobaq tû taî é gi,2 “Haú hkyô têng é lé, ngò hkyak sê lhê.
Nghut kôlhang, xângzo byù za gi, yhûmsîng mara a bo é hkyô lé, Garai Gasâng é hí má hkâsu kut wó shit râ lhú?
3 Rayùq yùq, Yhang eq dangnyhin nyhîn lhum nau é nghut kôle,
rahkyîng dàm mâ é radàm lháng a wó tû taí nghut ri.
4 Yhang gi, hpàqchyî byéng-yá eq wum-o a-tsam mó bò Sû nghut mù,
ó yùq wá Yhang lé htuqhtíng luî, wó ung pyâm lhê lhú?
5 Yhang gi, bùm pé lé a bûn nùng má htòt pyám mù,
Yhang nhikjum yo luî, haú pé lé tu mhuq pyâm ri.
6 Yhang gi, myìdàm htoq lé, jòq tô é jang má lhoqnhún mù,
haú lé htuq tô é zìng pé lé nán nhang ri.
7 Yhang gi, buì lé hkunmó hkyô tô é nghut mù, buì gi, a tsô lo nghut ri;
Yhang gi, kyî pé lé le myhî lhûng pyâm to bê nghut ri.
8 Yhang za, mauhkûng lé hpyi hkâng to mù,
wuìshuq lung-aû mâ é wuìlhêng pé má nâng wún ri.
9 Yhang gi, Wàqdàng kyî, bó kyî pé,
kyî wòqhkyún eq maupyî hkyam mâ é kyî hpúng azòng pé lé hpan to Sû nghut ri.
10 Yhang gi, a ung sê gyô é maúhpo múzó pé kut mù,
a ung nghap é maúhpo alhô agàn pé kut htoq ri.
11 Yhang gi, ngá nâm mai laî ló é hkûn, ngò, Yhang lé a myàng nghut ri;
Yhang laî ló é hkûn, ngò a wú sê kat nghut ri.
12 Yhang htîm lú yu ló é nghut jáng, Yhang lé ó yùq wó hkûm zìng râ lhú?
Yhang lé, ‘Nàng haî kut nyi lhê lhú?’ nghû, ó yùq wám taí râ lhú?
13 Garai Gasang gi, Yhang nhikjum yô é lé wùp taû yù râ a nghut;
Rahapa lé htuqbáng é bang lháng, Yhâng é hkyî wang má ngóm gòp bum akô nghut ri.
14 Haû su nghut jáng, ngò gi, Yhang lé hkâsu nghû wó tû taí râ lhú?
Ngò gi, Yhang lé htuqhtíng râ dang hkâsu kut wó myang hô râ lhú?
15 Ngò gi, mara a bò kôlhang, Yhang lé a wó tû taî é nghut lhê;
ngò gi, shogyo nhikmyîn yù râ matú, ngá é Târâ Agyì lé dûng tôngbán é za nghut lhê.
16 Ngò wùt dung luî, Yhang tu byi kôlhang,
ngá é htê lé Yhang gyo byi râ nghut lhê nghû, ngò a lùmjíng.
17 Yhang gi, laìdun mó èq ngo lé lhoqhkyop to mù,
haî le a râ é má, ngo lé dàm myo myo tap byi râ nghut lhê.
18 Yhang gi, ngo lé soq a shê nhâng nghut mù,
ngo lé no hpu hke hkyô lhoqpyíng byi râ nghut lhê.
19 Wum-o eq séng luî ga jáng, Yhang gi, wum-o bo dik sû nghut ri!
Târâ ràp-rá hkyô eq séng luî ga jáng, Yhang lé ó yùq wó whuí râ lhú?
20 Ngò gi, mara a bò kôlhang, ngá é nhut gi, ngo lé mara hûn râ nghut lhê;
ngá chyáng mara hûn jang a jòq kôlhang, ngá é nhut gi, ngo lé mara byi râ nghut lhê.
21 Ngò gi, mara hûn jang a bò kôlhang,
ngá gûng ngò haî su a ngam é nghut lhê;
ngò gi, ngá é chyungxe lé wú tiq pyâm é nghut lhê.
22 Haú pé bànshoq rajung za nghut mù,
‘Yhang gi, mara a bò sû lé le, agè ashop sû lé le, lhoqhtên pyâm é nghut ri.’ nghû ngò taî é nghut lhê.
23 Ihkyùp gi, byò dàn tung shî nò hkyô lé shuî háng jáng,
Yhang gi, mara a bò sû hpu zô é lé rhoî dang taî pyâm ri.
24 Maumyî gi, agè ashop bâng é lòq má wang to jáng,
Yhang gi, maumyî hau é târâ agyi pé lé myòq lhoqchit pyám byî ri.
Haû gi, Yhang a nghut jáng, ó ge nghut râ lhú?
25 Ngá é buìnyì pé gi, wó dîn su htoq je yang ri;
haú pé gi, gabú nguì ngón hkyô a myang é za dâng laî ló byùq bê nghut ri.
26 Haú pé gi, gyaí yang é jàm yang lhaî pé su le,
zoshuq pé htîm kyaq râ matú dâng gyó lé é zùn su le, laî ló byùq bê nghut ri.
27 Ngò gi, ‘Ngò myìt nò dang taî é lé tô myhî pyám bê nghut mù,
ngá é myòqdong isâm lé, wuì zo pyom kut hkyo èq htaî pyám râ nghut lhê.’ nghû taî é nghut jáng,
28 ngò gi, ngá é wuîhke hkyô bànshoq é yánmai gyùq chiq nyi ashî;
hkâsu mù gâ le, ngò mara a bo é lé Nàng hàp yù râ a nghut é hkyô lé, ngò sê lhê.
29 Ngá chyáng mara myàng gù za nghut bê le nhîng,
ngò gi, haî mù akôm má jân shirang nyì râ lhú?
30 Ngá gûng lé ngò gyo wîng èq chî pyám mù,
ngá lòq lé machyaq wîng èq chî pyám kôlhang,
31 Nàng gi, ngo lé ga-po nyhaq dong má dûn pyeq háng mù,
ngá é mèbu gi, ngo lé chaq pyám râ nghut lhê.
32 Ngò, Yhang eq taî htîng lhum râ dông,
târâ rûng má rahá chôm wàng râ matú, Yhang gi, ngò su xângzo byù a nghut.
33 Yhang eq ngá é gyoro má bo gyô tû wú mù,
bo xoq tui byi luî,
34 ngá chyáng mai Garai Gasâng é dumbáng lé wùp yu pyám byî é byù rû nyi é nghut le gi,
Yhâng é gyùq chiq hpo haû ngo lé wó kyuq râ a nghut.
35 Haú hkûn, ngò gi, Yhang lé a gyùq kyum é za dang nyô râ nghut lhê;
nghut kôlhang, ahkuî gi, ngò taí râ hkyô a dong nghut ri.