10
Ngò gi, ngá é chyungxê é yánmai ngíng byùq bê;haû mù, ngò hkâm zô é hkyô lé nyo htoq luî,
ngá i-myìt má hpu zô é hkyô lé taî htoq râ nghut lhê.
2 Ngò gi, Garai Gasang lé, ‘Ngo lé mara hkâhûn;
ngo lé haî mù htuqhtîng é hkyô lé taî kyo aq.
3 Nàng, ngo lé zing-rî é gi, htuk ri lhú?
Náng é lòqmú ngo lé chaq pyám mù,
agè ashop bang htung tô é hkyô má Nàng gabú é gi, htuk ri lhú?
4 Nàng gi, gùngsho myòqjí dàp lhê lhú?
Xângzo byù myang é su Nàng myang lhê lhú?
5 Náng é buìnyì pé gi, byu é buìnyì pé su nghut luî,
Náng é zànwut pé gi, wum bô su é zànwut pé su nghut mù,
6 ngo lé mara ho htoq luî,
ngá é yubàk mara lé gôn wú lhê lhú?
7 Gè gè ga jáng, Nàng gi, ngò mara a bo é eq Náng é lòq mai ngo lé ó yùq le a wó hkyi htoq yu é hkyô lé sê lhê.
8 Náng é lòq gi, ngo lé, azòng saí mù, hpan tô é nghut lhê;
nghut kôle, Nàng gi, ngo lé ahkuî taû lhoqhtên pyám râ lhú?
9 Nàng, tsohtung lé su ngo lé saî tô é lé myìtbun aq.
Nàng, ngo lé ahkuî hpuílhup taû dùt nhâng râ lhú?
10 Nàng gi, no-naú lé su ngo lé hut kat mù,
gyám byùq é no-naú lé su ngo lé htân nhang é a nghut lhí?
11 Nàng gi, ngo lé, sho-kuq eq sho wùt nghop to nhâng mù,
showui shogyi pê èq xoq kîng tô lhê a nghut lhí?
12 Nàng gi, ngo lé chyungxe byi mù, ru gîng nyi é chyitdàp myìt shit luî,
wú gôn lajâng nyi é yánmai, ngá é i-myìt sô wó gîng nyi é nghut lhê.
13 Nghut kôlhang, a-ô mâ é hkyô lé, Náng é i-myìt má yhûm to mù,
Nàng myìt é má kat tô é lé, ngò sê lhê.
14 Ngò mara kut shut é nghut jáng, Nàng, ngo lé châng wú xûm to mù,
ngá é mara lé dàm a byî é za Nàng a to râ nghut lhê.
15 Ngò gi, mara bo é nghut jáng, dingnyé wó ri!
Ngò gi, mara a bo le lháng, ngá é ulhum a wó tu ngháng nghut ri;
hkâsu mù gâ lé, ngò gi, hoq hpu hkyô byíng zan to mù,
wuîhke jamjau hpu zô nyi ri.
16 Ngò, ngá é ulhum lé tu myhâng jáng, Nàng gi, hkanghkyi su ngo lé châng hkat mù,
Náng é gyùq chiq maúhpo mó pê èq ngo lé htîm é nghut ri.
17 Nàng gi, ngo lé mara hun é sàksé asik pé shuî lé mù,
ngá é ahtoq má nhikmó je yo bê nghut ri;
Náng é gyè hpúng pé gi, ngo lé adàm dàm lé htîm akô nghut ri.
18 Haû su nghut jáng, Nàng, haî mù ngá nû é ûnghkaû mai ngo lé lhoqhtoq yu é lhú?
Ngo lé ó yùq le a myàng shi-má ngò shi byùq le ge râ wá.
19 Haú hkûn, ngò gi, a nyi wú é sû dùt mù,
ngá nû é ûnghkaû mai lùpdùng má wàq e é hui berâ nghut lhê!
20 Ngá é buìnyì pé gi, tot lhê, a nghut lhí?
Ngò gi, razùp zo wó gabú yû sháng gàq, Nàng, ngá chyáng mai byam lhing huî byùq àq.
21 Ngò gi, a wó dum taû lo é jang shut a ló shi-má,
tîng tîng nòq é eq mauchut tuq dùt é mau má a ló shi-má,
22 maubó lháng tîng tîng nòq é jáng nghut é,
hai hûháng le a sê é eq tuq tuq chut é,
myín gùnggàm nghut é mau má a ló shi-má, ngá chyáng mai byam lhing huî byùq àq.’ nghû taí râ é nghut lhê.” gâ ri.