Zohpara
11
Haú hkûn, Namat byù Zohpara tû taî é gi,2 “Shî myhô é dang lé a tû taî é za ge tô to râ lhú?
Dang myo shô myo sû shí yùq gi, mara mai wó lùt lhê lhú?
3 Akôm má nàng gyáng é dang gi, góyùq lé zim za wó nyî nhâng râ lhú?
Nàng rhoî dang taî é hkûn, nang lé a tân é byù a nyì râ lhú?
4 Nàng gi, Garai Gasang lé, ‘Ngò lùmjíng é hkyô gi, tengmán lhê;
ngò gi, Náng é hí má sansêng lhê.’ ga taí bê nghut ri.
5 Nghut kôlhang, Garai Gasang dang nyô sháng gàq ô!
Nàng eq séng luî, Yhâng é nhuthkum hpóng sháng gàq ô!
6 Nang lé, zaú tô é hpàqchyî byéng-yá hkyô pé hpông shit sháng gàq;
hkâsu mù gâ le, tengmán é hpàqchyî byéng-yá hkyô gi, nìk é nghut lhê.
Garai Gasang gi, náng é yubàk mara ra-am lé tô-myhî pyám byi bê nghut é lé, nàng sê to aq.
7 Nàng gi, Garai Gasâng é nìk é hkyô lé wó gôn htoq râ lhú?
Nàng gi, Wum-o a-tsam dìk shoq bò Sû eq sêng é awang mai ahpyo hpyot lé wó sé râ lhú?
8 Haú pé gi, mauhkûng htoq myhang é nghut mù, nàng haî wó kut râ lhú?
Haú pé gi, mosumhkung htoq nìk é nghut mù, nàng haî wó sé râ lhú?
9 Haú pê é laké gi, myìdàm htoq hîng mù,
wuìshuq lung-aû htoq lam ri.
10 Yhang gi, laî ló mù, nang lé hkang zing to luî,
târâ hpyit râ matú ji tsîng é nghut jáng, Yhang lé ó yùq wó htuqhtíng râ lhú?
11 Yhang gi, ó yùq mhaû é lé hkyak sê lhê;
Yhang gi, agè ashop hkyô lé myàng jáng, haî su a ngàm kut pyâm ri lhú?
12 Nghut kôlhang, ngha é byù gi, yòsô loze, byù su dùt é hkûn shèq,
hpàqchyî wó bô râ nghut lhê.
13 Nghut kôle, nàng gi, náng é i-myìt nhiklhum mai Yhang lé àp nhông mù,
Yhâng shut náng é lòq lhâm é nghut jáng le,
14 náng é lòq mâ é yubàk mara lé tô pyám mù,
náng é zúm má agè ashop hkyô lé a jòq nhang é nghut jáng le,
15 shut é hkyô a bo é za, náng é myòqdong wó tu toq mù,
gyùq myìt a bo é za, wó yàp gîng to râ nghut lhê.
16 Nàng gi, nàng hui zô é wuîhke jamjau hkyô lé hkyak tô-myhî pyám râ nghut mù,
haú lé, wuì yui laî ló byùq é su za ngam pyám râ nghut lhê.
17 Náng é chyungxe gi, nyí-káng htoq je dùq bàng mù,
mauchut gi, nàpsûn su sân byùq râ nghut lhê.
18 Nàng gi, myìt myòqbyù hkyô jòq é yánmai, gau shoq myang nyì râ nghut mù,
náng é hkyô lé byu wú luî, ngón za wó bánno râ nghut lhê.
19 Nàng yhup tô é hkûn, ó yùq le nang lé wó kyuq râ a nghut;
byù myo myo gi, náng é myòqdong lé hô kôrâ nghut lhê.
20 Nghut kôlhang, agè ashop bâng é myòq wum gi, yom byùq râ nghut mù,
hká shut le ge hpâng kôrâ a nghut;
yhángmòq é myòqbyù hkyô gi, soq htum hkyô dùt râ nghut lhê.” gâ ri.