Yobaq
12
Haú hkûn, Yobaq tû taî é gi,2 “Gè gè yhang, núngmòq gi, byù za ru nghut mù,
hpàqchyî byéng-yá le, núngmòq eq rahá shi byùq râ nghut lhê!
3 Nghut kôlhang, ngò le, núngmòq eq rajung za hpàqchyî bo é nghut mù,
núngmòq htoq gyàmgyì gyó é sû a nghut.
Shí hkyô pé bànshoq lé a sê é gi, ó yùq wá nyi lhê lhú?
4 Ngò gi, Garai Gasang lé wùt dung jáng, Yhang, ngo lé gyo byi kôle,
ngá é luzúm wui hí má wuìzuì kut jowò dùt pyám bê nghut ri;
ngò gi, díngmán é eq mara hûn jang a bo é nghut kôlhang, wuìzuì kut jowò dùt pyám bu-nhung!
5 Nyì ngón yùqyo é bang gi, ihkyùp hui zo sû lé wú tiq pyâm akô;
haû gi, hkyî nâng chot bâng é matú hen to byi gû nghut lhê.
6 Da-myàq pê é zúm pé gi, ngón za ru joq nyî mù,
Garai Gasang lé nhikjum lhoqyô é bang gi, gau za nyi tô ri;
Garai Gasang gi, yhángmòq lé Yhâng é lòq má nyì ngón yùqyò nhang ri.
7 Nghut kôlhang, gaunyhaû pé lé myî wú aq; haú bang nang lé mhoq byi râ nghut lhê;
maulat nghoqzô pé lé myî wú aq; haú bang nang lé taî kyo râ nghut lhê.
8 Myìdàm htoq lé dang nyô aq; haû gi, nang lé mhoq byi râ nghut lhê;
wuìshuq lung-aû mâ é ngozo gi, nang lé sang kyo sháng gàq.
9 Haú pé bànshoq lé, haû Yhûmsîng Garaî é lòq èq saî é hkyô lé a sê é,
ó yùq wá nyì râ lhú?
10 Kângsoq dui é jung hkangmó é chyungxe gi, Yhâng é lòq má nghut mù,
xângzo byu é kângsoq gi, Yhâng èq byî tô é nghut ri.
11 Shô gi, zoshuq lé chyam wú é su,
nohkyap gi, dang pé lé shang pyâm é nghut lhê, a nghut lhí?
12 Chyungxe zànwut ko bê bang gi, hpàqchyî bo lhê, a nghut lhí?
Chyungxe hing é bang gi, sê gyô é u-nuq bo lhê, a nghut lhí?
13 Garai Gasâng chyáng gi, hpàqchyî byéng-yá eq hpungwup a-tsam bo ri;
Yhâng gi, hpàqchyî htoq hkyô eq sê gyô é u-nuq byíng tô ri.
14 Yhang hpyoq hpyi pyám bê lé gi, dum wó saî saî é a nghut;
Yhang htóng lhûng to bê bang lé gi, dum wó ge lhut kat é a nghut.
15 Yhang gi, wuì lé a yuì nhang é nghut jáng, haû kân byùq râ nghut lhê;
Yhang gi, wuì lé hpông kat é nghut jáng, myigùng lé yui nghop pyám râ nghut lhê.
16 Yhâng chyáng gi, wum-o a-tsam eq nìk nìk sê é hpàqchyî byíng tô ri;
mhaú zô é hui sû eq mhaú zo sû le, Yhâng é lòq má nghut nyi ri.
17 Yhang gi, zaugun sûwún wuî lé achîn chyup shuî ló mù,
târâ agyi pé lé ngha byùq nhang ri.
18 Yhang gi, hkóhkam pê èq hut tô é kyum pé lé hkyut pyám byi mù,
yhángmòq é hpyidum má hpyihit hit to byî ri.
19 Yhang gi, hkyangjông pé lé achîn chyup shuî ló mù,
gingtîng nyì bê nghut é zaugun wuì lé tu mhuq pyâm ri.
20 Yhang gi, lùm gíng é hpàqchyî byi bâng é nhut lé lhoqzîm pyám byi mù,
sûwún wui é sê gyô é u-nuq lé yu pyám byî é nghut ri.
21 Yhang gi, hkúngga gíng é bang lé hoq hpu nhâng mù,
wum-o bò bâng é wum-o lé lhoqyom pyám byî ri.
22 Yhang gi, mauchut mâ é nìk é zè pé lé lhoqhtoq shit mù,
tîng tîng nòq é mauchut lé maubó nhang é nghut ri.
23 Yhang gi, byù myû wuì lé lhoqko mù, yhángmòq lé dum lhoqhtên pyâm ri;
Yhang gi, mîngdán pé lé lhoqlâm byi mù, haú pé lé dum lú yu ló pyám nhang ri.
24 Yhang gi, myìdàm htoq mâ é ushuq pê é sê gyô é u-nuq lé yu pyám byi mù,
hkyô le a dông é chamchyuîyuì dùt é jowò má yhángmòq lé yông wún nhang ri.
25 Yhángmòq gi, myòq le a myang é mauchut hkaû má sop sô akô;
Yhang gi, yhángmòq lé, î shuq wùt bang su a-pyî abàt só nhang ri.