13
Haú pé bànshoq lé ngá é myòq èq myàng luî,ngá é nohkyap èq wó gyo mù, sê gyo bê ô!
2 Núngmòq sê é hkyô lé, ngo le sê lhê;
ngò gi, núngmòq htoq gyàmgyì gyó é sû a nghut.
3 Nghut kôlhang, ngò gi, Wum-o a-tsam dìk shoq bò Sû lé dang nyô naù mù,
Garai Gasang eq ngá é hkyô lé dangnyhin nyhîn lhum nau ri.
4 Nghut kôlhang, núngmòq gi, mhaû é dang baú nyo htoq mù,
a-kyû a htoq é chi sará pé chyat nghut akô.
5 Núngmòq zim za chôm nyi to kô é ru nghut le gi,
hpàqchyî bò bang su dùt bùm kôrâ nghut lhê wá!
6 Ngò dangnyhin nyhîn é dang lé ahkuî gyo keq;
ngò taî hpyi kyô é hkyô lé rago gyô yù keq.
7 Núngmòq gi, Garai Gasâng é gùnglik dông agè ashop é dang taí kôrâ lhú?
Núngmòq gi, Yhâng é gùnglik dông mhaú dang taí kôrâ lhú?
8 Núngmòq gi, Yhang lé myòqdong hkyin é hkyô kut shit kôrâ lhú?
Núngmòq gi, Garai Gasâng é gùnglik dông múzó haú lé dangnyhin nyhin kôrâ lhú?
9 Yhang, núngmòq lé jep gôn wú le, ge é hkyô myàng râ lhú?
Xângzo byù lé wó mhaû é su, Yhang lé wó mhaú kôrâ lhú?
10 Myòqdong hkyin é hkyô lé, núngmòq haq tûn shit kô é nghut jáng,
Yhang gi, núngmòq lé hkyak yhang tan râ nghut lhê.
11 Yhâng é hkìkhkâm hkyô lé, núngmòq gyùq chiq râ lhê, a nghut kó lhí?
Yhâng é gyùq hpo mó, núngmòq chyáng jé râ nghut lhê, a nghut kó lhí?
12 Núngmòq é sânghkyang pé gi, a-kyû a bo é myiwap baú nghut mù,
núngmòq é gòlong gi, tsohtung long za nghut ri.
13 Zim za nyì keq; ngò baú taí bá;
ngá chyáng haî dut le dùt sháng gàq.
14 Ngò gi, haî mù, ngá gûng ngò ngàt tân to luî,
yhûmsing chyungxe lé lòq má myhik zing to râ lhú?
15 Yhang, ngo lé sat pyám jáng, ngò myòqbyù jang haî jòq lo râ a nghut;
nghut kôlhang, ngò gi, Yhâng é myòq hí má ngá é hkyô lé hkyak taî hûng râ nghut lhê.
16 Haû gi, ngá é hkyi yù hkyô dùt râ nghut lhê;
hkâsu mù gâ le, agè ashop é sû gi, Yhâng é hí má wám ê râ a nghut!
17 Ngò taî é dang lé rago gyô yù keq;
ngá é dang pé gi, núngmòq é no má wàng sháng gàq.
18 Ahkuî, ngò gi, ngá chyáng htoq é mû lé hen lajâng to bê nghut mù,
ngá chyáng mara a bò râ nghut é lé, ngò sê lhê.
19 Ngo lé mara wó hun é byù nyì râ lhú?
Nyì jáng, ngò gi, zim za nyì mù, shi byùq râ nghut lhê.
20 Garai Gasang ê, ngo lé í hkat za gyo byi laq;
haû jáng, ngò gi, Náng chyáng mai a haq byùq râ nghut lhê.
21 Haû gi, ngá chyáng mai Náng é lòq lé we we shut wùp yu pyám mù,
Náng é gyùq chiq hpô èq ngo lé hkâ-kyuq nyî lo.
22 Haú hkûn, Nàng, ngo lé wùt jáng, ngò tu râ nghut lhê;
haû a nghut jáng, Nàng, ngo lé hí taí nhâng mù, Nàng, ngo lé tû taí aq.
23 Ngò lhoqshut é eq mara kut shut é hkyô gi, hkâ-myhó wá nghut ri lhú?
Ngò lu laî é hkyô eq ngá é mara lé tûn shit àq.
24 Haî mù, Náng é myòqdong haq pyám luî,
ngo lé, Náng é gyè dông sôn yu pyâm lhê lhú?
25 Nàng gi, lai èq mùt nhûn é sikhaq lé hpu zo nhâng râ lhú?
Kyuq huî byùq bê é hpuichyap lé châng hkat râ lhú?
26 Hkâsu mù gâ le, Nàng gi, ngá chyáng myìt no é hkyô pé lé kâ to mù,
ngá é zorâm hkun lhê é yubàk mara dam lé shû yù nhâng bê nghut ri.
27 Nàng gi, ngá é hkyî má kyum hut to mù,
ngò sô é hkyô bànshoq lé rago châng wú gon luî,
ngá é hkyîwa a wó duî râ matú masàt hkô tông to byi bê nghut ri.
28 Haû mù, byù gi, bùp yeq byùq bê é zè pé su le,
manòt èq zô pyám bê é mèbu su le, htûm ló byùq bê nghut ri.