14
Myiwe mai hku é waxâng zo wuî gi,chyungxe tot é eq wuîhke jamjau byíng zan tô é nghut ri.
2 Yhángmòq gi, banbó su bó lô mù, shum gyó byùq luî,
buìshûm su laî ló byùq mù, a gingtíng nghut ri.
3 Nàng gi, yhángmòq lé wú tsuq to mù,
târâ jéyáng râ matú, Náng é hí má yhángmòq lé shuî jé râ, a nghut lhí?
4 Ó Yùq wá, a sansêng é zè mai sansêng é zè wó lhoqhtoq shit lhê lhú?
Ó yùq le a nyì!
5 Byu é chyungxe lé gi, tû to byi bê nghut mù,
Nàng gi, yhángmòq é lhôhkyap lé nghap to luî,
yhang a wó laî byìt shoq kê hpyit to byi bê nghut ri.
6 Yhángmòq gi, langchyáng hpó rayùq su, yhángmòq é ahkyíng lé ngón za wó lhoqlhai shoq, Nàng gi,
yhángmòq lé a wú lo kut mù, yhángmòq lé baú nyhi pyâm to aq.
7 Sikgam é matú kúm myòqbyù jang jòq ri;
haû gi, htuq pyâm é hui kôlhang, dum nyún lô râ nghut mù,
a-nyùq gi, ru jâng nyún nyî râ nghut lhê.
8 Sikmyìt gi, myigùng má mâng wôm byùq mù,
hau é a-ngùt gi, myi-tse má shi byùq kôle,
9 wuì soq wó hkam é yánmai, abu zuí htoq lô mù,
asik hô é agàm su a-nyùq nyún lô râ nghut lhê.
10 Nghut kôlhang, byù gi, shi byùq jáng, a-tsam htûm byùq ri;
byù gi, kângsoq byìt jáng, a ge myàng lo nghut ri.
11 Nhông mâ é wuì yom ló byùq mù,
wuìlàng mâ é wuì kan mù, kyuq huî ló byùq é su,
12 byù gi, yhup nân ló byùq luî, a toq lô lo nghut ri;
mauhkûng byùq ló byùq é hkûn jé shoq, yhang gi, a bûn lò lo nghut é htoq agó,
yhup é mai a toq lô lo nghut ri.
13 Nàng gi, ngo lé mosumhkung má haq to luî,
Nàng nhikjum yô é byùq ló byùq shoq, ngo lé haq nghop to aq ô!
Hau htâng, ngo lé bun râ matú, ahkyíng tô to aq ô!
14 Byù rayùq shi ló byùq jáng, wó dum dui toq râ nghut lhê lhú?
Ngò gi, ngò dójaú shi-kùt é buìnyì bànshoq má,
ngò wó lùt râ buìnyì lé láng nyî râ nghut lhê.
15 Nàng gi, ngo lé wùt râ nghut mù, ngò gi, Nang lé tu râ nghut lhê;
Nàng gi, Náng lòq èq hpan tô é pé lé myìt tuî nyì râ nghut lhê.
16 Haû mù, Nàng gi, gè gè yhang, ngá é hkyîbyè lé nghap to râ nghut kôlhang,
ngá é mara lé xûm to râ a nghut.
17 Ngò kut shut laî é mara pé lé, Náng é e-tap hkaû má myhî lhûng pyám mù,
ngá é yubàk mara lé, Nàng nghop pyám byi râ nghut lhê.
18 Nghut kôlhang, bùm gi, byòq mù byùq byùq é su le,
lùqmó zîng gi, yhâng é jowò mai lhoqhtòt pyám huî é su le,
19 wuì gi, lùqgòk pé lé hkyut ló é eq,
wuìgyùn gi, myi-tse pé lé ûm ló byùq é su le,
Nàng gi, byu é myòqbyù hkyô lé lhoqhtên pyám byi bê nghut ri.
20 Nàng gi, byù lé ayang ùp zìk pyâm é nghut luî, byù gi, byùq ló byùq bê nghut ri;
Nàng gi, byu é myòqdong isâm lé htaî pyám byi luî, byù lé nhang htoq pyám bê nghut ri.
21 Yhâng é zodù wuì xânghpoq nge wó kôlhang, yhang a sé nghut ri;
yhâng é awùt ashín pé lhoqnyhum pyâm é hui kôlhang, yhang a myàng nghut ri.
22 Yhang gi, yhâng é gùng má hkê-nho é za sê gyo luî,
yhâng gùng yhâng é matú za myìt nò-kying kyîng nyi ri.” gâ ri.