Elihpaza
15
Haú hkûn, Teman byù Elihpaza tû taî é gi,2 “Hpàqchyî bò sû rayùq gi, dang laì mùt myhîng é dông ge tû taí râ lhú?
Yhûmsing é wam lé buìhtoq laì nyé ge lhoqpyíng râ lhú?
3 Dangsôm pé dông nghut nghut,
a-kyû a bo é dang pé mai nghut nghut,
dangnyhin ge nyhîn lhum râ lhú?
4 Nghut kôlhang, nàng gi, gyùq hkúngga hkyô lé lhoqhtên pyám mù,
Garai Gasang lé myìt lhîng hkyùq wú é hkyô lé hkûm zing pyám bê nghut ri.
5 Náng é yubàk mara lé gi, náng é nhut mai lhoqhtoq shit bê nghut mù,
nàng gi, mhaú su é shô lé lhoqtap yû bê nghut ri.
6 Ngò, nang lé mara byî é a nghut; náng é nhut shèq byî é ru nghut ri;
náng é nhutwuî shèq, nang lé mara hun é ru nghut ri.
7 Nàng gi, sânghi hku lé é sû nghut lhê lhú?
Nàng gi, bùm pé a jòq shi-má nyi é sû nghut lhê lhú?
8 Nàng gi, Garai Gasang byî é hpàqchyî dang lé gyô wú bê lhú?
Nàng baú za, hpàqchyî byéng-yá bànshoq lé wó sing yu é su ngam lhê lhú?
9 Ngá-mòq a sê é, nàng haî sê lhê lhú?
Ngá-mòq a wó é nìk é hpàqchyî, nàng haî wó lhê lhú?
10 Uhpyû zuì nè mù, náng wâ htoq mâng é bang gi,
ngá-mòq é hkyam shut nghut nyi ri.
11 Garai Gasang nhiktíng byî é eq dang ngón nyo é gi,
náng é matú a lùq shi lhú?
12-13 Náng é sô gi, Garai Gasang lé htuqhtíng mù,
shî sû é dang pé náng é nhut mai bùt shun htoq lô shoq,
náng é i-myìt gi, haî mù nang lé shuî nghoq ló luî,
náng é myòqjí gi, haî mù nhikjum yô é dông ne lhê lhú?
14 Waxâng zo gi, haî wá nghut mù, ge wó chyoiyúng râ lhú?
Myiwe mai hku lé lo é bang gi, hkâsu kut díngmán bang wó dùt kôrâ lhú?
15 Garai Gasang gi, Yhâng é chyoiyúng bang lé a lùmjíng kut mù,
mauhkûng lháng, Yhâng é myòq hí má a sansêng é nghut jáng,
16 achaq achyut hkyô má htên byòq lúng to luî,
agè ashop hkyô lé wuì su shuq é bang lé gi, je riyhang a lùmjíng râ nghut lhê mhaî!
17 Ngá dang lé gyo aq; ngò, nang lé taî sân kyo râ nghut lhê;
ngò myàng bê hkyô, nang lé taî kyo bá;
18 haû gi, îchyí îwâ pé mai haî le a nghop tô é za taî é lé,
wó hàp yu é hpàqchyî bò bang taî sân kyô é hkyô nghut lhê.
19 (Îchyí îwa haú bang lé za maumyî haû byî tô é nghut mù,
byù bíng pé ó yùq le yhángmòq chyáng a sô lai kó nghut ri.)
20 Agè ashop sû gi, yhâng é i-pyàt buìnyì bànshoq wuîhke jamjau hpu zô nyi ri;
byù jum hpó le, yhâng é matú tû to byî é zànwut bànshoq má haú dông dùt nyi ri.
21 Gyùq hpo mó htê gi, yhâng é nohkyap má mying ûm nyi ri;
yhang nyì ngón yùqyo nyì bûn é hkûn, lhoqhten lhoqhpyoq sû gi, yhang lé htîm ri.
22 Mauchut tuq dùt jang mai wó lùt râ myòqbyù jowò yhâng chyáng a jòq nghut ri;
shâm gi, yhang lé láng nyi ri.
23 Yhang gi, ‘Zoshuq hká má lhú?’ ga ho lhing yông wún ri;
mauchut tuq dùt é buìnyì chyáng bê nghut é lé, yhang sê ri.
24 Myìt myo ûng wom hkyô eq dìk shoq hpu zo hkyô gi, yhang lé kyuq ngha tô ri;
haú pé gi, gyè toq râ matú rì rì kut tô é hkóhkâm hpó su, yhang lé ung pyâm nyì bê nghut ri.
25 Hkâsu mù gâ le, yhang gi, Garai Gasang lé lòqtsup èq htim mù,
Wum-o a-tsam dìk shoq bò Su é hí má gyáng dang taî é nghut ri.
26 Yhang gi, htû mù htan é gòlong chûng luî, a gyùq a kyûm Yhâng chyáng htîm wang e ri.
27 Yhâng é myòqdong gi, xu tôn to luî,
yhâng é hpyidum sho gi, htu daû to kôlhang,
28 yhang gi, htên byòq byùq bê wà pé má nyì mù,
byù a lúng lô é, yhôn ló bê é yhûm a-pyâng pé má lúng râ nghut lhê.
29 Yhang gi, sùtzè wó râ a nghut lo;
yhâng é sùtzè gi, wó gîng to râ a nghut lo;
yháng sing é zè pé gi, myìdàm htoq má wó byo jàm râ a nghut lo.
30 Yhang gi, mauchut mai wó hpang lùt râ a nghut;
myishâm gi, yhâng é a-nyùq pé lé mhik nyhuî pyám râ nghut mù,
Garai Gasâng é nhut soq mai, yhang byùq byùq râ nghut lhê.
31 Yhang gi, a-kyû a bo é lé lùmhkau é dông, yhânggùng yhang a mhaû pyám sháng gàq;
hkâsu mù gâ le, yhang gi, haî le myang yù râ a nghut.
32 Yhâng é ahkyíng a jé shi-má nyhuî byùq râ nghut mù,
yhâng é akoq pé gi, tut yúng râ a nghut lo.
33 Yhang gi, a myhíng shî é tsibyiq yòq gyó byùq é tsibyiq gâm su dùt mù,
achyu pé yòq gyó byùq é tsanlun gàm su dùt byùq râ nghut lhê.
34 Hkâsu mù gâ le, Garai a bo é byù hpúng gi, baùdung dung râ nghut mù,
lòqhkaû lang zè lé chyitdàp bâng é yhûm pé gi, myi nyé byùq râ nghut lhê.
35 Yhángmòq gi, wuîhke jamjau lé zogûng dông wùn mù, agè ashop hkyô lé hku kat kôrâ nghut lhê;
yhángmòq é ûnghkaû má gi, mhaú zô é hkyô da kôrâ nghut lhê.” gâ ri.