Yobaq
16
Haú hkûn, Yobaq tû taî é gi,2 “Ngò gi, haû sû é dang pé myo myo lé wó gyô wú bê nghut lhê;
núngmòq bànshoq bang gi, myìt myo ûng wom hkyô byî é nhiktíng bang chyat nghut akô nhung!
3 Núngmòq laì mut é dang a dàt nolo kó lhí?
Nang lé hai èq dangnyhin nyhín nhang nyi lhê lhú?
4 Ngò hui zô é su, nàng le hui zô nyi é ru nghut le gi,
ngò le, nàng su nghû wó taí râ nghut lhê;
ngò le, nang lé záng é dang pé wó taí tso mù,
nang lé ulhîng wó he pyám râ nghut lhê.
5 Nghut kôlhang, ngá é nhut gi, nang lé myìt wum lhoqkíng byi mù,
nàng nyì ngón yùqyò râ matú, ngá é nhutwuî mai nang lé nhiktíng byi râ nghut lhê.
6 Ngò nyò kôlhang, ngò no hpû é hkyô ge byùq é a nghut;
a taî é za nyi le le, byùq ló byùq é a nghut.
7 Garai Gasang ê, Nàng gi, gè gè yhang, ngo lé ngú myûng byùq nhâng mù,
ngá é buìnùm luzúm wuî lé, ngò eq wê gâng lhum nhâng bê nghut ri.
8 Nàng, ngo lé zuî zing pyâm é gi, ngo lé mara hûn sàksé nghut bê;
ngò showui gyòng dùt é hkyô gi, toq mù, ngo lé mara hûn sàksé kut bê nghut ri.
9 Garai Gasang gi, nhikjum yô é mai ngo lé kyaq zui luî, lâng myha pyám bê nghut mù,
ngá yánmai nhut ngàt kyáng bê nghut ri;
ngá é gyè hpó gi, ngo lé wú tsuq to bê nghut ri.
10 Byu pé gi, nhut há mù, ngo lé rhoî kôluî,
ngá bowâm má pyuq byî é dông ngo lé hoq lhoqhpu byi luî,
ngo lé htim râ matú chôm zîng akô nghut ri.
11 Garai Gasang gi, ngo lé, târâ a chûng bâng chyáng àp byi mù,
agè ashop bâng é lòqhkaû má dú hâng kat bê nghut ri.
12 Yhang gi, ngò nguì ngón yùqyo nyi é hkûn, ngo lé lhoqhkyuî pyám mù,
ngá é lìngzing mai kyaq zui luî, ngo lé lhoqhkyop pyám bê nghut ri.
Yhang gi, ngo lé, Yhang wing díng é jowò kut pyám bê nghut ri;
13 Yhâng é lai bik bang gi, ngá é lhînghkyùq má nyi tô bum akô.
Yhang gi, shogyo myìt a bo é za, ngá é jínlhum lé htaû ròt mù,
singkyî lé myigùng má lhoqshun hkyó bê nghut ri.
14 Yhang gi, ngo lé adàm dàm lhoqcheq byi mù,
sarhê hpó su ngo lé din htîm ri.
15 Ngò gi, ngá é sho-kuq má jimê hkyup nghop luî,
ngá é wum-o nghut é hkyuî lé hpuílhup yô má myhup pyám bê nghut lhê.
16 Ngá é myòqdong gi, ngaù luî ne byùq mù,
ngá é myòqkuq mê byùq bê nghut ri;
17 Nghut kôlhang, ngá é lòq gi, agè ashop é hkyô a záng é nghut mù,
ngá é kyûdung dang gi, sansêng é nghut lhê.
18 Myìdàm htoq ê, ngá é sui lé hkâ-nghop pyám byi;
ngá é ngaùhkyûng ngaùyang htê lé hkâ-no nhâng!
19 Ahkuî lháng, ngá é sàksé gi, mauhkûng má nghut mù,
ngo lé taî hûng byi sû gi, myhang é jáng má nghut nyi ri.
20 Ngá é luzúm wuî gi, ngo lé rhoî dang taî akô;
ngò gi, Garai Gasâng é hí má ngaùbyi htoq nyi é nghut lhê.
21 Byù rayùq gi, yhâng é luzúm é matú dûng tôngbán é su,
ngá é matú, Garai Gasang lé dûng tôngbán sháng gàq.
22 Ngò gi, zànwut a myáng má,
wó dum taû lò râ a nghut é hkyô shut châng e ló râ nghut lhê.