17
Ngá é sô gi, jôm ló nyi ri;ngá é i-pyàt gi, htûm ló nyi ri;
lùpdùng gi, ngo lé láng tô ri.
2 Gè gè yhang, rhoî dang taî é bang gi, ngá é lhînghkyùq má nyi tô bùm kô é nghut mù,
ngá é myòqjí gi, yhángmòq nhikjum lhoqyô nyi é lé wú tsuq nyî râ nghut lhê.
3 Garai Gasang ê, ngá é matú bo taî hung é dông dakâm byi laq.
Ngò jô é hkyô lé, ó yùq dakâm lòqpyuq bàt byi râ lhú?
4 Nàng gi, yhángmòq sê gyo râ u-nuq lé myhî pyám byi bê nghut mù,
yhángmòq lé ûngmyuq hkyô wó nhâng râ a nghut.
5 Rayùq yùq, sùtzè wó râ matú yhûmsing é luzúm wuî lé àp pyâm é nghut jáng,
yhâng é zodù wuì gi, myòqbyù jang a jòq kôrâ nghut lhê.
6 Garai Gasang gi, ngo lé, yùq hkangmó èq gya dang taî kún hpo kut pyám luî,
byu pê èq myòqdong má sôkan byé gyûn é hui sû dùt nhâng bê nghut ri.
7 Ngá é myòqjí gi, iyon yon luî, myhám myhám dùt byùq bê nghut ri;
ngá é gùnghkyâng gi, wùpzo su za nghut nyi ri.
8 Haû mù, i-myìt díng bang gi, shí hkyô lé maú ngha byùq kômù,
mara a bo é bang gi, Garai a nyi é bang lé htuqhtíng râ myìt toq bum akô nghut ri.
9 Nghut kôlhang, díngmán sû gi, yhûmsing é hkyô lé xoq châng nyì râ nghut mù,
lòq sansêng é bang gi, wum-o je bo jàt râ nghut lhê.
10 Núngmòq bànshoq bang kúm gi, lé dum lhing taî wú keq!
Núngmòq chyáng hpàqchyî bo é byù rayùq le, ngò myàng râ a nghut.
11 Ngá é buìnyì pé gi, laî ló byùq bê nghut ri;
ngò htung tô é hkyô pé eq
ngò ô nau é hkyô pé gi, htên byùq bê nghut ri.
12 Yhángmòq gi, myín lé nyí kut bekô nghut ri;
mauchut shut maubó chyâng lo nyì bê nghut ri.
13 Ngò myòqbyu é yhûm gi, lùpdùng za nghut mù,
mauchut mau má ngá é hpyang lé hkang luî,
14 haû htên byòq hkyô lé, ‘Nàng gi, ngá wa nghut ri.’ nghû taí mù,
lùq lé, ‘Ngá nu ê, ngá nhammó ê!’ nghû taî é nghut jáng,
15 ngá é myòqbyù jowò gi, hká má lhú?
Ngá é matú myòqbyù hkyô lé ó yùq wó myâng râ lhú?
16 Haû gi, mosumhkûng é hkum pé má jé gyó ló râ lhú?
Ngá-nhúng gi, hpuílhup yô má bánnô byùq râ lhú?” gâ ri.