Hkya-on Mahkôn Dang
95
Lé keq, Yhûmsîng Garai lé,gabú hkya-on mahkôn hkôn sháng;
ngá-nhûng é hkyi yù hkyô nghut é
Lungmó Zîng lé,
htê mó èq gabú garu sháng.
2 Jeju bûn é myìt mai Yhâng hí má jé lé mù,
hkya-on jidang mai,
Yhang lé gabú wàq toq sháng.
3 Hkâsu mù gâ le, Yhûmsîng Garai gi,
Garai Gasang mó nghut luî,
garaî pé bànshoq htoq mâ é,
Hkóhkâm mó nghut ri.
4 Myìdàm htoq mâ é nìk é jowò pé gi,
Yhâng é lòq má nghut mù,
bùm nyuq pé gi,
Yhang eq sêng é nghut ri.
5 Wuimau gi, Yhang hpan é nghut mù,
Yhâng é nghut ri;
kyuq huî é myigùng lé gi,
Yhâng é lòq èq saî é nghut ri.
6 Lé keq, ngá-nhúng lé hpân Sû,
haû Yhûmsîng Garaî é hí má,
hkyîhput htuqlùq mù, noqkuq sháng;
lé keq, ngóm gòp luî,
Yhang lé noqkuq sháng.
7 Hkâsu mù gâ le, Yhang gi,
ngá-nhûng é Garai Gasang nghut luî,
ngá-nhúng gi, Yhâng é no‑mhan yò mâ é,
byu pé nghut mù, Yhang wú mâgum é
sau hpúng nghut lhê.
Hkû-nyí, núngmòq,
Yhâng é htê lé wó gyô é nghut jáng,
8 Meriba jowò má,
núngmòq é îchyí îwâ pé kut kô é su le,
yòso mâ é Masa jowò má,
yhángmòq kut kô é su le,
núngmòq é i‑myìt lé hkâ lhoqhtan to kó.
9 Núngmòq é îchyí îwâ pé gi,
Ngò kut é múzó lé myàng kô é nghut kôlhang,
jowò haú má Ngò lé chyam wú lìk wú akô nghut ri.
10 Ngò gi, i-pyàt haú mâ é bang lé,
myi xê zàn yhang nhikjum yo mù,
“Yhángmòq é i‑myìt nhiklhum gi,
hkâ-nhám le hkyô nghoq byùq akô;
yhángmòq gi, Ngá é hkyô pé lé, a sé kômù nghut ri.”
nghû taî é nghut lhê.
11 Haû mù, Ngò gi,
“Ngá é bánno jowò má yhángmòq hkâ-nhám le
wó wâng kôrâ a nghut.” nghû,
nhikjum yo luî, dakâm dang taî é nghut lhê.