Lhúnglhâng Bang Lé Târâ Jéyáng É Garai Gasang
94
Lató hpuq é Garai Gasang,haû Yhûmsîng Garai ê,
lató hpuq é Garai Gasang ê,
dùq bó shit àq.
2 Myìdàm lé târâ jéyáng é Sû ê,
toq mù, nghutbûn é bang lé,
yhángmòq hpuzo gíng é í,
taû kut byi aq.
3 Yhûmsîng Garai ê,
agè ashop é bang gi,
hkâ-myháng jé shoq,
hkâ-myháng jé shoq yhang,
hkye gabú nyî kôrâ lhú?
4 Yhángmòq gi, gyáng dang taî nyi bum akô;
agè ashop hkyô kut é bang bànshoq gi,
nghutbun dang taî bum akô nghut ri.
5 Yhûmsîng Garai ê, yhángmòq gi,
Náng é byu pé lé, zing-ri kômù,
Náng é silî wunlî pé lé,
zìk zô akô nghut ri.
6 Yhángmòq gi, chuimó pé eq,
mau we bíng lé sat pyám kômù,
chuízô pé lé le sat pyâm akô nghut ri.
7 “Yhûmsîng Garai gi, a myàng;
Yakup pê é Garai Gasang gi, a gyo byi.” ga
yhángmòq taî bum akô nghut ri.
8 Byu pê chyáng mâ é ngòk bang ê,
gyo keq;
byù bâm pé ê, hkâ-nhám shèq
hpàqchyî bò kôrâ lhú?
9 Nohkyap tap byi sû gi,
a wó gyô é nghut lhê lhú?
Myòqjí hpân byi su gi,
a byu myàng é nghut lhê lhú?
10 Byù myû wuì lé mhoqshit é sû gi,
dam a byî é nghut lhê lhú?
byù lé mhoq byi sû gi,
hpàqchyî langhpyùt é nghut lhê lhú?
11 Yhûmsîng Garai gi,
byù myìt é hkyô lé sé mù,
haú pé akôm nghut é lé sê nyi ri.
12 Yhûmsîng Garai ê,
Nang èq mhoqshit é hui luî,
Náng é târâ lé,
Nang èq mhoq byî é hui sû gi,
hkungsô wó nyi ri;
13 Nàng gi, agè ashop bâng é matú,
donghkong dû pân é hkûn jé shoq,
haú yùq lé, wuîhke huî é buìnyì mai,
lhoqlhut yu é nghut ri.
14 Hkâsu mù gâ le, Yhûmsîng Garai gi,
Yhâng é byu pé lé a he-ngìk pyám;
Yhang gi, Yhâng é silî wunlî lé,
hkâ-nhám le kâng pyám râ a nghut.
15 Târâ jéyáng jang má,
díngmán hkyô dum myàng râ nghut mù,
i‑myìt díng é bang bànshoq gi,
haú lé cháng kôrâ nghut lhê.
16 Ngá é matú, ó yùq toq mù,
agè ashop bang lé bo htuqhtíng râ lhú?
Ngá é matú, ó yùq yàp mù,
agè ashop kut bang lé bo htuqhtíng râ lhú?
17 Yhûmsîng Garai za,
ngo lé garúm hkyô byî é a nghut jáng,
ngò gi, chamchyuîyuì dùt é jowò má,
nyi byùq berâ za nghut lhê.
18 Ngò gi, “Ngò hkyî nâng chot tô nyi ri.” nghû,
taí jáng, Yhûmsîng Garai ê,
Náng é jeju gi, ngo lé htuqbáng byí nau ri.
19 Ngò myìt myo myìt chiq mó huî é hkûn,
Nàng nhiktíng byi luî,
ngá é i‑myìt sô lé,
gabú nhang é nghut ri.
20 Târâ lé chûng mù, ashop é hkyô dông
lú lhum bàt zìk kut é tángmyhâng gi,
Nàng eq wó zûm yàp râ lhú?
21 Yhángmòq gi, díngmán sû lé,
rahá chôm htuqhtíng kômù,
mara a bò sû lé,
shî dam byî akô nghut ri.
22 Nghut kôlhang, Yhûmsîng Garai gi,
ngá é gingtíng jowò dùt byi luî,
ngò nghêhkau é lungmó zîng,
ngá é Garai Gasang nghut nyi ri.
23 Yhang gi, yhángmòq é marâ é matú,
yhángmòq lé dam byi mù,
yhángmòq é agè ashop hkyo é matú,
yhángmòq lé lhoqhtên pyám râ nghut lhê;
ngá-nhûng é Garai Gasang nghut é,
haû Yhûmsîng Garai gi,
yhángmòq lé lhoqhtên pyám râ nghut lhê.