Dawiq Lé Garai Gasang Htûm Tô É Danghtum
17
Dawiq gi, yhâng é hkóhkâm wâng má wó bánnô nyì bê nghut é htâng má, myìqhtoi Nahtan lé, “Wú aq; ngò gi, kyám gâm sik yhûm má lúng nyî, nghut kôlhang, haû Yhûmsîng Garaî é dangshikaq sàksé dò gi, zúm hkaû má jòq tô ri.” ga taî ri.2 Haú hkûn, Nahtan gi, Dawiq lé, “Garai Gasang gi, nàng eq rahá nghut nyi é yánmai, nàng wó myìt jé é eq rajung za kut àq.” ga taî ri.
3 Haú myîn, Garai Gasâng é dang Nahtan chyáng jé é gi,
4 “Ngá é duìnhâng zoshâng Dawiq lé îsu nghû ê taí aq; haû Yhûmsîng Garai taî le, ‘Nàng gi, Ngò nyì râ yhûm saí râ sû a nghut. 5 Ngò gi, Isira-elaq byu pé lé Egutuq ming mai shuî htoq dòq lo é hkûn mai hkû-nyí jé shoq yhûm má a nyi wú é za, jowò rawò mai rawò kut zúm htòt nyi laî lò bê nghut lhê. 6 Ngò gi, Isira-elaq byù bànshoq bang eq jowò htòt é hkûn, Ngá é byu pé lé wú zúng râ matú Ngò hkunmó hkyô tô é, núngmòq é ushuq hká yùq lé, “Nàng, haî mù Ngá é matú kyám gâm sik yhûm a saí byî é lhú?” nghû taî wú é lhú?’ gâ ri.
7 Haû mù, ahkuî, Ngá é duìnhâng zoshâng Dawiq lé, ‘Wum-o a-tsam dìk shoq bò Sû Yhûmsîng Garai shî su ga taî ri; Ngò gi, nang lé, Ngá é Isira-elaq byu pé lé ùp é sû dùt nhâng râ matú, mhan nú nghâróng yô mai le, sau bainám hpúng lé zúng nyi é mai le, shuî yu é nghut lhê. 8 Ngò gi, nàng jé é jowò hkangmó má, nàng eq rahá nghut nyî mù, náng é gyè pé bànshoq lé náng é hí mai lhoqhtûm pyám byi bê nghut lhê. Ahkuî, Ngò gi, myìdàm htoq má kô hkìk htâng é byu pê é myìng hû é su, náng é myìng lé hu nhâng râ nghut lhê. 9 Ngò gi, Ngá é Isira-elaq byu pé lé jowò byi râ nghut mù, yhángmòq ó le ô é yhûm yò má wó nyì ngón yùqyo bùm kôrâ matú, yhángmòq lé lhoqging lhoqtîng to râ nghut lhê. Agè ashop é byu pé gi, hí lé zìk zo kô é su le, 10 Ngá é Isira-elaq byu pé lé ùp râ byu pé lé Ngò hkyin htoq tô é hkûn mai zìk zô nyî kô é su le, a zìk zo lo kôrâ nghut lhê. Ngò gi, náng é gyè pé bànshoq lé ùp zing pyám râ nghut lhê.
Ngò, nang lé taí bá; Ngò, Yhûmsîng Garai gi, náng é matú yhûm saí byi râ nghut lhê. 11 Náng é chyungxe i-pyàt htum mù, nàng gi, náng é îchyí îwâ pê chyáng ló nyi byùq é hkûn, Ngò gi, náng é yùqzô pé mai, náng é hkô má zùng râ matú náng é hkûngxoq rayùq nyi htoq lô nhâng râ nghut mù, yhâng é mîngdán lé lhoq gingtíng byi râ nghut lhê. 12 Yhang gi, Ngá é matú yhûm saí râ nghut mù, Ngò gi, yhâng é tángmyhâng lé ahtum abyùq lhoq gingtîng to byi râ nghut lhê. 13 Ngò gi, yhâng wa dùt mù, yhang gi, Ngá zo dùt râ nghut lhê; Ngò gi, náng é hí mâ é su chyáng mai Ngá é chyitdàp myìt lé wùp yu pyám byî é su, yhâng chyáng mai hkâ-nhám le wùp yu pyám byi râ a nghut. 14 Ngò gi, yhang lé, Ngá é yhûm eq Ngá é mîngdán má ahtum abyùq ùp nyi nhang to râ nghut lhê; yhâng é tángmyhâng gi, ahtum abyùq gingtîng to râ nghut lhê.’ nghû taî kyo aq.” gâ ri.
15 Haû mù, Nahtan gi, Dawiq lé, yhâng é shing-rán dang shî bànshoq shit kyo bê nghut ri.
Dawiq É Kyûdung Dang
16 Haû jáng, Hkóhkâm Dawiq gi, ahkaû shut wang lé mù, haû Yhûmsîng Garaî é hí má zùng luî,
“Yhûmsîng Garai Gasang ê, ngò gi, ó wá nghut luî, ngá é yhûmhtu gi, haî nghut luî, Nàng, ngo lé shî í wàq toq tô lhê lhú? 17 Garai Gasang ê, shí hkyô gi, Náng é myòq hí má a gé lùq shi mù, Náng é duìnhâng zoshâng ngá é yhûm má haî dut lô râ hkyô lé le taî kyo bê nghut ri nhung. Yhûmsîng Garai Gasang ê, Nàng gi, ngo lé hpúng bo dik é sû dông myàng byi bê nghut ri.
18 Náng é duìnhâng zoshâng ngo lé Nàng hkya-on wàq toq é eq séng luî, ngò Dawiq gi, Nang lé haî taî jàt shirâ lhú? Hkâsu mù gâ le, Nàng gi, Náng é duìnhâng zoshâng lé sê nyi lhê. 19 Yhûmsîng Garai ê, Nàng gi, Náng é duìnhâng zôshang é yánmai le, Nàng ô nau é hkyô má cháng luî le, mú mó shî lé kut bê nghut é htoq agó, htûm tô é danghtum mó shí pé bànshoq lé sé nhâng bê nghut ri.
20 Yhûmsîng Garai ê, ngá-mòq é nohkyap èq yhang wó gyô é eq rajung za, Nàng su dùt é ó yùq a nyì, Nàng mai lai luî, gótû Garai Gasang a nyì lo nghut ri. 21 Myìdàm htoq má Náng é Isira-elaq byù myû eq wuí é ó nyi lhê lhú? Garai Gasang gi, yhángmòq lé, Yhâng é byù myû kut yû râ matú le, Yhâng é myìng lhoqhu râ matú le, Yhâng é byu pê é hí mai byù myû wuì lé hkat htoq pyâm é dông maúhpo eq gyùq chiq hpo múzó mó kut râ matú le, Egutuq ming mai hkyi htoq yu é nghut ri. 22 Nàng gi, Náng é Isira-elaq byu pé lé, ahtum abyùq Náng é a-myû kut yû bê nghut ri; Yhûmsîng Garai ê, Nàng gi, yhángmòq é Garai Gasang dùt bê nghut ri.
23 Ahkuî, Yhûmsîng Garai ê, Náng é duìnhâng zoshâng eq yhâng é yhûmbyù wuì eq séng luî Nàng danghtum htûm tô é gi, ahtum abyùq gingtîng nyì sháng gàq. Nàng danghtum htûm tô é eq rajung za lhoqdìk àq. 24 Haú hkûn shèq, haû gi, gingtîng nyi é htoq agó, Náng é myìng le ahtum abyùq kô nyì râ nghut lhê. Haú hkûn, byu pé gi, ‘Isira-elaq byu pé lé ùp é Garai Gasang, haû Wum-o a-tsam dìk shoq bò Sû Yhûmsîng Garai gi, Isira-elaq byu pê é Garai Gasang nghut ri!’ ga taí kôrâ nghut lhê. Haú hkûn, Náng é duìnhâng zoshâng Dawiq é yhûm gi, Náng é hí má ahtum abyùq gingtîng nyì râ nghut lhê.
25 Ngá é Garai Gasang ê, Nàng gi, Náng é duìnhâng zôshang é matú yhûm saí byi râ nghut é hkyô, yhang lé sé nhâng bê nghut mù, Náng é duìnhâng zoshâng ngò gi, Nang lé kyûdung râ myìt, wúm bo é nghut lhê. 26 Yhûmsîng Garai ê, Nàng gi, Garai Gasang nghut nyi ri ô! Nàng gi, Náng é duìnhâng zoshâng lé, ge é hkyô shí pé byi râ danghtum htûm to bê nghut ri. 27 Náng é a-myû wuì gi, Náng é myòq hí má ahtum abyùq jòq gîng nyì râ matú, Náng é duìnhâng zôshang é yhûmhtu lé Nàng shimân byí nau é nghut ri. Hkâsu mù gâ le, Yhûmsîng Garai ê, Nàng gi, haú lé shimân byi bê nghut mù, haû gi, ahtum abyùq shimân byî é huî nyì râ nghut lhê.” ga taî ri.