Dawiq É Ûngmyuq hkyô Pé
18
Hau htâng má, Dawiq gi, Hpilisiti byu pé lé majan ê zân ûng mù, yhángmòq lé ùp sing yù luî, yhángmòq é lòq mâ é Gahta eq hau é awui ayàm mâ é wà pé lé sing yu pyám bê nghut ri.2 Dawiq gi, Moba byu pé lé le majan zân ung é nghut mù, yhángmòq gi, yhang lé dójaú luî, hkán kat byî akô nghut ri.
3 Hau htoq agó, Dawiq gi, Uhprat Wuìlàng cháng luî, yhang ùp é hkyô lé lhoq gingtíng râ matú e é hkûn, Zoba hkóhkâm Hadadezara lé Hamat jé shoq châng hkat htîm ri. 4 Yhang gi, haú yùq é gyèlhêng rahkyîng, lhêng kon myang ji byù nyhit hkyîng eq hkyî so gyèzo í mun lé chyup yû mù, lhêng shê myang rashô du myhit to mù, gótû myang bànshoq lé lahkàp shogyi yâm hpyit pyám byî ri.
5 Haû Damasikuq wà mâ é Arama byu pé gi, Zoba hkóhkâm Hadadezara lé lé garúm kôjáng, Dawiq gi, Aram byù í mûn í hkyîng yùq lé sat pyâm ri. 6 Haû mù, yhang gi, Damasikuq wà mó má Aram mau lé zúng é gyèzô pé nyhi tô é nghut mù, Aram byu pé gi, yhang lé dójaú kôluî, hkán kat byî bum akô nghut ri. Haû Yhûmsîng Garai gi, Dawiq lé, yhang ê jé é jowò hkangmó má ûngmyuq hkyô byî ri.
7 Dawiq gi, Hadadezara é zaugun wuì wàq é hîng gòlong pé lé lú yû mù, Yerusalem wà mó má yu ló ri. 8 Hau htoq agó, Dawiq gi, Hadadezara é wà Tebab eq Hkun wà mâ é gyi myo myo lé le lú yu pyám byî ri. Sholumon gi, gyi haú pé lé, gyi lànghkang, zìng pé eq gótû gyi zê myo myo saî ri.
9 Hamat hkóhkâm Tau gi, Zoba hkóhkâm Hadadezara é gyè hpúng bànshoq lé Dawiq èq zân ung pyám bê nghut é hkyô lé wó gyo jáng, 10 Dawiq lé ê hui râ matú le, Tau eq majan zân lhûm wú sû Hadadezara lé, majan ê zân é hkûn Dawiq ûngmyuq hkyô wó é má ê bo gabú lhôm râ matú le, yhang zo Hadoram lé Hkóhkâm Dawiq chyáng nhang kat ri; Hadoram gi, hîng, ngùn eq gyi zèhkoq pé ajung jung yu ê byî ri.
11 Hkóhkâm Dawiq gi, zèhkoq shí pé lé le, Edom, Moba, Ammon byu pé, Hpilisiti byu pé eq Amalek chyáng mai yu é ngùn eq hîng lé kut é su, haû Yhûmsîng Garai lé àp nhông byi bê nghut ri.
12 Zerui-a é yhang zo Abishai gi, Xo Langhkaû mâ é Edom byù ramûn shit hkyîng lé sat pyâm ri. 13 Haû mù, yhang gi, Edom mau lé zúng é gye hpûng pé tsing nyhi tô é nghut mù, Edom byù bànshoq bang gi, Dawiq lé dójaú bekô nghut ri. Haû Yhûmsîng Garai gi, Dawiq lé, yhang ê jé é jowò hkangmó má ûngmyuq hkyô byî ri.
Dawiq É Zaugun Wuì
14 Dawiq gi, Isira-elaq mau gón lé ùp mù, yhâng é mîngdán byù bànshoq bâng é matú târâ ràp-rá é eq díngmán é dông chyat kut byî ri. 15 Zerui-a é yhang zo Yo-ap gi, gyèzau mó nghut ri; Ahiluda é yhang zo Yehoshahpat gi, kâ xûm sû nghut ri; 16 Ahitup é yhang zo Zadok eq Abi-ahta é yhang zo Ahimelek nhik gi, hkyangjong nghut akô; Shawisha gi, sùt zum kâ xûm sû nghut ri; 17 Yehoi-ada é yhang zo Benai-a gi, Hkerehti byu pé eq Pelehti byu pé lé ùp ri; Dawiq é yhang zo yùqzô pé gi, hkóhkam é nàm mâ é zaugun mó pé nghut akô nghut ri.