Ammon Byu Pé Lé Majan Zân É Hkyô
19
Hau htâng, Ammon byu pê é hkóhkâm Nahashi shi byùq luî, yhâng é hkóhkâm hkô má yhang zo zùng bê nghut ri. 2 Haú hkûn, Dawiq gi, “Hanun é yhâng wa Nahashi gi, ngo lé jeju shit laî lò bê nghut é yánmai, ngò le Hanun lé jeju shit râ nghut lhê.” ga myìt jé luî, Hanun lé, yhâng wa eq séng luî nhik ê tíng byi râ matú, lagyô pé lé nhang kat ri.Dawiq é byu pé gi, Hanun lé nhiktíng byi râ matú, Ammon byu pê é mau má Hanun chyáng ê jé kô é hkûn, 3 hkúngga gíng é Ammon byù sûwún wuî gi, Hanun lé, “Dawiq gi, náng wa lé hkúngga hpautap mù, nhiktíng byi râ byù nhang kat é su ngam ri lhú? Byù shí bang gi, maumyî shî lé tû wú mù, jó wú luî, tu mhuq pyám râ ga, náng chyáng jé lé kô é shèq nghut lhê, a nghut lhú?” ga taî akô nghut ri. 4 Haû mù, Hanun gi, Dawiq é byu pé lé chyup yû mù, nhutmui wùq pyám byi luî, mèbu lé agùng mai chû-naúshi jé shoq nyhâm hkoq byi luî, nhang taû kat bê nghut ri.
5 Haú bang htûng hui zô é hkyô Dawiq lé taî kyo kôjáng, yhang gi, haú bang hoq mó hpu zo bekô nghut é yánmai, yhángmòq lé ê hui râ matú byù nhang kat mù, “Núngmòq é nhutmui yùq hîng shoq Yerihko wà má nyi nyì luî, taû lò keq.” ga taí nhang kat ri.
6 Ammon byu pé gi, Dawiq é hí má yhángmòq myìng gang htoq bê nghut é hkyô lé bûn sé kôjáng, Hanun eq Ammon byu pé gi, Aram Naharima mau, Aram Mahka mau eq Zoba mau mâ é gyèlhêng pé eq gyèlhêng ji bang lé nghô yù râ matú, ngùnhtung 11000 joí kô hun kat akô nghut ri. 7 Haû mù, yhángmòq gi, gyèlhêng 32000 cham eq lhêng ji bang lé le, Mahka hkóhkâm eq yhâng é gyè hpúng lé le, nghô yù kô é nghut mù, haú bang gi, Medeba wà tû-tap má wàp lé xuq akô nghut ri. Ammon byu pé le, yhángmòq é wà pé mai chôm zing kôluî, majan zan râ matú htoq lé lo bum akô nghut ri.
8 Dawiq gi, haú hkyô lé wó gyo jáng, Yo-ap eq yhâng é sarhê hpúng bànshoq lé nhang kat ri. 9 Haû Ammon byu pé gi, lé jé é hkóhkam pé pá má san kut nyi to kô é hkûn, yhángmòq é wà hkum má majan lhom zan râ matú hen yàp tô bum akô nghut ri.
10 Yo-ap gi, yhâng é hí shut htâng shut gyè jùm hen tô bum é lé myàng jáng, Isira-elaq byu pé mâ é je kûng é sarhê hpúng lé hkyin yù mù, Aram byu pê shut htim râ hên nhâng bê nghut ri. 11 Hau htâng, yhang gi, myìt gyó tô é byu pé lé, yhang gu Abishai é lòq má àp byî é nghut mù, yhángmòq gi, Ammon byu pê shut htim râ hên bekô nghut ri. 12 Yo-ap gi, “Aram byu pé ngo lé ung lò jáng, nàng, ngo lé lé garúm yû àq; Ammon byu pé nang lé ung lò jáng, ngò, nang lé lé garúm yû râ nghut lhê. 13 Wum-o lhoqkíng mù, ngá-nhûng é byu pê é matú le, ngá-nhûng é Garai Gasâng é wà pê é matú le, a gyùq a kyûm majan zan sháng. Haû Yhûmsîng Garai gi, Yhang ô nau é dông kut sháng gàq.” ga taî ri.
14 Haû mù, Yo-ap eq yhâng htâng châng é gyè hpúng gi, Aram byu pé lé ê htim kô é nghut mù, yhángmòq gi, yhâng é hí mai hpâng bekô nghut ri. 15 Ammon byu pé gi, Aram byu pé hpang é lé myàng kôjáng, yhángmòq le, yhang gu Abishai é hí mai hpâng mù, wà hkaû shut hpang wang ló bekô nghut ri. Haû mù, Yo-ap gi, Yerusalem wà mó shut taû ló bê nghut ri.
16 Aram byu pé gi, Isira-elaq byu pê é hí má yhángmòq sûm byùq bê nghut é lé myàng kôjáng, byù nhâng mù, Uhprat Wuìlàng hé hpoq mâ é Hadadezara é gyèzau Shohpak eq yhang ùp é Aram byu pé lé ê ji lò nhang akô nghut ri.
17 Dawiq lé haú hkyô taî kyo kô é hkûn, yhang gi, Isira-elaq byù bànshoq lé ji tsîng yù mù, Yodan làng gû dàp luî, yhángmòq eq chyáng jáng, majan hî râ matú hen to bê nghut ri. Dawiq gi, Aram byu pé lé majan zan râ matú ban hên jáng, Aram byu pé gi, yhang lé lhom htîm akô nghut ri. 18 Nghut kôlhang, yhángmòq gi, Isira-elaq byu pê é hí mai hpâng kô é nghut mù, Dawiq gi, yhángmòq é gyèlhêng ji bang 7000 eq hkyî sô é gyèzô pé 40000 lé sat pyám bê nghut ri. Hau htoq agó, yhang gi, yhángmòq é gyèzau Shohpak lé le sat pyám bê nghut ri.
19 Hadadezara é zaugun wuì gi, Isira-elaq byu pê é hí má yhángmòq sûm byùq bê nghut é lé myàng kôjáng, Dawiq eq nguì ngón hkyô xoq yû mù, yhang lé dójaú bekô nghut ri.
Haû mù, Aram byu pé gi, Ammon byu pé lé a kâm garúm lo kó nghut ri.