Yhûmsîng Garai Ge É Hkyô Lé, Yhâng É Byu Pê Chyáng Tûn shit É Hkyô
106
Yhûmsîng Garai lé hkya-on kúngtôn keq.Yhûmsîng Garai gi, gè Sû nghut é yánmai,
Yhang lé jeju hkya-on keq;
Yhâng é chyitdàp myìt gi,
ahtum abyùq gîng nyi ri.
2 Yhûmsîng Garaî é a-tsam múzó mó lé,
ó yùq wá wó gôn kyo râ lhú?
Yhang lé hkya-ôn é dang bànshoq lé,
ó yùq wá ung taí râ lhú?
3 Târâ ràp-rá hkyô lé kut nyî mù,
jô é hkyô lé ayang kut nyî sû gi,
hkungsô wó nyi ri.
4 Yhûmsîng Garai ê,
Nàng, Náng é byu pé lé jeju tûn shit é hkûn,
ngo lé myìtbun aq;
yhángmòq lé hkyi yu é hkûn,
ngo lé lé garúm yû laq.
5 Haú hkûn, ngò gi,
Nàng hkyin yu é bang,
wó lô sut lo é lé myang gabú mù,
Náng é a-myû wuì gabú é má,
bo myang wang lòm luî,
Náng é silî wunlî wuì eq rahá,
bo myang hkya-on râ nghut lhê.
6 Ngá-mòq gi,
ngá-mòq é îchyí îwâ pé kut é su yhang,
yubàk mara kut shut bê;
ngá-mòq gi, a ge é hkyô kut mù,
ashop é dông nyi lai bê nghut lhê.
7 Ngá-mòq é îchyí îwâ pé gi,
Egutuq ming má nyi tô ashî hkûn,
Náng é maúhpo múzó lé a sê gyo kó;
Náng é jeju myo myo lé le a myìtbun mù,
Nhông Nè yam má lháng,
gumlau toq bekô nghut ri.
8 Nghut kôlhang, Yhang gi,
Yhâng é a-tsam mó lé wó sé kó sháng gàq ga,
Yhâng mying é matû é yánmai,
yhángmòq lé hkyi yù bê nghut ri.
9 Yhang gi, Nhông Nè lé tan jáng,
haû gi, kân byùq mù,
myigùng htoq má sô é su, haû nìk é jang mai,
yhángmòq lé shuî laî dàp bê nghut ri.
10 Yhang gi,
yhángmòq lé a nguì bâng é lòq mai,
hkyi yù mù,
gye pê lòq mai yhángmòq lé hkyi htoq yu ri.
11 Wuì pé gi, yhángmòq é gye pé lé,
rayùq lháng a myìt to loshoq,
ûm sat pyám bê nghut ri.
12 Haú hkûn, yhángmòq gi,
Yhang danghtum htûm tô é lé lùmjíng kômù,
Yhang lé hkya-on mahkôn hkôn bekô nghut ri.
13 Nghut kôlhang, yhángmòq gi,
Yhang kut é múzó lé,
hân za tô-myhî pyám kômù,
Yhang hpàqchyî byî é lé a láng kó nghut ri.
14 Yhángmòq gi, yòso má,
yùt yùt ô nau zô nau bùm kômù,
chamchyuîyui é jowò má,
Garai Gasang lé chyam akô nghut ri.
15 Haû mù, Yhang gi,
yhángmòq dûng é lé byi bê nghut kôle,
yhángmòq chyáng,
gyùq hpo nòhpyo nhang kat byî ri.
16 Yhángmòq gi, zúm kut mù nyi é jang má,
Mosheq lé le, Yhûmsîng Garaî é chyoiyúng sû,
Arun lé le mânon é myìt mó bo akô nghut ri.
17 Myigùng gi, gòq wá lô mù,
Dahtan lé myui pyám luî,
Abiram é hpung lé nghop pyám bê nghut ri.
18 Yhángmòq é ahkaû mai myi duq lô mù, agè ashop bang lé,
myîsham èq nyhê jôm pyám bê nghut ri.
19 Yhángmòq gi, Horep bùm má,
nojûng zo alhô saí kômù,
hîng zè mai saî yu é alhô haû lé
noqkuq akô nghut ri.
20 Haú dông, yhángmòq gi,
yhángmòq é Hpungwup Shingkang lé,
mhan zô é nohtó lho èq
htaî lhik yû bekô nghut ri.
21-22 Yhángmòq gi,
Egutuq ming má maúhpo múzó mó kut é,
Ham gâ é mau má làklaí múzó kut é,
Nhông Nè má gyùq hpo múzó kut é,
yhángmòq lé hkyi yu é Garai Gasang lé,
tô-myhî pyâm akô nghut ri.
23 Haû mù, Yhang gi,
yhángmòq lé lhoqhtên pyám râ gâ ri;
Yhang hkyin yu é Mosheq za,
Yhang nhikmó-yô é châm byùq râ matú,
gyoro má a bo yàp byî é nghut jáng, Yhang,
yhángmòq lé lhoqhtên pyám berâ nghut lhê.
24 Yhángmòq gi, haû nguì ngón é maumyî lé,
wú tiq pyám kômù,
Yhang danghtum htûm tô é lé a lùmjíng kó nghut ri.
25 Yhángmòq gi, yhángmòq é zúm má,
pùt é dang taí kômù,
Yhûmsîng Garaî é dang lé,
a cháng kó nghut ri.
26-27 Haû mù, Yhang gi,
yhángmòq lé,
yòso má shi byùq nhâng mù,
yhángmòq é awùt ashîn pé lé,
gótû a-myû pê chyáng nhang kat luî,
ming hkangmó má lhoqpyo kat râ ga,
lòq tû mù dâkam to bê nghut ri.
28 Yhángmòq gi, Pe-ora bùm mâ é,
Balaq hpara é kyaú tuî wùn kômù,
kângsoq a bo é hparà pé lé
nhông byî é hkungga pé lé zô akô nghut ri.
29 Yhángmòq é agè ashop é hkyîzó lòqzó èq,
Yhûmsîng Garai lé nhik lhoqyo kômù,
yhángmòq chyáng wúm jé bê nghut ri.
30 Nghut kôlhang, Hpinehasa toq mù jéyáng pyám luî,
wúm haû gi, byùq byùq bê nghut ri.
31 Hau é yánmai, yhang gi,
pyàt bán hkangmó, ahtum abyùq,
díngmán sû ga són byî é hui bê nghut ri.
32 Dum, yhángmòq gi,
Meriba wuìbúm yâm má,
Yhûmsîng Garai lé nhik lhoqyo kômù,
yhángmòq é yánmai, Mosheq gi,
wuîhke hui bê nghut ri;
33 hkâsu mù gâ lé, yhángmòq gi,
Garai Gasâng é Sô lé,
gumlau toq kô é nghut mù,
Mosheq gi, yhâng é nhut mai,
dang htân taî shut bê nghut ri.
34 Yhángmòq gi,
Yhûmsîng Garai taî é eq rajung za,
byu pé lé a lhoqhtên pyám kô é za,
35 gótû a-myû wuì eq nyhó mù,
haú bâng é nyì yàp htûng lé,
lhoqtap yu akô nghut ri.
36 Yhángmòq gi, haú bâng é hparà lhô lé,
noqkuq kô é nghut mù,
haû gi, yhángmòq myí râ lhaí,
dùt byùq bê nghut ri,
37 Yhángmòq gi, yhángmòq é yùqzo byìzô pé lé,
nàt gâng pê é matú,
hkungga nhông byî akô nghut ri.
38 Yhángmòq gi, mara a bò bâng é sui,
lhoqhtoq pyâm akô;
Hkanan hparà lhô lé nhông byî é sui gi,
yhángmòq é yùqzo byìzô pê é sui nghut ri;
haú dông mai, yhángmòq gi,
maumyî haú lé,
agòt a‑û kut pyám bekô nghut ri.
39 Yhángmòq gi, yhûmsîng kut é eq,
yhûmsing gùng yhûmsîng lhoqgòt yu ri;
yhûmsing é múzó mai,
yhûmsing gùng yhûmsîng mara shut bekô nghut ri.
40 Haû mù luî, Yhûmsîng Garai gi,
Yhâng é byu pé lé nhikjum yo mù,
Yhâng é silî wunlî wuì lé,
chaq pyám bê nghut ri.
41 Yhang gi, yhángmòq lé,
gótû a-myû pê chyáng àp byi mù,
yhángmòq é gye pê èq,
yhángmòq lé ùp zô é huí nhang ri.
42 Yhángmòq é gye pé gi,
yhángmòq lé zìk zo kômù,
yhángmòq é a-tsam hkaû má nyì nhang ri.
43 Yhang gi, yhángmòq lé,
adàm dàm hkyi yu wú kôle,
yhángmòq gi, gumlau toq râ za da kômù, yhûmsing é mara má,
myùp ló byùq bekô nghut ri.
44 Nghut kôlhang, Yhang gi,
yhángmòq é ngaù htê lé wó gyô é hkûn,
yhángmòq myìt myo myìt chiq é hkyô lé myàng byî ri.
45 Yhang gi, yhángmòq é yánmai,
Yhâng é dangshikaq lé myìtbun luî,
Yhâng é chyitdàp myìt mó mai,
yhángmòq lé dum shogyo bê nghut ri.
46 Yhang gi, yhángmòq lé shogyô yù râ matú,
yhángmòq lé shúm kut é bang bànshoq lé,
shogyo myìt kat byî ri.
47 Ngá-mòq é Garai Gasang,
Yhûmsîng Garai ê,
ngá-mòq lé hkyi yù laq;
Náng é chyoiyúng myîng lé,
jeju wó bun mù,
Nang lé hkya-ôn é má,
hpúng shingkang bo nyì sháng gàq,
gótû a-myû wui chyáng mai,
ngá-mòq lé tsîng yù laq.
48 Isira-elaq é Garai Gasang,
Yhûmsîng Garai gi,
ahtum abyùq pyàt dedu,
hkya-on huî nyì sháng gàq.
Byù lhúnglhâng bang gi,
“Amen!” ga taí kó sháng gàq.
Yhûmsîng Garai lé hkya-on keq ô!