Garai Gasang Eq Yhâng É A-myû Wuì
105
Yhûmsîng Garai lé,jeju hkya-on keq;
Yhâng é myìng lé lang keq;
Yhang kut é hkyô pé lé,
byù myû wuì lé sé nhâng keq.
2 Yhang lé mahkôn hkôn keq;
Yhang lé hkya-on mahkôn hkôn keq.
Yhang kut é maúhpo múzó lé,
taî pyô keq ô.
3 Yhâng é chyoiyúng myìng gi,
hkya-on wàq toq é hui sháng gàq;
Yhûmsîng Garai lé hô bâng é i-myìt nhiklhum gi,
gabú byam chyû nyì sháng gàq.
4 Yhûmsîng Garai eq Yhâng é wum-o lé hô keq;
hkâ-nhám le, Yhâng é myòqdong lé hô keq.
5-6 Yhâng é duìnhâng zoshâng,
Abraham é awùt ashín pé ê,
Yhang hkyin yu é,
Yakup é yhang zo yhang shû pé ê,
Yhang kut é maúhpo múzó eq maúhpo alhô agàn lé le,
Yhang taî htoq é târâ jéyáng hkyô lé le, myìtbun keq.
7 Yhang gi, ngá-nhûng é Garai Gasang nghut é,
haû Yhûmsîng Garai nghut ri;
Yhâng é târâ jéyáng hkyô pé gi,
myìdàm gón má jòq nyi ri.
8 Yhang gi, Yhâng é dangshikaq lé le,
pyàt bán rahkying é matú,
Yhang hkyô tô é hkunmó lé le,
ahtum abyùq myìtbûn nyi lhê.
9 Dangshikaq haû gi,
Abraham eq tô tô é dangshikaq nghut mù,
Isak lé dâkam tô é dang nghut lhê.
10-11 “Hkanan mau lé,
nàng sing yù râ gàmbùm dông,
Ngò, nang lé byi râ nghut lhê.”
ga Yhang taî é má,
Yakup é matú gi,
târâ wàng hkunmó dông,
Isira-elaq pê é matú gi,
ahtum abyùq dangshikaq dông,
dangshikaq haú lé,
lhoq gingtíng byi bê nghut ri.
12 Haú u, haú bang gi,
byù du ra-tsuí za nghut mù,
haú mau má byù bíng dùt kô é hkûn,
13 ra-myû mai ra-myû shut yông jé mù,
ra-ming mai ra-ming shut,
lám jé ló kô é nghut lhê.
14 Nghut kôle, Yhûmsîng Garai gi,
ó yùq lé le, yhángmòq lé a zìk zo nhâng;
yhángmòq é yánmai kúm gi,
hkóhkam pé lé,
15 “Ngò hkyin yu é,
ngá é namngón xû bùt hui bang lé,
hkâzáng kó;
ngá é myìqhtoî pé lé hkâ-nô nhâng kó.” ga tân ri.
16 Yhang gi, maumyî haú má,
mùtmó gyó nhâng mù,
zoshuq pê é a-pûn awang bànshoq lé,
lhoqhtên pyám bê nghut ri;
17 haú hkûn, Yhang gi,
yhángmòq é hí má byù rayùq nhang kat ri.
Haú yùq gi, jùn dông ung zô pyám huî é, Yosep nghut ri.
18 Byu pé gi, yhâng é hkyî má,
hkyî-kyûm èq lhoqhkyut cheq byi mù,
yhâng é lìngzing má gi,
toqjâng tuî hut byî akô nghut ri.
19 Yhûmsîng Garai mai te taî tô é hkyô,
ban dùt é hkûn jé shoq le,
yhang têng é hkyô lé,
Yhâng é dâng èq tûn shit é hkûn jé shoq le,
haû su kut akô nghut ri.
20 Haú hkûn, Hpara-uq hkóhkâm gi,
yhang lé hpyi pyám byi nhang mù,
byù myû pê é zau hpó gi,
yhang lé nhang pyám bekô nghut ri.
21 Hkóhkâm gi, Yosep lé
yhâng é yhûm má yhûmsîng kut nhâng mù,
yhâng é sùtzè bànshoq lé ùp nhâng luî,
22 yhang myìt ngui é su,
haû mâ é zaugun wuì lé mhoqshit nhâng mù,
sûwún wuî lé hpàqchyî byéng-yá mhoq byî ri.
23 Hau htâng, Isira-elaqa gi,
Egutuq ming má jé wang ló ri;
Yakup gi, haú mau má,
byù bíng dông nyì é nghut ri.
24 Yhûmsîng Garai gi,
Yhâng é byu pé lé,
gyai yhang myoluq jebe nhâng mù,
yhángmòq é gye pê htoq,
wum mó bò nhâng bê nghut ri.
25 Dum, Yhâng é byu pé lé a nguì râ eq
Yhâng é duìnhâng zoshâng wuì lé,
a ge é dông kut râ myìt,
gye pé lé kat byî ri.
26 Yhang gi, Yhâng é duìnhâng zoshâng Mosheq eq
Yhang hkyin yu tô é Arun lé nhang kat ri.
27 Yhángnhik gi, haú bâng chyáng,
Yhâng é làklaí alhô agàn pé tûn shit mù, Ham mau má,
Yhâng é maúhpo múzó pé kut shit ri.
28 Yhang gi, mauchut lé nhang kat mù,
haú mau má mauchut byùq bê;
haú pé gi, Yhâng é dang pé lé a wó lu lai kó nghut ri.
29 Yhang gi, yhángmòq é wuì lé,
sui dut nhâng mù,
yhángmòq é ngozo pé lé shi byùq nhang ri.
30 Yhángmòq mau má po pé byíng zan to mù,
yhángmòq é zaú wui é wàp pé má lháng wang ri.
31 Yhang taî kat jáng,
mhoq pé jé lo é htoq agó,
yhángmòq é mau gón má,
hkôlhai byíng zan to bê nghut ri.
32 Yhang gi, mau wô râ malaî,
lìkwò gyó nhâng mù,
yhángmòq é ra-mau gón,
maulhap dùq bó to bê nghut ri.
33 Yhang gi, yhángmòq é tsibyiq gâm pé,
hkohúm gâm pé eq,
haú mau mâ é sikgâm pé lé,
lhoqhkyop pyám bê nghut ri.
34 Yhang taí jáng, dinggám nê eq,
a ung htoq nghap é dinggám nyuî le jé ri;
35 haú pé gi, yhángmòq mau mâ é,
mhan-haq hpoqnòq bànshoq lé le,
yhángmòq é kyôshi myuishi lé le,
zô pyám bekô nghut ri.
36 Hau htâng, Yhang gi,
yhángmòq é wúm bo u lhê é
sânghî ashi nghut é,
haú mau mâ é zo-mún bànshoq lé le,
sat pyám bê nghut ri.
37 Isira-elaq byu pé lé gi,
hîng, ngùn eq shuî htoq lô mù,
yhángmòq hká up bang le,
lèqbàt é a bò kó nghut ri.
38 Isira-elaq byu pé htoq ló kô é hkûn,
Egutuq byu pé gi,
yhángmòq lé gyùq nyi bùm kô é yánmai, gabú bekô nghut ri.
39 Yhang gi, buìshûm wó râ matú,
mhut lé nhâng byi mù,
myín lé myàng râ matú,
myi duq htun byî ri.
40 Yhángmòq dung jáng, Yhang gi,
yhángmòq lé nghoqjô nhâng byi mù,
mauhkûng mâ é mùk èq,
yhángmòq lé nhik dìk nhâng bê nghut ri.
41 Yhang, lungmó zîng lé hpông kat jáng,
haú mai wuì mó yui htoq lô luî,
kyuq huî é yòso má,
wuì mó lâng su yui nyì bê nghut ri.b
42 Hkâsu mù gâ le,
Yhâng é duìnhâng zoshâng Abraham lé byî é,
Yhang htûm tô é chyoiyúng danghtum lé,
myìtbûn é yánmai nghut ri.
43 Yhang gi, Yhâng é byu pé lé,
gabú byam chyu nhâng mù,
Yhang hkyin yu é bang lé,
gabú garu nhâng luî,
shuî htoq lô bê nghut ri.
44-45 Yhángmòq gi,
Yhang sang é dang lé,
xûm to mù,
Yhâng é jep é târâ lé,
wó cháng râ matú,
Yhang gi, yhángmòq lé,
gótû a-myû pê é maumyî lé byi mù,
góbang wum kat tô é múzó lé,
yhángmòq é silî wunlî dông,
hkam yù nhâng bê nghut ri.
Yhûmsîng Garai lé hkya-on keq ô!