Hpân Garai Lé Hkya-on Kúngton É Hkyô
104
Ngá é i‑myìt nhiklhum ê,Yhûmsîng Garai lé hkya-on aq.
Ngá é Garai Gasang nghut é Yhûmsîng Garai ê,
Nàng gi, kô htáng Sû nghut mù,
hkìkhkâm hkyô eq kô làm hkyô lé,
wùt tô ri.
2 Yhang gi, maubó lé,
buhîng lé su baíyùp mù,
mauhkûng lé gi,
zúm gyang lé su lâng gyân to luî,
3 Yhâng é ahtoq wàp lé gi,
wuì htoq pé má tô tô ri.
Yhang gi, mhut lé,
Yhâng é lhêng kut mù,
laìdun htoq má jî tô é nghut ri.
4 Yhang gi, laì pé lé,
Yhâng é lagyô pé kut mù,
myishâm lé,
Yhâng é duìnhâng zoshâng wuì kut ri.
5 Yhang gi, myìdàm lé,
a-pûn awang ging shoq xuq tô é nghut mù,
haû gi, hkâ-nhám le ge lhoqdui nhûn é a nghut.
6 Nàng gi, buhîng nghop é su,
myìdàm lé nìk é wui èq nghop to mù,
bùm pê htoq má wuì díng nhang tô ri.
7 Nghut kôlhang, Nàng tân kat jáng,
wuì pé gi, hpang byùq mù,
Náng é maugum hte é yánmai,
hân yui hpang byùq bekô nghut ri.
8 Yhángmòq gi, Nàng nhang tô é jang nghut é,
bùm pé mai yui laî lé mù,
langhkung pé shut yui gyó ló bekô nghut ri.
9 Nàng gi, haú pé a wó yui lai râ matú,
maukyo tô to bê nghut mù,
yhángmòq gi, myìdàm lé,
hkâ-nhám le dum a wó nghop lo nghut ri.
10 Yhang gi, wuìhkung pé má,
wuìbúm bùq nhâng mù,
bùm gyoro pé mai yui laî ló nhang ri.
11 Wuì haú pé gi,
yòso mâ é tân jung yòsô zè pé lé shuq nhâng mù,
yòsô loze pé wuìshit é ge ló byùq nhang ri.
12 Maulat nghoqzô pé gi, wuì yàm má,
nghoqsut saí mù, sikkoq pé má,
mahkôn hkon akô nghut ri.
13 Yhang gi, Yhâng é wàp nghut é maulat mai,
bùm pé má wuì hpyûn gyun mù,
myìdàm htoq gi, Yhâng é lòqmú ashî é yánmai, nhik dìk nyi ri.
14 Yhang gi, no myâng é matú,
wàhu mhan yùq htoq lô nhâng mù,
byu pê é matú,
mhan-haq hpoqnòq yùq htoq lô nhâng luî,
myìdàm htoq mai zoshuq yùq htoq byi nhang é nghut ri.
15 Tsibyiq wing gi,
byu é i‑myìt lé lhoqngón byi mù,
byu é myòqdong lé gi,
xu èq dùq wìk nhâng luî,
zoshuq gi, byu é i‑myìt lé,
htuqbáng byî ri.
16 Yhûmsîng Garaî é sikgâm nghut é,
Yhang hô tô é, Lebanon mâ é,
kyám gâm pé gi,
wuì rago wó yû bê nghut ri.
17 Nghoq pé gi, haú pé má sut saî akô;
hkyî kyang nghoq pé gi,
htángmó gâm pé má sut wó akô nghut ri.
18 Bùm myhâng pé gi,
yo pê é nyì jowò nghut luî,
lùqhkyûng pé gi,
pyû pê é nghêhkaû jowò nghut ri.
19 Yàm-yòq sê gam hkoq râ matú,
lha-mó lé tô to byi mù,
buì gi, wang ló râ ahkyíng lé sê ri.
20 Nàng gi, mauchut lé hpan to luî,
haû gi, myín dùt bê nghut mù,
sik mó yô mâ é tân jung yòsô zè bànshoq gi,
htoq lo bum akô nghut ri.
21 Hkanghkyî pé gi,
sho myang yù râ matú mying wún mù,
Garai Gasâng chyáng mai,
yhángmòq é zoshuq ho akô nghut ri.
22 Buì htoq lô jáng, gaunyhaú haú bang gi,
yhángmòq é nyì jowò má dum taû ló mù,
ló up nyi bum akô nghut ri.
23 Haú hkûn, byu pé gi,
mú zui râ matú htoq e ló mù,
myínhtâng jé shoq mú zuî shi-kùt akô nghut ri.
24 Yhûmsîng Garai ê,
Nàng kut é múzó gi,
myô dik ri myhî-nhung!
Nàng gi, lhúnglháng lé,
hpàqchyî byéng-yá mai hpan to bê nghut mù,
nyì mî-nyî, jòq mîjòq gi,
myìdàm htoq má byíng to bê nghut ri.
25 Haú má, kô dik lam dik é wuimau le jòq mù,
kângsoq bo é dui jung tiq é kô é,
lháng a ung nghap loshoq,
wuiming haú má nyi ri.
26 Haú má wuìsanghpo pé le,
ê ê lò lò kut nyi é htoq agó,
Nàng hpan tô é Lewi-ahtan gâ é mànjùng mó le,
haú má byôm kûn wún ri.
27 Ahkyíng jé jáng zoshuq byi sháng gàq ga, haú pé bànshoq gi,
Nang lé tu wú akô nghut ri.
28 Nàng gi, yhángmòq lé zoshuq byi mù,
yhángmòq gi, haú lé lhom yu akô;
Náng é lòq lhâm kat é hkûn,
yhángmòq gi, ge é hkyô pé wó yû mù,
nhik dìk bum akô nghut ri.
29 Náng myòqdong lé haq pyâm é hkûn,
yhángmòq gi, gyùq nán bum akô;
yhángmòq é kângsoq lé,
Nàng yu pyám byî é hkûn,
yhángmòq gi, shi byùq luî,
hpuílhaû dum taû dùt bekô nghut ri.
30 Nàng gi, Náng é kângsoq lé,
lhoqhtoq kat mù,
yhángmòq lé hpan to luî,
myìdàm lé asik dum saî to bê nghut ri.
31 Yhûmsîng Garaî é hpungwup shingkang gi,
ahtum abyùq gîng nyì sháng gàq;
Yhûmsîng Garai gi,
Yhang kut é múzó má gabú nyî sháng gàq.
32 Yhang gi, myìdàm lé wú kat jáng,
myìdàm htoq gi, gyùq nán byùq bê;
Yhang gi, bùm pé lé záng jáng,
haú pé gi, myihkau htoq bê nghut ri.
33 Ngò gi, ngá é i-pyàt htum shoq,
Yhûmsîng Garai lé mahkôn hkôn râ;
ngò chyungxe rû dui nyì nyì gi,
ngá é Garai Gasang lé,
hkya-on mahkôn hkôn râ nghut lhê.
34 Ngò gi, Yhûmsîng Garai má,
gabú byam chyû nyi é yánmai,
ngò myìt lhîng hkyùq wú é hkyô gi,
Yhang lé gabú nhâng sháng gàq.
35 Nghut kôlhang, yubàk byu pé gi,
myìdàm htoq mai byùq ló byùq mù,
agè ashop bang gi, a nyì lo dùt byùq sháng gàq.
Ngá é i‑myìt nhiklhum ê,
Yhûmsîng Garai lé hkya-on aq.
Yhûmsîng Garai lé hkya-on aq.