Dawiq é jihkyang dang.
Garai Gasâng É Shogyo Chyitdàp Myìt
103
Ngá é i‑myìt nhiklhum ê,Yhûmsîng Garai lé hkya-on aq!
Ngá é i‑myìt sô ê,
Yhâng é chyoiyúng myîng lé hkya-on aq!
2 Ngá é i‑myìt nhiklhum ê,
Yhûmsîng Garai lé hkya-on luî,
Yhâng é jeju bànshoq lé,
hkâ tô-myhí.
3 Yhang gi, náng é yubàk mara bànshoq lé,
hkyut pyám byi mù,
náng é nòlì nòjàng bànshoq lé,
lhoqgê byi bê nghut ri.
4 Yhang gi, nìk é dong mai,
náng é chyungxe lé hkyi yù mù,
nang lé, chyitdàp myìt eq,
shogyo nhikmyin hkyô shimân byi bê nghut ri.
5 Yhang gi, nang lé, zùn su,
náng é zorâm pyàt dum wó taû lhing yù shoq,
nàng myìt ô nau é hkyô má,
ge é hkyo èq nhik lhoqdìk byi râ nghut lhê.
6 Yhûmsîng Garai gi,
zìk zo huî é bang bànshoq lé,
díngmán é dông eq târâ ràp-rá é dông kut byî nyi ri.
7 Yhang gi, Mosheq lé,
Yhâng é hkyô sé nhâng mù,
Isira-elaq byu pé lé,
Yhang kut é múzó hkyô sé nhang ri.
8 Haû Yhûmsîng Garai gi,
shogyo nhikmyîn é, jeju byî é,
luì za nhikjum a yô é eq,
chyitdàp myìt byíng é Sû nghut ri.
9 Yhang gi, ayang mara hun nyì râ le a nghut;
ahtum abyùq nhikjum yô nyì râ le a nghut.
10 Yhang gi, ngá-nhûng é marâ yánmai,
ngá-nhúng hkam yù gíng é eq rajung za, dam byî é a nghut;
ngá-nhúng kut shut é má cháng mù,
lató hpuq é le a nghut.
11 Hkâsu mù gâ le,
mauhkûng gi, myìdàm htoq je myhang é su,
Yhâng é chyitdàp myìt gi,
Yhang lé gyùq hkúngga bâng é ahtoq má, kô nyi é nghut ri.
12 Buìhtoq gi, buìwàng eq wê gâng lhûm é su,
Yhang gi, ngá-nhúng târâ lu laî é hkyô pé lé,
huî sêng pyám byî ri.
13 Îwa rayùq gi, yhang zô pé lé,
shogyo nhikmyîn é su,
Yhûmsîng Garai gi,
Yhang lé gyùq hkúngga bang lé,
shogyo nhikmyîn é nghut ri.
14 Hkâsu mù gâ le, Yhang gi,
ngá-nhúng hkâsu hpân huî é lé sé mù,
ngá-nhúng hpuílhup nghut é hkyô lé le, bun byî ri.
15 Byu é buìnyì pé gi,
wàhu mhan su nghut mù,
yhang gi, yòso mâ é ban su za,
bó yúng ri.
16 Haû gi, laì mut lô eq, yòq gyó byùq mù, jowò haú má,
ban haú lé xoq bûn nyì râ a nghut lo.
17-18 Nghut kôlhang,
Yhûmsîng Garaî é chyitdàp myìt gi,
pyàt dedu ahtum abyùq,
Yhang lé gyùq hkúngga bâng chyáng, jòq nyi ri;
Yhâng é díngmán hkyô gi,
Yhâng é dangshikaq lé cháng mù,
Yháng sang é dang lé bun luî châng kut é,
yhángmòq é awùt ashîn pê chyáng, jòq nyi ri.
19 Yhûmsîng Garai gi, mauhkûng htoq má,
Yhâng é hkóhkâm tángmyhâng lé xuq to mù,
lhúnglháng lé ùp nyi ri.
20 Wum-o a-tsam bò luî,
Yhang taî é dông kut mù,
Yhâng é dang lé châng é
Yhâng é maumâng pé ê,
Yhûmsîng Garai lé hkya-on keq.
21 Yhang ô nau é hkyô kut é,
Yhâng é duìnhâng zoshâng wuì nghut é,
núngmòq mauhkûng mâ é bang bànshoq ê,
Yhûmsîng Garai lé hkya-on keq.
22 Yhâng é mîngdán jowò hkangmó má,
Yhâng èq hpan to huî é bànshoq ê,
Yhûmsîng Garai lé hkya-on keq.
Ngá é i‑myìt nhiklhum ê,
Yhûmsîng Garai lé hkya-on aq.