Jamjau mó hui zo mù, myìt htûm nyi é u, Yhûmsîng Garai lé, yhang iyon yôn é hkyô taî kyô é hkûn, kyûdûng é dang.
Jamjau Mó Huî É Hkûn Kyûdûng É Dang
102
Yhûmsîng Garai ê,ngá é kyûdung dang lé gyo byi laq;
ngò garúm wùt dûng ngau é dang,
Náng chyáng hkyang ròt sháng gàq.
2 Ngò myìt myo myìt chiq é hkûn,
ngá chyáng mai,
Náng é myòqdong hkâhaq pyám.
Ngò wùt dûng é hkûn,
Náng é nohkyap lhîng mù,
hân gyo byi aq.
3 Hkâsu mù gâ le, ngá é buìnyì pé gi,
myihkau su byùq ló byùq mù,
ngá é showui showang pé gi,
myigye su nyé jôm ló ri.
4 Ngò gi, i‑myìt ûng wom luî,
wàhu mhan su nyhuî kyuq byùq mù,
zang zo râ lháng tô-myhî byùq bê nghut lhê.
5 Ngò gi,
i‑myìt nò-kying kyîng nyi é yánmai,
ngá gùngsho gi,
showui eq sho-kuq za dùt byùq bê nghut ri.
6 Ngò gi, yòso má nyi é hkungbup su le,
htên byòq bê jowò mâ é hkungbup radu su le,
dùt byùq bê nghut ri.
7 Ngò gi, yhup gying gyîng nyì mù,
yhûmhkûng htoq má,
radu baú nyi tô é nghoqzo su,
dùt byùq bê nghut ri.
8 Ngá é gye pé gi,
nyí nyí buì buì ngo lé rhoi akô;
ngo lé mara hun é bang gi,
ngá myîng lé lang luî,
nhîng akô nghut ri.
9 Hkâsu mù gâ le, ngò gi,
ngá é zoshuq dông myiwap lé zo mù,
ngò shuq é jung má ngaùbyi nyhô é nghut lhê.
10 Haû gi, Náng é nhikmó-yo hkyo
é yánmai nghut lhê;
hkâsu mù gâ le, Nàng gi,
ngo lé gùq yù mù,
rahkyam shut dú pyâm to bê nghut ri.
11 Ngá é chyungxe buìnyì pé gi,
myínhtâng buìshûm zó su dùt mù,
ngò gi, wàhu mhan su
nyhuî kyuq byùq ló nyi ri.
12 Nghut kôlhang, Yhûmsîng Garai ê,
Nàng gi, ahtum abyùq up nyì mù,
Nang lé sê é hkyô gi,
pyàt bán hkangmó jòq gîng nyi ri.
13 Nàng gi, toq mù,
Zi-un lé shogyo nhikmyin râ nghut lhê;
hkâsu mù gâ le,
ding tô é ahkyíng jé bê nghut mù,
yhang lé jeju shit râ hkyíng jé bê nghut ri.
14 Náng é duìnhâng zoshâng wuì gi,
yhâng é lùqgòk pé lé myìt nguì luî,
yhâng é hpuílhaû pé lé shogyô ri.
15 Byù myû wuì gi,
Yhûmsîng Garaî é myìng lé,
gyùq hkúngga kôrâ nghut lhê;
myìdàm htoq mâ é hkóhkam pé bànshoq gi,
Yhâng é hpungwup shingkang lé,
hkúngga kôrâ nghut lhê.
16 Hkâsu mù gâ le, Yhûmsîng Garai gi,
Zi-un lé dum saî xuq râ nghut mù,
Yhâng é hpungwup shingkang,
lhoqhtoq shit râ nghut lhê.
17 Yhang gi, asho awui dùt bâng é
kyûdung dang lé gyo byi mù,
yhángmòq dûng tôngbán é dang lé
wú shôm pyám râ a nghut.
18-20 “Yhûmsîng Garai gi,
myhâng jang nghut é,
Yhâng é sân-yúng jowò mai,
wú hkyô kat mù,
mauhkûng mai,
myìdàm htoq má byu wú kat luî,
htóng lúng bâng é i‑myìt nò-kying htê lé, gyo byi mù,
shî râ dam byî é hui bang lé,
lhoqlhut kat byî ri.” ga,
htângnung é pyàt bán matú,
kâ to byi sháng gàq;
haú hkûn, byù myû rahú nghû,
hpân hui râ bang gi,
Yhûmsîng Garai lé hkya-on kôrâ nghut lhê.
21-22 Haû mù luî, byu pé zùp zing mù,
mîngdán pé mâ é bang,
Yhûmsîng Garai lé noqkuq kô é hkûn,
Yhûmsîng Garaî é myìng lé,
Zi-un bùm má taî pyô mù,
Yerusalem má,
Yhang lé hkya-on kôrâ nghut lhê.
23 Ngá é chyungxe duì hkyôwuì má,
Yhang, ngá é wum-o lé lhoqhkyuî pyám byi mù,
ngá é buìnyì pé lé lhoqtot pyám byi bê nghut ri.
24 Haû mù, ngò gi,
“Ngá é Garai Gasang ê,
ngá é chyungxe buìnyì rawuí gû má,
ngo lé hkâshuî yù shi;
Náng é zànwut pé gi,
pyàt bán hkangmó ru joq nyi ri.
25 A-nham sânghi má,
myìdam é a-pûn awang lé Nàng xuq to mù,
mauhkûng pé gi, Náng é lòqmú chyat nghut ri.
26 Haú pé bànshoq gi, htên byòq byùq râ nghut lhê;
nghut kôlhang, Nàng gi, ru gîng nyì râ nghut lhê.
haú pé gi, buhîng su xaû ló byùq râ nghut lhê.
Nàng gi, mèbu lé su,
haú pé lé htaî pyám râ nghut mù,
haú pé gi, byùq ló byùq râ nghut lhê.
27 Nghut kôlhang, Nàng gi,
rajung za nghut nyî mù,
Náng é zànwut pé gi,
ló htâng byùq nghu é a jòq râ nghut lhê.
28 Náng é duìnhâng zoshâng wui é
zodù wuì gi, Náng é hí má dui nyì râ nghut lhê;
haú bâng é awùt ashín pé gi,
Náng é hí má wó gingtîng nyì kôrâ nghut lhê.” nghû taî é nghut lhê.