Dawiq é hkya-on dang.
Hkóhkâm Danghtum Htûm É Hkyô
101
Ngò gi,Náng é chyitdàp myìt eq târâ ràp-rá hkyô lé,
mahkôn hkôn râ;
Yhûmsîng Garai ê,
Nang lé hkya-on mahkôn hkôn râ nghut lhê.
2 Ngò gi, mara a bo é chyungxe duì hkyô má,
so râ nghut lhê;
Nàng gi, ngá chyáng hkâ-nhám lé râ lhú?
Ngò gi, ngá é yhûm má,
mara a bo é myìt mai,
sô nyì râ nghut lhê.
3 Ngò gi, ashop é hkyô lé,
ngá myòq hí má to râ a nghut.
Ngò gi, ashop bang kut é hkyô lé,
a ngui é nghut mù,
yhángmòq gi, ngo lé,
wó chyâng htèp râ a nghut.
4 Ngò gi, myìt goí é byu pé eq,
wê gang râ nghut mù,
agè ashop é hkyô gi,
ngò eq haî sêng lhum râ a nghut.
5 Yhâng é yhûmkyochang lé,
lùmù gànsâng haq kut é sû lé gi,
ngò lhoqhpyoq lhoqhtên pyám râ;
nghutbûn é eq myìt myhang é sû lé gi, ngò jân nyì râ a nghut.
6 Maumyî haú má jujúm nyî bang gi,
Ngò eq rahá myang nyì kôrâ matú,
ngò gi, yhángmòq lé wú nyî râ;
kut nyi é múzó má,
mara hûn jang a jòq é sû gi,
ngo lé dójaú râ nghut lhê.
7 Mhaú zo sû ó yùq le,
Ngá é yhûm má wó nyî râ a nghut;
mhaú dang taí sû ó yùq le,
Ngá é hí má wó yàp râ a nghut.
8 Ngò gi, nàp wuì,
maumyî haú má nyi é ashop é bang bànshoq lé,
lhoqhpyoq lhoqhtên pyám mù,
haû Yhûmsîng Garaî é wà mó má nyi é,
agè ashop kut é yùq hkangmó lé,
séng yhang hkat pyám râ nghut lhê.