5 BUK
Hkya-on Kúngtôn Laiká 107-150
Yhûmsîng Garaî Jeju Lé Hkya-ôn É Dang
107
Yhûmsîng Garai gi,gè sû nghut é yánmai,
Yhang lé hkya-on keq;
Yhâng é chyitdàp myìt gi,
ahtum abyùq gîng nyi ri.
2-3 Gye pê lòq mai hkyi htoq yû huî é bang,
jowò hkangmó mai, buìhtoq buìwàng,
maupyî mautsûng mai tsîng yù hui bang nghut é,
haû Yhûmsîng Garaî èq hkyi htoq yû huî é bang le,
haû su nghû taí keq.
4 Ra-am gi, chamchyuîyui é yòso má,
nâ jón wún luî, nyì râ wà ê hkyô,
a myang hô kó nghut ri.
5 Yhángmòq gi, zò-mut wuìshit hui luî,
yhángmòq é chyungxe gi, mòq ló byùq bê nghut ri.
6 Haú hkûn, yhángmòq gi,
wuîhke jamjau huî é mai,
Yhûmsîng Garai lé wùt dûng é nghut luî,
Yhang gi, yhángmòq myìt myo myìt chiq é mai,
hkyi htoq yû bê nghut ri.
7 Yhang gi, yhángmòq wó nyî râ wà shut,
nyâng za shui ló bê nghut ri.
8 Yhûmsîng Garaî é ru gîng nyi é,
chyitdàp myìt é yánmai le,
byu pê matú Yhang kut é,
maúhpo múzó é yánmai le,
yhángmòq gi, Yhang lé,
jeju hkya-on kó sháng gàq.
9 Hkâsu mù gâ le, Yhang gi,
wuìshit bang lé,
nhik dìk nhâng mù,
zò-mut bang lé,
ge é èq lhoqpyíng byi bê nghut ri.
10 Ra-am gi, mauchut hkaû má le,
tîng tîng noq jang má le,
zùng mù, htongbyû dông jòqtoq tui má,
hpuzô nyi akô nghut ri.
11 Hkâsu mù gâ le, yhángmòq gi,
Garai Gasâng é dang lé htuqhtîng pyám mù,
Myhang Htáng Su é hpàqchyî dang lé,
wú tiq pyâm akô nghut ri.
12 Haû mù, yhángmòq gi,
mú htân mó zui luî,
ngú byùq bekô;
yhángmòq lèqbàt kôlhang,
garúm râ byù a nyì nghut ri.
13 Haú hkûn, yhángmòq gi,
wuîhke jamjau huî é mai,
Yhûmsîng Garai lé wùt dûng é nghut luî,
Yhang gi, yhángmòq myìt myo myìt chiq é mai,
hkyi yù bê nghut ri.
14 Yhang gi, yhángmòq lé,
mauchut hkaû mai le,
tîng tîng noq jang mai le,
shuî htoq yû mù,
yhángmòq é toqjâng tui lé,
bàt hkyop pyám byi bê nghut ri.
15 Yhûmsîng Garaî é ru gîng nyi é,
chyitdàp myìt é yánmai le,
byu pê matú Yhang kut é,
maúhpo múzó é yánmai le,
yhángmòq gi, Yhang lé,
jeju hkya-on kó sháng gàq.
16 Hkâsu mù gâ le, Yhang gi,
gyi hkum lé lhoqhkyop pyám mù,
jòqtoq hkumkyáng lé,
lhoqhpyit pyám bê nghut ri.
17 Ra-am gi, yhûmsîng yhang târâ lu laî é dông mai,
nhik a gying bang dùt byùq kômù,
yhángmòq é yubàk marâ é yánmai,
wuîhke jamjau mó hpuzô akô nghut ri.
18 Yhángmòq gi, zoshuq bànshoq lé,
a ron dùt kômù,
shî‑nò hkyo é hkúmdong shut,
chyâng e ló bekô nghut ri.
19 Haú hkûn, yhángmòq gi,
wuîhke jamjau huî é mai,
Yhûmsîng Garai lé wùt dûng é nghut luî,
Yhang gi, yhángmòq myìt myo myìt chiq é mai,
hkyi yù bê nghut ri.
20 Yhang gi, Yhâng é mungdâng èq,
yhángmòq lé lhoqgê byi nhâng bê nghut luî,
lùpdùng mai lé hkyi taû yù bê nghut ri.
21 Yhûmsîng Garaî é ru gîng nyi é,
chyitdàp myìt é yánmai le,
byu pê matú Yhang kut é,
maúhpo múzó é yánmai le,
yhángmòq gi, Yhang lé,
jeju hkya-on kó sháng gàq.
22 Yhángmòq gi,
jeju hkya-on hkungga sôdun byi mù,
gabú mahkôn hkon é dông mai,
Yhâng é múzó lé taî kyo kó sháng gàq.
23 Ra-am gi, wuìsanghpo ji mù,
wuimau má yông ló luî,
wuì mó pê htoq má,
wuìloq kut akô.
24 Haú bang gi, Yhûmsîng Garaî é múzó pé eq,
nìk é wuimau má Yhang kut é maúhpo múzó pé lé,
myàng bekô nghut ri.
25 Hkâsu mù gâ le, Yhang taî kat jáng,
laì mó lò mù, gyai myhâng shoq
wuìlhêng toq lo ri.
26 Yhángmòq gi, mauhkûng shut ûm dòq é hui mù,
nìk dik é jang má dum gyó wâng bekô nghut ri;
yhángmòq gyùq chiq é yánmai,
yhángmòq é myìt wum,
nyé gyuî byùq bekô nghut ri.
27 Yhángmòq gi, î shuq wùt bang su,
a-pyî abàt dùt bùm bekô;
yhángmòq haq htung é hpàqchyî gi,
htûm byùq bekô nghut ri.
28 Haú hkûn, yhángmòq gi,
wuîhke jamjau huî é mai,
Yhûmsîng Garai lé wùt dûng é nghut luî,
Yhang gi, yhángmòq myìt myo myìt chiq é mai,
shuî htoq yû bê nghut ri.
29 Yhang gi, laìdun mó lé,
lhoqnûm pyám mù,
wuìlhêng gi, zîm byùq bê nghut ri.
30 Haû zîm byùq luî, yhángmòq gi,
gabú bum akô;
Yhang gi, yhángmòq jé nau é guhkan má,
yhángmòq lé shuî jé bê nghut ri.
31 Yhûmsîng Garaî é ru gîng nyi é,
chyitdàp myìt é yánmai le,
byu pê matú Yhang kut é,
maúhpo múzó é yánmai le,
yhángmòq gi, Yhang lé,
jeju hkya-on kó sháng gàq.
32 Yhángmòq gi,
shiwa byu pé zùp zîng é jang má,
Yhang lé hkya-on wàq toq mù,
sûwún wui é hpong má,
Yhang lé hkya-on kúngtôn kó sháng gàq.
33 Yhang gi, wuìlàng pé lé,
yòso dùt nhâng mù,
wuìbúm pé lé,
kyuq huî é myigùng dùt nhâng luî,
34 myìhpún bo é maumyî lé,
a-kyû a bo é xo maumyî dùt nhang ri;
haî mù gâ le, haú mau má nyì bâng é,
agè ashop hkyo é yánmai kut é nghut ri.
35 Yhang gi, yòso lé,
wuìhtum dùt nhâng mù,
kyuq huî é myigùng mai,
wuìbúm htoq nhang ri;
36 haû zò-mut hui bang lé haú má nyì nhâng luî, ge nyi é jowò má,
yhángmòq lé wà xuq nhâng bê nghut lhê.
37 Yhángmòq gi, yò saí,
tsibyiq hkyâm saí mù,
kyôshi myuishi myo myo
myang hkam yù kôrâ nghut lhê.
38 Yhang gi,
yhángmòq lé shimân byi mù,
byù du gyai myô jàt lò nhâng luî,
yhángmòq é no myang lé le,
yom ló nhâng râ a nghut.
39 Hau htâng, yhángmòq gi,
byù du yom ló mù,
zìk zô é, wuîhke jamjaû é eq,
yón kuq é hui zo mù,
nhiknge é hui zô akô nghut lhê.
40 Haû zaugun sûwún wuî lé hoq hpu nhang é sû gi,
hkyô a dông é, chamchyuîyuì dùt é jowò má,
yhángmòq lé yông wún nhang é nghut lhê.
41 Nghut kôlhang, Yhang gi,
myùng bang lé yhángmòq é hpuzo jang mai,
lhoqtoq yû mù,
yhángmòq é i-kun pé lé,
sau hpúng su lhoqmyo byî é nghut lhê.
42 Myìt díng bang gi, haú lé myàng luî,
gabú byam chyû akô, nghut kôlhang,
agè ashop bang bànshoq gi,
haî le a dàt taí dùt akô nghut ri.
43 Hpàqchyî bo é sû ó yùq le,
shí hkyô pé lé gyô yù mù,
Yhûmsîng Garaî é chyitdàp myìt mó lé, myìt tû wú sháng gàq.