Dawiq é hkya-on jidang.
Gyè Lé Ûng Râ Garúm Dûng É Dang
108
Garai Gasang ê,ngá é i‑myìt nhiklhum gi,
gingtîng nyi lhê;
ngò gi, ngá é i‑myìt sô mai,
mahkôn hkôn luî, tíng pé bàt râ nghut lhê.
2 Tíng pé eq sámpyí pé ê,
bûn gying keq!
Ngò le, nàpsûn maubó lé,
nhaû pun râ nghut lhê.
3 Yhûmsîng Garai ê,
ngò gi, byù myû wui hí má,
Nang lé hkya-on râ nghut lhê;
ngò gi, byu pê chyáng má,
Nang lé hkya-on mahkôn hkôn râ nghut lhê.
4 Hkâsu mù gâ le, Náng é chyitdàp myìt gi,
gyai yhang kô é nghut mù,
mauhkûng htoq lháng kô myhang ri;
Náng é jujúm hkyô gi,
maulat má lháng jé hkyang é nghut ri.
5 Garai Gasang ê, Nàng gi,
mauhkûng htoq myhâng shoq,
wàq toq é hui sháng gàq;
Náng é hpungwup shingkang gi,
myìdàm gón má byíng nyî sháng gàq ô.
6 Nàng chyitdàp é bang gi,
hkyi yu é wó hui kó sháng gàq,
Náng é a-tsam nghut é lòqyo lòq èq,
ngá-mòq lé hkyi yù mù,
garúm yû laq.
7 Garai Gasang, Yhâng é chyoiyúng yhûm mai,
taî é gi, “Ngò gi, ûngmyuq hkyô mai,
Shehkem wà lé gam pyám mù,
Suhkut langhkaû lé kê wú râ nghut lhê.
8 Gile-at eq Manase mau gi, ngá é nghut lhê;
Ehprim mau gi, ngá é jòqtoq mùq,
Yudaq mau gi, ngá é hkóhkâm dumbáng nghut lhê.
9 Moba mau gi, ngá é hkyî chi au nghut mù,
Edom maû é ahtoq má, ngá é hkyî-tsung dú kê to râ nghut lhê;
Hpilisiti-a mau má, Ngò gi, ngá é ûngmyuq hte èq,
garu râ nghut lhê.” gâ ri.
10 Ó yùq wá, ngo lé,
gingtîng é wà mó má shuî jé râ lhú?
Ó yùq wá, ngo lé,
Edom má shuî-û ló râ lhú?
11 Garai Gasang ê,
ngá-mòq lé he-ngìk pyám mù,
ngá-mòq é gyèzô pé eq,
a bo htoq ló lo kut é gi,
Nàng nghut lhê, a nghut lhú?
12 Byu pé garúm é gi,
a-kyû a bò nghut é yánmai,
gye pé lé htim râ matú,
ngá-mòq lé htuqbáng byi laq.
13 Ngá-mòq gi, Garai Gasang eq rahá nghut jáng,
ûngmyuq hkyô wó yû râ nghut lhê;
Yhang gi, ngá-mòq é gye pé lé,
nâng pyeq pyám râ nghut lhê.