Htêyung ushuq kut su é matú. Dawiq é jidang.
Hpuzô Nyì Su É Myìt Nô Dang
109
Ngò hkya-on kúngton nyi é,Garai Gasang ê,
zim za kut hkâ-nyi nyì ô;
2 hkâsu mù gâ le, agè ashop é bang eq
mhaú zô é bang gi,
yhángmòq é nhuthkum hpóng mù,
ngo lé taí tsô akô;
yhángmòq gi, mhaû é nhutshô mai,
ngo lé rhoî dang taî akô nghut ri.
3 Yhángmòq gi, ngá é lhînghkyùq má,
a ngui é dang taí kômù,
jumgú má ngo lé htîm akô nghut ri.
4 Yhángmòq gi, yhángmòq lé ngò chyitdàp kôle,
ngo lé mara hun akô;
nghut kôlhang, ngò gi,
kyûdung byî é byù rayùq nghut lhê.
5 Yhángmòq gi,
ngò gè kôle, ashop é dông taû kut,
ngò chyitdàp kôle, a ngui é dông taû kut akô nghut ri.
6 Ngá é gyè lé htuqhtíng râ matú,
ashop é byù lé hkyin yù luî nhang kat àq;
mara hûn sû gi,
yhâng é lòqyo hkyam má yàp sháng gàq.
7 Yhang lé târâ jéyáng é hkûn,
yhang gi, mara dam byî é hui sháng gàq;
yhâng é kyûdung dang gi,
yhâng é mara dùt sháng gàq.
8 Yhâng é chyungxe buìnyì gi,
tot byùq sháng gàq;
yhang wùn wàq é wò lé,
góyùq yu pyám byi sháng gàq.
9 Yhâng é zodù wuì gi,
chuízô pé dùt byùq mù,
yhang myi gi,
chuimó myhí dùt byùq sháng gàq.
10 Yhâng é zodù wuì gi,
ho dung zô wún kó sháng gàq;
yhángmòq gi, byòq htên byùq bê nghut é,
yhángmòq é yhûm mai
kôn htoq pyâm é hui kó sháng gàq.
11 Ngùnhpún kat sû gi, yhang wó é bànshoq lé,
chup yu pyám byi sháng gàq;
byù bíng pé gi, yhang zui saî é
kyôshi myuishi bànshoq lé,
lú yu pyám byi kó sháng gàq.
12 Ó yùq le, yhang lé,
jeju a kut byi sháng gàq;
yhâng é chuízô pé lé le,
a shogyô yù kó sháng gàq.
13 Yhâng é awùt ashín pé gi,
htûm byùq kó sháng gàq;
htângnùng má hku lé lô râ bâng chyáng mai,
yhángmòq é myìng byùq byùq sháng gàq.
14 Yhâng é îchyí îwâ pê é yubàk mara lé,
haû Yhûmsîng Garai bûn nyì sháng gàq;
yhâng nû é mara lé, hkâ-nhám le,
a hkyut byi kó sháng gàq.
15 Yhûmsîng Garai gi, yhángmòq lé,
myìdàm htoq má,
a bûn byùq loshoq kut pyám râ matú,
yhángmòq é yubàk mara gi,
Yhûmsîng Garaî é hí má ru joq nyî sháng gàq.
16 Hkâsu mù gâ le, yhang gi, hkâ-nhám le,
jeju kut râ matú myìt a bo é nghut mù,
myùng bang, asho awuî é bang eq,
i‑myìt wúm shun nyì bang lé,
shî shoq kut râ ga châng hkat hkyut wún é sû nghut ri.
17 Yhang gi, gyai kâm nhîng é sû nghut ri;
nhing hkun haû gi, yhâng chyáng zùq sháng gàq.
Yhang gi, shimân jeju lé,
a nguì sû nghut é yánmai,
haû gi, yhang eq wê gâng nyì sháng gàq.
18 Yhang gi, nhîng é hkyô lé,
buhîng su wùt chûng mù,
haû gi, yhâng é gùngdu má,
wuì su yui wàng luî,
yhâng é showui pé má,
xû su yui wang ló bê nghut ri.
19 Haû gi, yhang lé,
mèbu su htup to mù,
ayang hit tô é hpyihit su,
nghut nyî sháng gàq.
20 Haû gi, ngo lé ashop é dang taí mù,
ngo lé mara hun é bang lé,
Yhûmsîng Garai byî é,
ahpau nghut nyì sháng gàq.
21 Nghut kôlhang, Ahko Ahkáng lhúnglháng wó Sû
Yhûmsîng Garai ê, Nàng gi,
Náng mying é matú,
ngo lé rago kut byi laq;
Náng é chyitdàp myìt gi,
ge é nghut lhê yánmai,
ngo lé hkyi xe yùq laq.
22 Hkâsu mù gâ le, ngò gi,
myùng sû eq asho awui dùt sû nghut é htoq agó,
ngá é ûnghkaû má i‑myìt dàm dap tô é sû nghut lhê.
23 Ngò gi, myínhtâng buìshûm su,
shum ló byùq mù,
dinggám lé su ko hkyô pyâm é hui zô nyi ri.
24 Zoshuq túm luî, ngá é hkyîhput gi,
nán byùq bê;
ngá é gùngdu gi, gyí kyuq byùq bê nghut ri.
25 Ngò gi, ngo lé mara hûn bâng èq,
rhoi é hui zô nyi ri;
yhángmòq gi, ngo lé myàng jáng,
a-tam é dông ulhîng he akô nghut ri.
26 Ngá é Garai Gasang nghut é,
Yhûmsîng Garai ê,
ngo lé garúm yû laq;
Náng é chyitdàp myìt má cháng luî,
ngo lé hkyi yù laq.
27 Haú lé gi, Nàng,
Yhûmsîng Garai kut é nghut mù,
Náng é lòqmú nghut é lé,
yhángmòq lé sé nhâng àq.
28 Yhángmòq nhing kôle,
Nàng gi, shimân byi râ nghut lhê;
yhángmòq htîm lò kôlhang,
hoq hpû bùm kôrâ;
nghut kôlhang, Náng é duìnhâng zoshâng gi,
gabú byam chyu râ nghut lhê.
29 Ngo lé mara hun é bang gi,
gùng-yuì hkyô lé mèbu su wùt to mù, hoq hpu hkyô lé,
buhîng mó su baíyùp to kôrâ nghut lhê.
30 Ngò gi, ngá é nhut mai,
Yhûmsîng Garai lé hkya-on wàq toq mù,
byù mòqmó hkaû má,
Yhang lé hkya-on râ nghut lhê.
31 Hkâsu mù gâ le, Yhang gi,
asho awui dùt su é lòqyo hkyam má,
yàp tô é nghut mù,
haú yùq lé dam byi bâng chyáng mai,
haú yùq é chyungxe lé hkyi yu é nghut ri.