Yerusalem Wà Mó Má Sàksé Dò Wàq Yu É Hkyô
15
Dawiq gi, Dawiq é Wà má yhâng é matú yhûm pé saí nhang é htâng má, Garai Gasâng é sàksé dò é matú le jowò hen to mù, hau é matú zúm saî ri. 2 Hau htâng, Dawiq gi, “Lewiq byu pé mai lai luî, Garai Gasâng é sàksé dò lé ó le ge wàq râ a nghut; hkâsu mù gâ le, haû Yhûmsîng Garai gi, yhángmòq lé, haû Yhûmsîng Garaî é sàksé dò wàq râ eq Yhâng é hí má ahtum abyùq dójaú râ matú hkyin yu to bê nghut ri.” ga taî ri.3 Haû mù, Dawiq gi, yhang hen tô é jowò má, haû Yhûmsîng Garaî é sàksé dò lé ê wàq to râ matú, Yerusalem wà mó má Isira-elaq byù bànshoq lé ji tsîng tô ri. 4 Yhang gi, Arun é awùt ashín pé eq Lewiq é awùt ashîn pé lé le ji tsîng tô ri; haú bang gi, 5 Kohat é awùt ashín pé mai, ushuq Uri-ela eq gu-mang wuì 120 yùq; 6 Merari é awùt ashín pé mai, ushuq Asai-a eq gu-mang wuì 220 yùq; 7 Gerishon é awùt ashín pé mai, ushuq Yo-ela eq gu-mang wuì 130 yùq; 8 Elizahpan é awùt ashín pé mai, ushuq Shemai-a eq gu-mang wuì 200 yùq; 9 Hebron é awùt ashín pé mai, ushuq Eli-ela eq gu-mang wuì 80 yùq; 10 Uzi-ela é awùt ashín pé mai, ushuq Aminadap eq gu-mang wuì 112 yùq nghut ri.
11 Haú hkûn, Dawiq gi, hkyangjông nhik Zadok eq Abi-ahta lé le, Lewiq byù Uri-ela, Asai-a, Yo-ela, Shemai-a, Eli-ela eq Aminadap pé lé le, ji yù mù, 12 yhángmòq lé, “Núngmòq gi, Lewiq byu pê é yhûmhtu ushuq pé nghut bum akô; Isira-elaq é Garai Gasang, haû Yhûmsîng Garaî é sàksé dò lé, hau é matú ngò hen tô é jowò má ê wàq lò râ matú, núngmòq eq núngmòq é Lewiq gu-mang wuì gi, yhûmsing gùng yhûmsîng lhoq sân-yúng yû ra kôrâ nghut lhê. 13 Hî dàm, Lewiq byu pé núngmòq haú lé a wàq kô é nghut mù, târâ dông haú lé hkâsu kut râ hkyô, Yhang lé ngá-nhúng a myî wú é yánmai, ngá-nhûng é Garai Gasang nghut é, haû Yhûmsîng Garai gi, ngá-nhúng lé nhikjum yo luî, dam byi bê nghut ri.” ga taî ri. 14 Haû mù, hkyangjông nhik eq Lewiq byu pé gi, Isira-elaq byu pê é Garai Gasang, haû Yhûmsîng Garaî é sàksé dò lé ê wàq dòq lò râ matú, yhûmsing gùng yhûmsîng lhoq sân-yúng yû bekô nghut ri. 15 Haû mù, Lewiq byu pé gi, haû Yhûmsîng Garaî é dang má cháng luî, Mosheq hkunmó hkyô tô é eq rajung za, Garai Gasâng é sàksé dò lé, gán-yâng èq yhángmòq é gòqsân mai wàq akô nghut ri.
16 Dawiq gi, tíng góng pé, tíng pé eq chapchéng pé bàt bang eq rahá, gabú byam chyu mahkôn hkôn râ matú, yhángmòq é gu-mang wuì lé mahkôn hkôn bang dông hkyin masàt to râ hkyô, Lewiq byu pê é ushuq pé lé taî ri.
17 Haû mù, Lewiq byu pé wò byî é bang gi, Yo-ela é yhang zo Heman eq yhâng é gu-mang wuì mâ é Berehki-a é yhang zo Asap, yhángmòq é gu-mang Merari koq mâ é Kushai-a é yhang zo Ehtan nghut ri. 18 Yhángmòq lé tê byî é gu-mang wuì gi, Zehkariq, Ben, Yazi-ela, Shemiramot, Yehi-ela, Uni, Eli-ap, Benai-a, Mase-a, Matahti‑aq, Elihpelehu, Mikne-a, hkum zúng su nhik Obet Edom eq Yi-ela pé nghut akô.
19 Mahkôn hkôn bang Heman, Asap eq Ehtan pé gi, gyi chapchéng lé bàt myhîng akô; 20 Zehkariq, Azi-ela, Shemiramot, Yehi-ela, Uni, Eli-ap, Mase-a eq Benai-a pé gi, alamot htêyung má cháng luî tíng góng pé bàt akô; 21 Matahti‑aq, Elihpelehu, Mikne-a, Obet Edom, Yi-ela eq Azazi-a pé gi, sheminit htêyung má cháng mù tíng pé bàt akô; 22 Lewiq byu pê é ushuq Hkenani-a gi, mahkôn shuî hkon é wò yu ri; yhang gi, mahkôn hkôn kung sû nghut é yánmai, haû gi, yhâng é wò nghut ri.
23 Berehki-a eq Elakana gi, sàksé dò é matú hkum zúng su nhik nghut akô. 24 Hkyangjông pé Shebani-a, Yoshahpat, Nehtanela, Amasai, Zehkariq, Benai-a eq Eli-ezera gi, Garai Gasâng é sàksé dò hí má tut mùt akô; Obet Edom eq Yehi-a le, sàksé dò é matú hkum zúng su nhik nghut akô nghut ri.
25 Haû mù, Dawiq eq Isira-elaq é sûwún wuî eq gyèzo rahkyîng ùp zau pé gi, Obet Edom é yhûm mai haû Yhûmsîng Garaî é dangshikaq sàksé dò lé gabú tung ê wàq dòq yù râ ga, e ló bekô nghut ri. 26 Garai Gasang gi, haû Yhûmsîng Garaî é dangshikaq sàksé dò wàq yu é Lewiq byu pé lé garúm byî é yánmai, yhángmòq gi, nohtó nyhit du eq saulo nyhit du lé nhông byî akô nghut ri. 27 Dawiq le, sàksé dò wàq é Lewiq byu pé le, mahkôn hkôn bang le, mahkôn shuî hkon é wò yù sû Kenani-a le, nú nhâm é ji buhîng wùt tô akô; haû htoq agó, Dawiq gi, nú nhâm é hkyangjong bu-kó lé puq wùt tô ri. 28 Haû mù, Isira-elaq byù bànshoq gi, gabú garû lhê, hkyuî lhabó pé eq tut pé mùt myhîng lhê, chapchéng pé bàt myhîng lhê, tíng ajà jà pé bàt myhîng lhê kut luî, haû Yhûmsîng Garaî é dangshikaq sàksé dò lé wàq lo akô nghut ri.
29 Haû Yhûmsîng Garaî é dangshikaq sàksé dò gi, Dawiq é Wà má wang ló nyi é hkûn, Sholuq é yhang zo byìzo Mihkala gi, hkohot mai lhom wú mù, Hkóhkâm Dawiq gabú byam chyû gó nyi é lé myàng luî, yhang lé wú gùng-yui byùq ri.