Dawiq É Hkóhkâm Wâng Eq Yhâng É Yhûmbyù Wuì
14
Turuq hkóhkâm Hiram gi, Dawiq é matú hkóhkâm wâng saí byi nhâng râ ga, yhâng chyáng lagyô pé eq rahá kyám gâm sikhtung pé, lùq bàt zo bang eq làksima pé lé nhang kat ri. 2 Haû mù, Dawiq gi, haû Yhûmsîng Garaî èq yhang lé Isira-elaq byu pê é hkóhkâm kut nhang to bê hkyô lé le, Isira-elaq byu pê é yánmai yhâng é mîngdán lé shigyaú wàq toq tô é hkyô lé le, sé bê nghut ri.3 Dawiq gi, Yerusalem wà mó má myiwe yu jàt é nghut mù, yùqzo byìzô pé dum hku ri. 4 Yhang Yerusalem wà mó má hku é zodù wuì gi, Shamu-a, Shobap, Nahtan, Sholumon, 5 Ibara, Elishu-a, Elipelet, 6 Noga, Nehpek, Yahpi-a, 7 Elishama, Beli-ada eq Elihpelet pé nghut akô.
Hpilisiti Byu Pé Lé Dawiq Majan Zân Ung É Hkyô
8 Dawiq gi, Isira-elaq byù bànshoq bâng é hkóhkâm kut râ matú, sô kat namngón xû bùt hui bê nghut é hkyô lé, Hpilisiti byu pé wó gyo kôjáng, yhángmòq bànshoq bang gi, Dawiq lé hô râ matú chôm dòq ló bum akô; nghut kôlhang, Dawiq gi, haú hkyô lé wó gyo luî, yhángmòq lé lhom htim râ matú htoq e ri. 9 Hpilisiti byu pé kúm gi, Rehpim Langhkaû má lé kômù, hpyoq zo hpyoq shuq bum akô nghut ri. 10 Haû mù, Dawiq gi, “Ngò, Hpilisiti byu pé lé ê htim râ lhú? Nàng gi, yhángmòq lé ngá é lòq má àp byi râ lhú?” ga Garai Gasang lé myî ri.
Haú hkûn, haû Yhûmsîng Garai gi, yhang lé, “Ê àq; Ngò, yhángmòq lé náng é lòq má àp byi râ nghut lhê.” ga tû taî ri.
11 Haû mù, Dawiq eq yhâng é byu pé gi, Balaq Perazim má dòq ê mù, yhang gi, haú jowò má yhángmòq lé majan ê zân ûng bê nghut ri. Haú hkûn, Dawiq gi, “Garai Gasang gi, ngá é lòq èq, wuìwúm wúm é su, ngá é gyè pé lé sat kyop pyám bê nghut ri.” ga taî ri. Haû mù, jowò haú lé Balaq Perazima ga myhîng akô nghut ri. 12 Hpilisiti byu pé gi, yhûmsing é hparà pé lé haú má tô pyâm to hkó kô é nghut luî, Dawiq gi, haú pé lé nyhê hkyô pyám râ matú hkunmó hkyô ri.
13 Hpilisiti byu pé gi, langhkaû má radàm dum lé hpyoq zo hpyoq shuq bum akô nghut ri. 14 Haû mù, Dawiq gi, Garai Gasang lé dum myî wú jáng, Garai Gasang gi, yhang lé, “Díng díng a châng dòq e é za, yhángmòq lé koî luî dòq ê mù, htángmó yô tû-tap mai ê dòq htim keq. 15 Htangmó gâm ahpyo pé má gyè jùm yán lé lo é htê lé wó gyo kôjáng, htim râ matú htoq ê lo keq; hkâsu mù gâ le, Garai Gasang gi, Hpilisiti gyè jùm lé sat kyop pyám râ ga, náng é hí má htoq e ló é nghut ri.” ga tû taî ri. 16 Haû mù, Dawiq gi, Garai Gasang mai yhang lé hkunmó hkyô é eq rajung za kut luî, yhángmòq gi, Hpilisiti gyè jùm lé, Gibe-on mai Gezera jé shoq châng sat kyop pyám bê nghut ri.
17 Haû mù, Dawiq myìng hû é hkyô gi, mau hkangmó má jé hkyang ló bê nghut luî, haû Yhûmsîng Garai gi, a-myû bànshoq bang Dawiq lé gyùq râ dông kut bê nghut ri.