Sàksé Dò Lé Dum Taû Wàq Yu É Hkyô
13
Dawiq gi, yhâng é zaugun wuì nghut é, gyèzo rahkyîng ùp é zau pé eq rashô ùp é zau pé lé byìn hpyê yù mù, 2 Isira-elaq byù hpúng gón lé, “Núngmòq ge é su wó myìt ngam é htoq agó, ngá-nhûng é Garai Gasang nghut é, haû Yhûmsîng Garai ô nau é nghut jáng, Isira-elaq mau gón má nyi tô é ngá-nhûng é gótû gu-mang wui chyáng le, hkyangjông pé eq Lewiq byu pé le mù, yhángmòq nyi é wà pé eq mhan nú nghâróng yô pé mâ é bâng chyáng le, byù nhâng luî, ngá-nhúng eq rahá chôm nyì râ matú ê ji lò nhâng sháng. 3 Haû mù, ngá-nhûng é Garai Gasâng é sàksé dò lé, ngá-nhúng ê dum wàq yù sháng; hkâsu mù gâ le, Sholuq ùp nyi é u, sàksé dò hau é hí má ngá-nhúng a myî wú lô é nghut lhê.” ga taî ri. 4 Haú hkyô lé shiwa byù bànshoq bang gyô htuk kô é yánmai, shiwa hpúng gón gi, haú hkyô lé myìt hui bekô nghut ri.5 Haû mù, Dawiq gi, Garai Gasâng é sàksé dò lé Kiri-at Yarim mai wàq yù râ matú, Egutuq ming mâ é Shihora Wuìlàng mai Lebo Hamat jé shoq má nyi é Isira-elaq byù bànshoq bang lé shuî tsîng yu ri. 6 Haû mù, Dawiq eq Isira-elaq byù bànshoq bang gi, hkerubim gyoro má zung é Yhûmsîng Garaî é myìng eq sêng é, Garai Gasang haû Yhûmsîng Garaî é sàksé dò lé wàq toq yù râ matú, Yudaq mau mâ é Kiri-at Yarim gâ é Balaq wà má ê bekô nghut ri.
7 Yhángmòq gi, Garai Gasâng é sàksé dò lé Abinadap é yhûm mai wàq htoq mù, lhêng sik má kê akô; Uza eq Ahi-o nhik gi, lhêng kôn akô nghut ri. 8 Dawiq eq Isira-elaq byù bànshoq bang gi, mahkôn hkôn luî le, tíng pé, tíng góng pé, chapchéng pé, zìngtaú pé eq tut pé bàt lhê mùt lhê kut luî le, Garai Gasâng é hí má wum kat o kat ngón poî kut akô nghut ri.
9 Yhángmòq gi, Kidon é gùq chyârâng má jé kô é hkûn, no nâng chot lèqbàt é yánmai, sàksé dò lé zuî díng râ matú, Uza gi, lòq lham mù zuî kat ri. 10 Haû mù, Yhûmsîng Garai gi, Uza lé nhikjum yo luî, yhâng é lòq èq sàksé dò lé zuî é yánmai, yhang lé sat pyâm bê nghut ri. Haû mù, Uza gi, Garai Gasâng é hí má shi byùq bê nghut ri.
11 Haú hkûn, Dawiq gi, haû Yhûmsîng Garaî èq Uza lé htîm sat pyâm é yánmai, nhikjum yô é nghut mù, hkû-nyí jé shoq jowò haú lé Perezi Uza ga myhîng akô nghut ri.
12 Dawiq gi, haú nyí Garai Gasang lé gyùq luî, “Garai Gasâng é sàksé dò lé, ngò, ngá chyáng hkâsu kut ge wó wàq yù râ lhú?” ga myi luî, 13 sàksé dò lé yhâng é jowò Dawiq é Wá má a wàq yu é za, Giti byù Obet Edom é yhûm shut shuî wàq e ri. 14 Haû mù, Garai Gasâng é sàksé dò gi, Obet Edom é yhûmbyù wuì eq rahá, yhâng é yhûm má lha-mó sum hkyap jòq tô ri; haû Yhûmsîng Garai gi, Obet Edom é yhûm eq yhang wó mîwó lé shimân byî ri.