Gyè Zân É Sarhê Pé Dawiq Chyáng Lé Xoq Kô É Hkyô
12
Dawiq gi, Kisha é yhang zo Sholuq lé hpang haq wún mù, Ziklak wà má nyi nyi é hkûn, yhâng chyáng lé é bang gi, a-ô mâ é bang nghut ri; yhángmòq gi, majan má yhang lé garúm é sarhê mó pé ra-am nghut akô. 2 Yhángmòq gi, lai pé chûng mù, lai bik kôlhang, lùq lhui laidán lhui kôlhang, lòqyò lòqpai dông ge bìk ge lhuî é bang nghut akô; yhángmòq gi, Ben-yamin up mâ é Sholuq é gu-mang wuì nghut bum akô nghut ri.3 Sânghi má, yhángmòq é zau Ahi-ezera; hau htâng má, Gibe-a byù Shema é yhang zo Yo-ashi; Azimawet é yhang zô nhik Yezela eq Pelet; Berahka; Anahtot byù Yehu; 4 haû sum xê yùq é ushuq nghut mù, sum xê yùq mâ é sarhê mó rayùq nghut é, Gibe-on byù Ishimai-a; Yeremi-aq, Yahazi-ela, Yohanan, Gedera byù Yozabat; 5 Eluzai, Yerimot, Be-ali-a, Shemari-a, Harup byù Shehpati-a; 6 Elakana, Ishi-a, Azarela, Yozera, Kora byù Yashobe-am; 7 Gedora byù Yehoram é yhang zô nhik Yo-ela eq Zebadi-a pé nghut akô.
8 Dawiq nyi é yòso mâ é gyèdap má Gat up mâ é byù ra-am lé hpang nyi akô; yhángmòq gi, a gyùq a wam é sarhê pé nghut kômù, majan zan râ matú gòlong eq lhâm ge chung é bang nghut akô. Yhángmòq é myòqdong gi, hkanghkyi pê é myòqdong su nghut mù, yhángmòq gi, bùm pé mâ é xat pé su wó din dâng gó akô nghut ri.
9 Ezera gi, zau nghut ri; yhâng a-ô mâ é bang gi, í yùq nghû râ Obadi-a, sum yuq nghû râ Eli-ap, 10 myi yuq nghû râ Mishimana, ngo yuq nghû râ Yeremi-aq, 11 hkyuq yùq nghû râ Atai, nyhit yùq nghû râ Eli-ela, 12 shit yùq nghû râ Yohanan, gau yùq nghû râ Elazabat, 13 raxê yùq nghû râ Yeremi-aq eq raxe rayùq nghû râ Makbanai pé nghut akô.
14 Gat up byù shí bang gi, gyèzaû pé chyat nghut akô; je tiq é zau gi, rashô lé ùp mù, je kô é zau gi, rahkyîng lé ùp ri. 15 Yhángmòq gi, Yodan làng jê é sânghî lhôhkyap má gû dàp kômù, buìhtoq buìwàng hkyam pé mâ é langhkaû pé má nyi é yùq hkangmó lé hkat pyo pyâm akô nghut ri.
16 Gótû Ben-yamin up bang eq Yudaq up mâ é byù ra-am le, yhâng é gingtíng jowò má nyi tô é Dawiq chyáng lé bum akô nghut ri. 17 Haû jáng, Dawiq gi, yhángmòq lé ê htoq hui mù, “Ngo lé garúm râ matú núngmòq nguì ngón é eq lé kô é nghut jáng, núngmòq lé ngò shuî xoq yû râ rì rì nghut lhê. Nghut kôlhang, ngá é lòq má hai mara a dàp kôle, ngá é gye pê é lòq má ngo lé àp pyám râ matú, núngmòq lé kô é nghut jáng, ngá-nhûng é îchyí îwâ pê é Garai Gasang gi, haú lé wú mù, núngmòq lé jéyáng sháng gàq.” ga yhángmòq lé taî ri.
18 Haú hkûn, Sô gi, haû sum xê yùq é zau Amasai chyáng lé jé é nghut mù, yhang gi,
“Dawiq ê, ngá-mòq gi, náng é byu pé nghut lhê!
Yese é yhang zo ê, ngá-mòq gi, nàng eq rahá nghut nyi lhê!
Náng é Garai Gasang gi, nang lé garúm râ nghut mù,
ûngmyuq hkyô gi, náng é matú le,
nang lé garúm bâng é matú le, nghut nyî sháng gàq.” ga taî ri.
Haû mù, Dawiq gi, yhángmòq lé pang yù luî, yhâng é gyè hpúng pê é zau wuî kut nhâng bê nghut ri.
19 Dawiq gi, Sholuq lé majan zan râ ga Hpilisiti byu pé eq rahá e ló kô é hkûn, Manase koq mâ é byù ra-am gi, yhâng chyáng lé hpang hkau akô nghut ri. (Dawiq eq yhâng é byu pé gi, Hpilisiti byu pé lé a garúm kó; hkâsu mù gâ le, Hpilisiti zau wuî gi, “Yhang, yhâng é yhûmsîng Sholuq shut ru dap ló byùq le gi, ngá-nhúng u gyó râ nghut lhê.” ga chôm hpyê htoq kômù, yhángmòq lé taû ló nhang pyám kô é yánmai nghut ri.) 20 Dawiq Ziklak jowò má e ló é hkûn, yhâng chyáng lé hpang hkau é Manase koq mâ é byu pé gi, Atna, Yozabat, Yedi-ela, Mihka-elaq, Yozabat, Elihu eq Zilehtai pé nghut akô. Shí bang gi, Manase koq mâ é byù rahkyîng hkyîng lé ùp é zau wuî nghut akô. 21 Yhángmòq bànshoq bang gi, a gyùq a wam é sarhê pé eq yhâng é gyè hpúng mâ é gyèzaû pé nghut kô é yánmai, da-myàq hpúng pé lé htîm sat râ matú, Dawiq lé garúm akô nghut ri. 22 Dawiq gi, Garai Gasâng é gyè hpúng mó myhó myô é gyè hpúng mó wó é hkûn jé shoq, byu pé gi, ra-nyí htâng ra-nyí Dawiq chyáng yán lé bum akô nghut ri.
Góbang Dawiq Chyáng Wang Lo Bum É Hkyô
23 A-ô mâ é gi, haû Yhûmsîng Garai taî tô é eq rajung za, Sholuq é mîngdán lé Dawiq é lòq má àp byi râ matú, Hebron wà má yhâng chyáng lé jé é, gyè zan râ matú shâm lhâm chung é byù jihpán pé nghut lhê;
24 Yudaq up mâ é, majan zan râ matú gòlong eq lhâm chung é byù 6800 yùq;
25 Sime-on up mâ é, majan zan râ matú sarhê pé 7100 yùq;
26 Lewiq up mâ é byù 4600 yùq; 27 Arun é yhûmhtu mâ é ushuq gi, Yehoi-ada nghut luî, yhang eq rahá 3700 yùq; 28 a gyùq a wam é zorâm wàqngân Zadok eq yhâng é yhûmhtu mâ é zaugun wuì 22 yùq;
29 Ben-yamin up mâ é, Sholuq é gu-mang wuì 3000 yùq; yhángmòq myo mî-myo gi, haú hkûn jé shoq Sholuq é yhûm lé myìt tuî nyi é bang nghut akô;
30 Ehprim up mâ é, a gyùq a wam é sarhê pé nghut mù, yhángmòq é a-myû koq pé má myìng hû é byù 20800 yùq;
31 Manase koq rahkyam mâ é, Dawiq lé hkóhkâm wò hûn râ myìng jihpán gùq lhôm é byù 18000 yùq;
32 Yisahka up mâ é, haú yòq haú bûn é hkyô lé sê gyo mù, Isira-elaq byu pé haî kut râ hkyô sê é zau wuì 200 yùq eq yhángmòq é hkunmó châng é yhángmòq é gu-mang wuì bànshoq;
33 Zebulun up mâ é, myìt koq a xân é za Dawiq lé garúm mù, majân é matú gyèzè ajung jung ge hen lajâng é, gyè zan kûng é gyèzô pé 50000 yùq;
34 Naphtali up mâ é, zaugun wuì 1000 yùq eq rahá gòlong pé eq lhâm pé wàq é byù 37000 yùq;
35 Dan up mâ é, majan wó zân é byù 28600 yùq;
36 Asheri up mâ é, majan zan râ matú rì rì nghut é gyè zan kûng é gyèzô pé 40000 yùq;
37 Yodan lang é buìhtoq hkyam mâ é, Rubin up, Gat up eq Manase koq rahkyam mâ é, gyèzè ajung jung chung é byù 120000 yùq nghut ri.
38 Shí bang bànshoq gi, yhûmsing myìt mai lé àp nhong é, majan zan kûng é byu pé chyat nghut akô. Yhángmòq gi, Dawiq lé, Isira-elaq byù bànshoq bâng é hkóhkâm kut nhâng râ matú chôm myìt hpyit chûng mù, Hebron wà má lé kô é nghut ri. Myìt gyó tô é gótû Isira-elaq byù bànshoq bang le, i-myìt rahkat zâ èq Dawiq lé hkóhkâm kut nhâng râ myìt bo bum akô nghut ri. 39 Yhángmòq gi, haú má sum nyí yhang Dawiq eq chôm zo chôm shuq akô; hkâsu mù gâ le, yhángmòq é gu-mang wuì mai yhángmòq é matú zoshuq htuqbáng byi kô é yánmai nghut ri. 40 Hau htoq agó, yhángmòq é maukyo bang nghut é, mau we mâ é Yisahka, Zebulun eq Naphtali mau pé mai lháng, logúng pé, gola-uk pé, loze pé eq nohtó pé mai zoshuq htô lé lo bum akô nghut ri. Haû mù, mún pé, hkohúm mùk long pé, tsibyiq shi kyuq pé, tsibyiq wing pé, tsanlun xû pé, no pé eq sau bainám pé agùn agó wó akô; hkâsu mù gâ le, Isira-elaq a-myû wuì má gabú byam chyu hkyô wó kômù nghut ri.