Dawiq Isira-elaq Byù Pê É Hkóhkâm Dùt É Hkyô
11
Isira-elaq byu pé bànshoq bang gi, Hebron wà má Dawiq chyáng rahá chôm lé kômù, “Ngá-mòq gi, náng é suishô pé nghut lhê. 2 Laî ló bê hkûn, Sholuq, ngá-mòq é hkóhkâm nghut nyi le lháng, nàng gi, Isira-elaq byu pé lé htoq htoq wàng wàng gyè shuî û nyì gù bê nghut lhê. Hau htoq agó, náng é Garai Gasang nghut é, haû Yhûmsîng Garai gi, nang lé, ‘Nàng gi, Ngá é Isira-elaq byu pé lé wú zúng râ sû le, yhángmòq lé ùp râ sû le, dùt râ nghut lhê.’ ga taî ri.” ga taî akô.3 Isira-elaq zaugun sûwún wuî bànshoq bang gi, Hebron wà má Hkóhkâm Dawiq chyáng lé jé kô é hkûn, Dawiq gi, haû Yhûmsîng Garaî é hí, Hebron wà má yhángmòq eq dangshikaq tô tô ri; haû mù, yhángmòq gi, Samu-elaq dông haû Yhûmsîng Garai danghtum htûm tô é eq rajung za, Isira-elaq byu pê é hkóhkâm dùt râ matú, Dawiq lé sô kat namngón xû bùt byî akô nghut ri.
Yerusalem Wà Mó Lé Dawiq Wó Sing Yu É Hkyô
4 Dawiq eq Isira-elaq byu pé bànshoq bang gi, Yebusi gâ é Yerusalem wà mó má yán dòq e akô. Haú má nyi é Yebusi byu pé gi, 5 Dawiq lé, “Nàng gi, shî má ge wàng râ a nghut.” ga lhom taí kôlhang, Dawiq gi, Dawiq é Wà gâ é, Zi-un é gingtíng jowò lé wó zân ung yù bê nghut ri.
6 Dawiq gi, “Yebusi byu pé lé majan ê shuî zân é sû gi, gyèzau dùt râ nghut lhê.” ga taî é nghut mù, Zerui-a é yhang zo Yo-ap gi, hí dòq e é nghut mù, zau dùt bê nghut ri.
7 Dawiq gi, gingtíng jowò haú má nyi nyi é nghut ri; haû mù, haú jowò lé, Dawiq é Wà ga myhîng akô nghut ri. 8 Yhang gi, lhoqmyhang tô é jang mai wàhkûm hkaû lhînghkyùq má wà xuq tô ri; haú u, Yo-ap gi, wà haú mâ é myìt tô é jowò lé saî xuq nyi ri. 9 Dawiq gi, wum-o a-tsam je riyhang kô myhang lò bê nghut ri; hkâsu mù gâ le, haû Wum-o a-tsam dìk shoq bò Sû Yhûmsîng Garai gi, yhang eq rahá nghut nyi ri.
Dawiq É Sarhê Mó Pé
10 A-ô mâ é gi, Dawiq é sârhe pê é zaú wui é hkyô nghut lhê; yhángmòq gi, haû Yhûmsîng Garai danghtum htûm tô é eq rajung za, Isira-elaq byù bànshoq bang eq rahá, Dawiq lé hkóhkâm ayá wò byi râ matú, ra-mau gón má châng shuî htuqbáng é bang nghut akô. 11 Dawiq é wum-o mó bo é sârhe pê é jihpán gi, a-ô mâ é eq rajung za nghut lhê.
Hakmoni byù Yashobe-am gi, zaugun wui é zau nghut ri; yhang gi, yhâng é lhâm chûng luî, byù sum shô yùq lé radá dâm htim mù, sat pyám é sû nghut ri.
12 Yhâng é htâng mâ é gi, sarhê mó sum yuq mâ é rayùq nghut é, Ahohi byù Dodo é yhang zo Ele-aza nghut ri. 13 Yhang gi, Hpilisiti byu pé majan zan râ ga zùp zîng tô é hkûn, Dawiq eq rahá Pasi Damim má nyi tô ri; haú jowò gi, mùk-yó gùq yò nghut mù, gyèzô pé gi, Hpilisiti byu pê chyáng mai hpang ló byùq akô nghut ri. 14 Nghut kôlhang, yhángmòq gi, yò gùng má jowò yu yàp to mù, lhom htuqhtíng luî, Hpilisiti byu pé lé ûng bekô nghut ri; haû Yhûmsîng Garai gi, yhángmòq lé ûngmyuq hkyô mó byi bê nghut ri.
15 Zaugun wuì sum xê yùq mâ é sum yuq gi, Adulam lùqhkyûng nàm mâ é lungmó zîng má Dawiq lé ê gyó huî akô; haú u, Hpilisiti gyè hpúng gi, Rehpim Langhkaû má gyèwap xuq tô akô nghut ri. 16 Haú hkûn, Dawiq gi, gingtíng jowò hkaû má lúng nyi é u, Hpilisiti byu pé gi, Betlehem wà mó má wàp xuq nyi tô bum akô nghut ri. 17 Dawiq gi, ûchyam lé myìt tui mù, “Ô, Betlehem wà hkum nàm mâ é wuìhtúng mâ é wuì lé, ó yùq wá, ngá é matú ê hkam lò byi râ lhú!” ga taî ri. 18 Haû mù, haû Sarhê sum yuq gi, Hpilisiti wàp lé zân hpyoq wang ê mù, Betlehem wà hkum nàm mâ é wuìhtúng mâ é ûchyam ê hkû yù luî, Dawiq chyáng yu lò byî akô nghut ri; nghut kôlhang, yhang gi, a lhom shuq byî é za, haû Yhûmsîng Garaî é hí má hut hkyô pyâm ri. 19 Haû mù, yhang gi, “Ngò shî lé shuq râ matú Garai Gasang hkúm sháng gàq! Yhángmòq é chyungxe lháng àp nhong pyâm é byù shî sum yuq é sui lé ngò shuq râ lhú?” ga taî ri. Yhángmòq é chyungxe àp nhong pyám luî ê hkam lo é ûchyam nghut é yánmai, Dawiq gi, ûchyam haú lé a shuq nghut ri.
Haû gi, sarhê mó pé sum yuq kut é múzó nghut ri.
20 Yo-ap é yhang gu Abishai gi, haû Sarhê sum yuq é zau nghut ri. Yhang gi, byù sum shô yùq lé, yhâng é lham èq wó htaû sat pyám bê nghut é yánmai, haû Sarhê sum yuq su myìng hu sû dùt bê nghut ri. 21 Yhang gi, haû Sarhê sum yuq htoq má hkúngga hpautap é je hui sû nghut mù, yhángmòq é zau dùt byùq é nghut ri; nghut kôlhang, yhang gi, haû sum yuq lé a hkyit shi nghut ri.
22 Kapzela jowò mâ é gyè zan sarhê mó nghut é, Yehoi-ada é yhang zo Benai-a gi, múzó mó pé kut sû nghut ri. Yhang gi, je hkìk é, Moba byù Ari-ela é yhang zô nhiktâng lé sat pyâm é htoq agó, gyo gyó é buìnyì má dong hkaû shut gyó wang ê mù, hkanghkyi radu lé ê sat pyâm ri. 23 Yhang gi, gùnghkyâng ngo dúng myhang é Egutuq byù rayùq lé sat pyâm ri. Egutuq byù haû yùq gi, yhâng é lòq má dumbáng í kô é lhâm ch ung to kôlhang, Benai-a gi, dumbáng zo za chûng mù, e ló luî, yhâng é lòq mâ é lhâm lé ê lú yû mù, yhang lé lhâm hau èq yhang sat pyám é nghut ri. 24 Haû gi, Yehoi-ada é yhang zo Benai-a kut é múzó pé nghut luî, yhang le, sarhê mó haû sum yuq su myìng hû é sû nghut ri. 25 Yhang gi, haû sum xê yùq htoq gyai yhang hkúngga hpautap é hui kôlhang, haû Sarhê sum yuq má bo lhoqlhôm é a hui shi nghut ri. Haû mù, Dawiq gi, yhang lé, yhâng é chyungxe zúng bâng é ushuq kut nhâng bê nghut ri.
26 Haû sarhê mó pé gi,
Yo-ap é yhang gu Asahela;
Betlehem mâ é Dodo é yhang zo Elihanan;
27 Harori byù Shamot;
Peloni byù Heleza;
28 Teko-a mâ é Ikesha é yhang zo Ira;
Anahtot mâ é Abi-ezara;
29 Husha byù Sibehkai;
Ahohi byù Ilai;
30 Netohpat byù Maharai;
Netohpat byù Bana é yhang zo Helet;
31 Ben-yamin ùp é maumyî mâ é, Gibe-a jowò mâ é Ribai é yhang zo Ihtai;
Pirahton byù Benai-a;
32 Gasha langhkung pé mâ é Hurai;
Arabahti byù Abi-ela;
33 Baharum byù Azimawet;
Shalabon byù Eli-aba;
34 Gizon byù Hashem é yhang zô pé;
Harari byù Shage é yhang zo Yonahtan;
35 Harari byù Sahkara é yhang zo Ahi-am;
Ura é yhang zo Elihpala;
36 Mehkera byù Hehpera;
Peloni byù Ahiya;
37 Hkarimela byù Heziro;
Ezibai é yhang zo Narai;
38 Nahtan é yhang gu Yo-ela;
Hagiri é yhang zo Mibihara;
39 Ammon byù Zelek;
Zerui-a é yhang zo Yo-ap é shâm lhâm bo wàq sû, Berot byù Naharai;
40 Ihtari byù Ira;
Ihtari byù Garep;
41 Hiti byù Uri-a;
Alai é yhang zo Zabat;
42 Rubin up bâng é zau, Rubin up byù Shiza é yhang zo Adina; yhang eq rahá nghut é sum xê yùq;
43 Mahka é yhang zo Hanan;
Mitni byù Yoshahpat;
44 Ashiterot byù Uzi-a;
Aro-era byù Hohtam é yhang zô nhik Shama eq Yi-ela;
45 Shimri é yhang zo Yedi-ela eq
yhang gu Tizi byù Yoha;
46 Mahawi byù Eli-ela;
Elinam é yhang zô nhik Yeribai eq Yoshawi-a;
Moba byù Itma;
47 Eli-ela, Obet eq Mezoba byù Yasi-ela pé nghut akô.