Hkóhkâm Sholuq Shi Byùq É Hkyô
10
Ahkuî, Hpilisiti byu pé gi, Isira-elaq byu pé lé majan zân akô nghut ri; Isira-elaq byu pé gi, yhángmòq é hí mai hpâng kô é nghut mù, Gilabo-a Bùm má myo myo sat pyâm é huî bùm bekô nghut ri. 2 Haû Hpilisiti byu pé gi, Sholuq eq yhang zô pé lé tsuq tsuq châng hkat kômù, yhang zo Yonahtan, Abinadap eq Malihkishu-a pé lé sat pyám bekô nghut ri. 3 Majan gi, Sholuq é lhînghkyùq má je yhang htan lo é nghut mù, lai bik bang gi, yhang lé châng hkyit kôluî, yhang lé bìk záng bekô nghut ri.4 Sholuq gi, yhâng é shâm lhâm bo wàq sû lé, “Náng é shâm shê mù, ngo lé htaû ròt kat àq; haû a nghut jang, ahpyo-kuq a hpyit é byù shí bang, ngá chyáng lé mù, ngo lé rhoî zing-ri kôrâ nghut lhê.” ga taî ri.
Nghut kôlhang, yhâng é shâm lhâm bo wàq sû gi, gyùq nán byùq mù, a gyo byi nghut ri; haû mù, Sholuq gi, yhâng é shâm lé yù mù, hau é ahtoq má lèq htaû ròt shi byùq bê nghut ri. 5 Haû shâm lhâm bo wàq sû gi, Sholuq shi byùq bê lé myàng jáng, yhang le yhûmsing é shâm má lèq ròt shi byùq bê nghut ri. 6 Haû mù, Sholuq eq yhang zô pé sum yuq shi byùq bekô nghut ri; Sholuq é yhûmbyù wuì bànshoq bang rahá shi byùq bekô nghut ri.
7 Langhkaû má nyi é Isira-elaq byù bànshoq bang gi, gyèzô pé hpang ló bûm bê lé le, Sholuq eq yhang zô pé shi byùq bekô nghut é lé le, myàng kôjáng, yhángmòq é wà pé lé tô pyâm to kômù, hpâng bekô nghut ri. Hpilisiti byu pé gi, lé mù, haú pé lé sing yu pyám bekô nghut ri.
8 Htang nyí, Hpilisiti byu pé gi, shî màng pé mâ é zè pé lé hkyut shang yù râ ga lé kô é hkûn, Sholuq eq yhang zô pé Gilabo-a Bùm má shi lèq tô bum é lé myang akô nghut ri. 9 Haû mù, yhángmòq gi, yhâng é zè shang yù luî, yhâng é ulhum hpyit yû kô é htoq agó, yhâng é gyèhking lé le yu ló kômù, yhángmòq é hparà lhô pê chyáng má le, yhángmòq é byu pê chyáng le, lùdang haû lé châng taî pyô râ matú, Hpilisiti ra-mau gón má lagyô pé nhang kat akô nghut ri. 10 Yhángmòq gi, yhâng é gyèhking lé, yhángmòq é hparà pê é yhûm má tô to kômù, yhâng é ulhum lé Dagon hparà yhûm má lhâng tô akô nghut ri.
11 Yabesha Gile-at má nyi é bang bànshoq gi, Hpilisiti byu pê èq Sholuq lé kut é hkyô lhúnglháng lé wó gyo kôjáng, 12 yhángmòq é sârhe pé bànshoq bang ê kôluî, Sholuq eq yhang zô pê é màng pé lé ê gùq yù kômù, Yabesha wà má wàq lo akô nghut ri. Hau htâng, yhángmòq gi, Yabesha mâ é wàqmyòq gàm ô má myhup yhûm pyám kôluî, nyhit nyí zoshuq tûm akô nghut ri.
13 Sholuq gi, haû Yhûmsîng Garai lé a jujúm é yánmai le, Yhûmsîng Garaî é dang lé le a cháng mù, hkyô shit yû râ matú, haû Yhûmsîng Garai lé a myî wú é za, nàt wang júng é myiwe myhí lé ê myî gôn é yánmai le, shi byùq é nghut ri. 14 Haû mù, haû Yhûmsîng Garai gi, yhang lé sat pyám luî, Yese é yhang zo Dawiq lé mîngdán haû àp byî pyám bê nghut ri.