Olwaandiko Lwo Kubaanza Lwa Paulo Hali
Timoteo
Obweébeembezi Bwe Echitabu
Olwaandiko óolu lwaandikilwe na Paulo entumwa ya Kristu (1:1). Akaandikila omuuntu óogwo akaba naayetwa Timoteo, kuluga omumuzihwa gwa Lusitira. Nyina wa Timoteo akaba ali Omuyahudikázi, iíse nawe akaba ali Omuyunani (osome Amakúlu ge Entumwa 16:1). Timoteo akachuunguka ha muhaanda gwe emilimo ya Paulo, niyo ensoonga Paulo naayeta Timoteo aáti, “Mwaana waanze owa amazima omu kwiikiliza (osome 1 Timoteo 1:2).” Timoteo akalibata hamo na Paulo omumilimo zo kwoólekeelela Empola Nzima habwa Yeézu Kristu, (osome Amakúlu ge Entumwa 17:14-15; 18:5). Byaakáaba nka nikwo Paulo akaandika olwaandiko óolu, omumwaaka gwa 65 bulugiilila omukuzaalwa kwa Kristu. Paulo obuchilo acháali atakaandikile olwaandiko óolu, akamuha Timoteo omulimo gwo kweémeelelela abeésigwa abali omumuzihwa gwa Efeso (1:3).
Ensoonga ya Paulo kwaandika olwaandiko óolu, ekaba éeli, kumugaambila Timoteo akazeendele akalikweendelwa omukutooza no kweégesa abanyaampala be ekelezia na abaheéleza. Paulo akeenda nka nikwo, Timoteo na abanyaampala áabo babe abaantu abatali abaheni, beegese amazima na akazeendele kaluunzi ha abeekiliza. Kaandi, akaba ayina ensoonga kumugaambila Timoteo nka nikwo, aábe emanyiso nzima ha abaantu bóona (4:11). Ensoonga yoómwe eéndi, ekaba éli yo kumwoólekeeleza Timoteo kubazuna abeekiliza omuli áago agasobile agaabele galiho. Kaandi, Timoteo aábe na amagala kwáanga ameégeso góona age ebisuba (1:3-7; 4:1-5; 6:3-5).