Paulo Naabagaambila Abakristu Bamusabile Hamo na Bazeenzíbe
3
1 Kulugiilila áaha, beene béetu, mutusabile nka nikwo Empola habwo Omukáma Yeézu zizeendelele kusaámbaala bwaangu, kaandi abaantu baziinaánkule ahi ikuzo, nkóokwo bikaba bili hali íimwe. 2 Mutusabile kuba Múungu atuchuúngule kuluga omu baantu abaheni na abazilwa, ha kuba tí bóona abéena okwiikiliza. 3 Náho Omukáma no omweésigwa, weényini alaábagumya íimwe na kubeékomya habwo óogu Omuzilwa.a 4 Náwe omukáma naatuha itegezo liháango habwi íimwe nka nikwo, óobu nimukola áago nigo tulikubalagila, kaandi mulaázeendelela kugakola. 5 Omukáma ayebeembelele emiganya yaanyu omu ngoonzi za Múungu no kweégumisiliza kwa Kristu.Mulyaálibona Habwo Obuléenga
6 Beene béetu, nitubalagila ahi izíina lyo Omukáma wéetu Yeézu Kristu nka nikwo, mweésoloole na buli mweene wéetu weéna wéena óogwo ali omuléenga, óogwo atakukuláatila ebyeégeso éebyo mweenaánkwiile kuluga ahali íichwe. 7 Nitugaámba tútyo, ha kuba íimwe nimusoomboókelwa óokwo mulikuhikiililwa mutooléze omususano gwéetu. Obuchilo tukaba tuli hamo neemwe, tukaba tutali abaléenga, 8 kaandi tukaba tutalya ebyookulya ha muuntu weéna wéena tutéena kubilihila. Tukaba nitukola emilimo aha bweeyomeleza, omuchilo na nyemisana, tubone kuleka kutuunkumalila omuuntu weéna wéena omuli íimwe. 9 Tukakola tútyo, tiyo nka nikwo tukaba tutakugasa kubonesa chiintu kuluga hali íimwe, náho tukeenda tube emanyiso hali íimwe mubóne kututoóleza. 10 Kaandi kátwaabeele tuli hamo neemwe, tukabalagila tuti, “Omuuntu weéna wéena óogwo atakwéenda kukola emilimo, atalya byookulya.”
11 Tugaambile amagaambo áago ha kuba tuhuliile nka nikwo, baliho abaandi hali íimwe áabo bali abaleenga, tibakukola choóna chóona, náho nibeetwaalalika omu magaambo ga abaandi. 12 Abaantu áabo nitubalagila no kubaneémbelela ha izíina lyo Omukáma Yeézu Kristu nka nikwo, babe nibakola emilimo ha buteékaani, babonese ebyookulya byáabo boónyini. 13 Náho íimwe beene béetu, mutaákufwa omuganya omukukola ebizima.
14 Kaálaaba omuuntu weéna wéena atakwéenda kweékomya ebilagilo byéetu éebyo bili omu olwaandiko óolu, óogwo mumweékomye bwooli. Mutaákutulaanila hamo náze, abone kukolwa ensóni. 15 Bityo mutamuléeba nko omubisa, náho mube nimumuhana nka mweene wáanyu.
Empola Zo Kulaga
16 Mbweenu, Omukáma Yeézu weényini, óogwo ali ensiimbililo yo obuhóolo, aábe naabaha obuhóolo emihaanguko zóona omu mihaanda yóona. Weényini aábe hamo neemwe mwéena. 17 Iinye Paulo niimbaandikila enyaángalucha éezi aha ngalo záanze iinye nyini. Éezi niyo emanyiso omu byaandiko byáanze byóona, na niko akaandikile kaanze.
18 Embabazi zo Omukáma wéetu Yeézu Kristu, zíbe hamo neemwe mwéena.