Olwaandiko Lwo Kubáanza Lwa Paulo Ha
Abateesalonike
Obweébeembezi Bwe Echitabu
Olwaandiko óolu no lwa Paulo, entumwa. Akaandika olwaandiko óolu ali hamo na Silwaano na Timoteo. Akaandika habwa abeekiliza áabo bakaba bali omumuzihwa gwa Teesalonike. Paulo akaba ali entumwa óogwo akaba naayolekeelela Empola Nzima habwa Yeézu Kristu, ha Abayahudi na ha abaantu áabo Abanyamahaánga.
Paulo na bazeenzíbe, kabaahikile omuunsi ya Bugiriki, yaáyolekeelela no kugumisa ekelezia omumuzihwa gukúlu gwo omuchaalo cha Makedonia. Omuzihwa óogwo gukaba nigweétwa Teesalonike (Osome omu chitabu che Amakúlu ge Entumwa omulyáango gwe 17). Abaantu be emitulaanilo ezilekéene zilekéene bakeekililizana ne empola zoómwe. Paulo kayaagumisize ekelezia ya áaho Teesalonike, ebyaágalazo biháango byáabaanza kubaho ha beekiliza. Okwaágalazwa óokwo kukaba nikukolwa na Abayahudi. Paulo yaalamula kulugáho chihahwe. Kayaaluguleyo óokwo, no kulemwa kusubayo kaandi, yaamusiíndikayo muzeenzíwe óogwo akaba ayetwa Timoteo, azeénde Teesalonike kubatiimbya emiganya abeekiliza bo óokwo. Paulo weényini talaziileyo óokwo, akazeendelela kwoólekeelela amahaánga agáandi. Omwáanya muche kagwaahweele, Timoteo yaasuba hali Paulo, yaamutwaalila empola habwo okwiikiliza na akeekalile ka aba Teesalonike. Paulo káyaahuliile empola éezo, yaanulilwa bwooli, yaabasiindikilayo olwaandiko lwo kubasiingiza, no kuboóngela ameégeso agáandi. Akabagumya emiganya babone kuzeendelela kutuula akeekalile áako áabo kalikumugomokela Múungu. Empola éezo, noozisaánga omu lwaandiko lwo okubáanza lwa Paulo ha Bateesalonike. Akaandika habwo okugima habwe ebyaágalalo, na habwo kuba ne ensoonga nka nikwo, Yeézu alaásuba na abeekiliza balaatuúla hamo náze. Paulo akagaamba echigaambo Okutegeza, ha kuba ne ensoonga nka nikwo, Yeézu alaásuba.