4
1 Ha bwéecho, badugu báanze enfula, nniimbeénda na nyina echihika cho kubonana neemwe, mwiimeelele bweémi omu kumutegeza Omukáma Yeézu. Mazima na habwe ensoonga yéenyu nka nikwo niímba na manulilwa no kwiinaankula ensiimi yo obusíingi.aPaulo Naalagíla
2 Euodia na Siintike, nniimbasaba bwooli mutuule omu kuhuliilizana no okuba ne echihika chimo, habwo kuba bóona nimuteelana no Omukáma Yeézu. 3 Éego, nóobu iiwe, omuhálila muzeenzi waanze omweésigwa, nniinsaba obahwéele abakázi bábili áabo babe ne echihika chimo. Áabo bakakola echifu bwooli kusuugaanisa Empola Nzima hamo neenye, na hamo na Klemeenti na abahalila bazeenzi baanze abáandi. Áabo amazíina gáabo góona gaandikilwe omu chitabu cho obulami.b
4 Munulilwe habwo kuba nimuteelana no Omukáma Yeézu. Kaandi nniingaámba munulilwe! 5 Obufula bwaanyu bumanyiike aha baantu bóona. Omukáma Yeézu ali héehi. 6 Mutakwiiyagalaza aha chigaambo choóna chóona, náho habwa buli chigaambo, mumumanyise Múungu byóona ebyo kubatúunga, aha kusaba no kutweézela, hamo no kusiima. 7 No obuhóolo bwa Múungu, óobwo obuchila amasala góona ga abaantu, nibubeemanya emiganya yaanyu no obweenze bwéenyu omu kuteélana kwéenyu na Kristu Yeézu.
8 Niho, badugu báanze, muteekúze kwoónka amagaambo ago kweésigwa, amagaambo áago nigeendelwa kuzililwa isima, amagaambo aga amazima, amagaambo áago tigéena obuzilwa bwoóna bwóona, amagaambo áago agasemiile, amagaambo age echikumuuko chizima bwooli, amagaambo ago obugololoke bwoóna bwóona, na amagaambo ageene ilangaano lizima. 9 Muzeendelele kukola áago mukeéyega no kwiinaankula kuluga hali íinye. Mukole áago mwaahuliile nniimbasomboólela na áago mukabona naakozile. Niho, Múungu óogwo alikubaha obuhóolo naazeendelela kuba hamo neemwe.
Paulo Naabasiima Abafilipi
10 Nkanulilwa bwooli omu kuteélana no Omukáma Yeézu, habwo kuba, ha muheleeluko nimwiizuka kuunteékuza kaandi. Niinsoombookelwa nka nikwo, mukaba nimunnteekuza omwáanya gwóona, náho mukabulwa omwáanya gwo kuunnsiíndikila echo kuunnzuna. 11 Tiínkugaamba íintyo habwo kuba nniimbulabulilwa ebyo kuunzuna, mmahi. Íinye inyiyegile kwiikililizana na choóna chóona éecho nyinacho. 12 Nniimanya kutúula nko omuhabi, kaandi nniimanya kutúula nko omuhíte. Inyiyegile kwiikililizana na choóna chóona éecho echilanyemaho, bube obuchilo bwo kuhaaga, nali obuchilo bwe enzala, eébe obuchilo bwo kuba na biinzi, nali obuchilo bwo kucheehelelwa. 13 Nniinhicha kukola góona áago, habwo kuba Kristu niwe óogwo alikuuntamo amagala.
14 Nóobu tútyo, mukakola kuluunzi kukoba hamo neenye omu ebyaágalalo byaanze. 15 Íimwe Abafilipi, nimumanya kuluunzi nka nikwo, kulugiilila obuchilo nnkabaanza kuboólekeelela íimwe Empola Nzima no obuchilo naalugile omuchaalo chéenyu cha Makedonia, íimwe nyini nibo mukaba nimuumpweela. Ekelezia yéenyu niyo yoónka ekakobana neenye omu kusohoza no kwiinaankula ebiintu. 16 Nóobu obuchilo nkaba ndi óokwo Teesalonike, mukaba nimuuntweékela ebiintu byo kuumpweela, ti entulo eémo yoónka. 17 Tiínkugaamba iintyo habwo kuba nniinyeénda kwiinaankula ebiintu kuluga hali íimwe, náho nniinyeénda mbone emigisa éezo Múungu alikubaha zoongelwe habwo okwéela kwe emiganya yéenyu. 18 Ebiintu byóona éebyo mwaantweékiile kulabila Epafrodito, naabinaánkula. Byaahikiliza kumala byoona ebyo kunntuunga, kaandi bisaagiliize óokwo naayeenzile. Echo kuunnzuna éecho chibeele nke echitáambo echiina emizeeze emiluunzi, nicho echitáambo éecho Múungu naachikuúnda no kuchéenda. 19 Mbweenu buli éecho mulikweenda Múungu wáanze naabaha kwiingana na obuhite bwoómwe buháango. Alaákola aátyo kulabila Kristu Yeézu.
20 Múungu, Isiichwe, akuzibwe obucha no obuchiile. Amina.
Amagaambo Go Kulaga
21 Mubaángaluche abatakatíifu bóona ba Kristu Yeézu óokwo Filipi. Abahalila bazeenzi baanze áabo abali hamo neenye, nabo nibabaangalucha. 22 Kaandi abatakatíifu bóona áabo abalikutuula omuchaalo éechi nibabaangalucha, muno muno abeekiliza áabo abalikutuula aha chikaali cho Omukáma wa Ruumi.
23 Embabazi yo Omukáma wéetu Yeézu Kristu eébe hamo neemwe mwéena.