Paulo Naamutegeza Kristu Weénka
3
1 Ha kuheleeluka, badugu báanze, munulilwe habwo kuba nimuteelana no Omukáma Yeézu!Amagaambo áago ndamazile kubaándikila, tiinkulemwa kugasubilila kaandi áaha, habwo kuba nniinsoombookelwa nka nikwo nigakweemanya okwiikiliza kwéenyu. 2 Mweélige na abeégesa abazilwa, áabo bali nke éembwa enduluhe, boónyini bakomeenteleza nka nikwo abeekiliza bóona nibeendelwa kusálwa ikóba lyo obuséeza.a Ha bwéecho mweélige na áabo abakola obuzilwa. 3 Íichwe nibo tusázilwe omu miganya yéetu,b habwo kuba Omwooyo gwa Múungu nigutuhweela kulamya Múungu. Íichwe nitweesiimila Kristu Yeézu no kumutegeza weényini kwoónka. Titukutegeza amagaambo go omumubili habwo obuchuúnguzi, 4 nóobu íinye nyini nyinayo ensoonga yo kutegeza amagaambo go omumubili. Lúundi ngaambe nka nikwo, kaálaaba aliho omuuntu óogwo naayeleeba ayina ensoonga yo kutegeza ebikolwa byo omumubili, íinye nniinsaága bwooli kuchila weényini. 5 Íinye nkasálwa echilo cha munáana kulugiilila obuchilo naazéelwe. Íinye no Omwiiziraeli kuluga omu olugaanda lwa Benyaámini. Íinye no Omuhebrania wa mazima. Omu kweékomya ebilagilo bya Musa, íinye nkabyeékomya kuluunzi bwooli, habwo kuba nkaba ndyo Omufalisayo. 6 Kaandi nkeéyomeleza bwooli kukola áago nkaba nniinzila nka nikwo nigamusemeleza Múungu. Éecho nicho chikaankola mbaágalaze abeekiliza ba Yeézu Kristu. Omu kweékomya ebilagilo bya Musa, nkaba ndyo omuuntu owe ntúungwa nzima, ntéena kábi koóna kóona.
7 Náho, áago góona áago nkaba nniimbóna nka nikwo geena omugaso hali íinye, óobu nniimbóna nka nikwo na gatéena mugaso, habwo kuba óobu nniimukulaatila Kristu. 8 Éego, ta áago kwoónka, náho nniimbóna góona kuba agatéena mugaso kaándikugeénganisa no omugaso muháango gwo kumumanya Kristu Yeézu, Omukáma wáanze. Nndekile agáandi góona habwa weényini, ensoonga yaáho mbonesize omwaabo gwa amagaambo góona naagabala kuba nke ebitaaba mbone kumumanya Kristu, 9 no kukwaátaangana náwe. Tiínkutegeza kaandi kuba owe ntúungwa nzima habwo kweékomya ebilagilo bya Musa, náho nniitegeza kuba owe ntúungwa nzima habwo kumwiíkiliza Kristu. Múungu naampeétela kuba omuuntu owe ntúungwa nzima habwo kuba nniimwiikiliza Kristu.
10 Nniinyeénda immumanye Kristu bwooli no kusombookelwa obuhicha bwo kuzooka kwoómwe. Nniinyeénda nteelane hamo náze omu byaágalazo byoómwe, kaandi nniinyeénda kususana náwe omu olufu lwoómwe. 11 Nniinyeénda amagaambo áago, mbone kuba omuli áabo baantu áabo Múungu alizoola kuluga omu bafwiile.
Kweéyomeleza Kuhika Omu Mbalililo
12 Tiínkugaamba nka nikwo naámazile kubonesa áago góona, nali nka nikwo naámazile kuba ahikile, mmahi, náho nniinzeendelela kweéyomeleza kuba nchikwáate éecho. Kuba nicho éecho Kristu Yeézu yaantoóliize. 13 Badugu báanze, tiínkweebala nka nikwo naámazile kweékomya áago góona. Náho nniinkola echiintu chimo éechi, kweebwa áago gali enyuma no kweékomeenteleza áago agali omuméeso. 14 Nniinyeeyomeleza omu kusiingaangana kuba aha muheleeluko mbone obusíingi no kuhaabwa ensiimi yaanze. Múungu weényini anyesile kubonesa ensiimi éezo yo kuza omu igulu kulabila hali Kristu Yeézu.
15 Ha bwéecho, íichwe twéena áabo twaákomiile omu okwiikiliza kwéetu, nitweendélwa kuteékuza tútyo. Keelaaba mwíina amateékuzo áago agatakususana na áago, Múungu niwe alaabasuúlulila nkokwo gali. 16 Mbweenu, echiintu che ensoonga óobu ni nka nikwo, tuzeendélele kweékomya amagaambo áago twaámazile kugeékomya.
Abeekiliza Batoólele Akazeendele Ka Paulo
17 Badugu báanze, íimwe mwéena mutoólele akazeendele káanze. Kaandi mutoólele kuluga aha abaantu áabo abalikutoólela akazeendele kéetu. 18 Naámazile kubasoomboolela entulo nyiinzi, no óobu nniingaámba kaandi nniinchula habwa amaziga nka nikwo, baliho abaantu béenzi áabo abalikutuula nka ababisa bo obuchuúnguzi óobwo bukakolwa na Kristu ahamusalaba. 19 Abaantu áabo balyaásikiizwa ha muheleeluko, ha kuba etuúnku yáabo niyo Múungu wáabo. Boónyini nibeesiingiza ebikolwa byáabo bye ensóni, kaandi nibateékuza kwoónka amagaambo ge éensi éezi.
20 Náho íichwe, obutúuzi bwéetu buli omu igulu, na nituliindilila aha chihika chiháango Omukáma no Omuchuúnguzi wéetu Yeézu Kristu, ayize kuluga óokwo omu igulu. 21 Weényini ayina amagala go kutaho ebiintu byóona bibe ahaansi yo obutégeki bwoómwe. Aha omuháanda gwa amagala áago, naazihiindula emibili yéetu yo kweélemwa no okusiisikala, eébe ni ikuzo nko omubili gwoómwe óokwo guli.