Okutoólela Obuchuleezi Bwa Yeézu Kristu
2
1 Mbweenu, habwo kuba guliyo omusemelo omu kukwaátaangana na Kristu, na nimusemelezwa ne engoonzi zoómwe, na mwíina obumo no Omwooyo Mutakatíifu, no kweendwa no kuzililwa echiganyizi na Kristu, 2 mwiizulize amanulilwa gaanze! Mube na akateékulize kámo na mweendane íimwe omuli íimwe, kaandi mube no obumo omu miganya yéenyu na mube ne chihika chimo. 3 Mutakola echigaambo choóna chóona aha lwaango nali habwo obugéega. Náho mube no okweécheesha na mube abalikubona abáandi kuba be ensoonga bwooli kuchila íimwe nyini. 4 Buli oómo ataákuteekuza amagaambo goómwe weényini kwoónka, náho kaandi ateekuze amagaambo ga abáandi.5 Mube ne echihika éecho nyini éecho akaba ayinacho Kristu Yeézu.
6 Nóobwo aha bubaandizo entabuko yoómwe akaba ali Múungu weényini,
náho talabweene nka nikwo ni kuzima asigale akwaatiliile éecho.
7 Ha bwéecho, yaalamula kulekulila éelyo ikuzo,
yeécheesha, yaaba nko omuzáana okwo aáli,
yaazaalwa nka abaantu, yaaba omuuntu butúnu,
8 náwe akeéchuleeza,
no kukoondooka, kuhika ha kaanya ko kufwa,
éego, olufu ahamusalaba!
9 Habwe ensoonga éezo, Múungu yaámuswaalula Yeézu ha lugulu kusaaga ebiintu byóona,
yaámuha izíina éelyo lilikukulila amazíina góona,a
10 kuba habwi isima li izíina lya Yeézu,
ebihaángwa byóona ebyo omu igulu, ebyo omúunsi, ne ebya kuzimu,
biteéle ebizwi hali weényini,
11 na buli lulimi lwiikilize nka nikwo Yeézu Kristu niwe Omukámab
ahi ikuzo lya Múungu Táata.
Abeekiliza Babe Nko Omwaanga Omúunsi
12 Mbweenu, enfula záanze, obuchilo óobwo naabeele ndyo owéenyu, mukaba nimumukoondookela Múungu buchiile. Bityo nyini, nóobu aha obuchilo óobu ndi hala neemwe, muhikiilize obuchuúnguzi bwéenyu aha kutíina no kweéganya, nka abaantu abachuungwiilwe na Múungu. 13 Habwo kuba Múungu niwe alikukola emilimo omuli íimwe, okweenda kwéenyu ne ebikolwa byaanyu bibe byo kuhikiiliza echihika choómwe chizima.
14 Amagaambo góona áago mulikukola, mugakole mutéena kudugulima nali kuzogootana, 15 mubóne kuba abaantu baluunzi áabo abatéena kábi koóna kóona. Mube abaana ba Múungu áabo abatakugaambwa obubi na abaantu bo oluzáalo óolu óolwo lwiizwiile ebiheno no kuchulika ebigaambo. Ahagáti ya abaantu áabo, íimwe mususe nke emyaanga éezo elikumulika omuunsi. 16 Mubalaanganile abaantu echigaambo cha Múunguc éecho chibaha obulami bwo bucha no buchiile. Kamulikukola mútyo, íinye nniinhicha kweésiimaho omu chilo éecho cha Kristu Yeézu alisuba, habwo kuba chilaábonwa nka nikwo emilimo éezo neegumisizeho kuzikola omuli íimwe, tiindeéyagaleeze busa.
17 Nóobu kabilaaba niínfwa ne enságama yaanze neesohozwa nke echitáambo che evíini ahi itaámbilo hamo ne echitáambo cho okwiikiliza kwéenyu habwa Múungu, íinye nniinulilwa, kaandi nniinulilwa hamo neemwe mwéena. 18 Neemwe kaandi bityo nyini munulilwe, kaandi munulilwe hamo neenye.
Paulo Alaábasiíndika Timoteo Na Epafrodito
19 Omukáma Yeézu kaálayeénda, nniintegeza kumusiíndika Timoteo kwiiza hali íimwe zuba zuba, mbone kuguma omuganya habwo kuhulila empola zaanyu obuchilo alisuba kunu hali íinye. 20 Niimusiindika weényini, habwo kuba tinyina omuuntu oóndi óogwo alikubeemanya íimwe habwo omwooyo gwóona nka Timoteo. 21 Abáandi bóona nibeemanya amagaambo gáabo kwoónka, tibakweemanya kukola amagaambo áago Yeézu Kristu naayeénda. 22 Náho íimwe nimumanya óokwo Timoteo ayeyolekile kuba omuuntu muluunzi. Akozile emilimo yo kusuugaanisa Empola Nzima hamo neenye, nko omwaana ne eése. 23 Ha bwéecho, nniintegeza nka nikwo nniimusiindika hali íimwe ntéena kwiílilwa, obuchilo óobwo ndamanya nka nikwo amagaambo gaanze nigazeendelela áaha omwiibóhelo. 24 Kaandi nniintégeza nka nikwo Omukáma Yeézu nakuúnda íinye nyini nyize hali íimwe zuba zuba.
25 Íimwe mukamusiindika Epafrodito hali íinye kuumpweela no kunheéleza omu byaanze byo kuuntuunga. Óobu, nniimbóna nka nikwo ni kuzima immusiindike asube kaandi hali íimwe. Epafrodito ni mudugu waanze, akozile emilimo ya Múungu hamo neenye, na yaábeele amulwaanila ngoma muzeenzi waanze omu kuzilwaanila Empola Nzima. 26 Habwo kuba mbele naaligila kubonana neemwe mwéena. Kaandi omwooyo gwoómwe niguzololokelwa habwo kuba mwaáhuliize nka nikwo akaba naalwaála. 27 Mazima akaba naalwaála bwooli, akaba ali aha chihalala, náho Múungu akamuzilila echiganyizi, yaámuchiza. Ti nka nikwo Múungu akamuzilila echiganyizi weényini weénka, nóobu íinye akaanzilila echiganyizi, mbone kuleka kuzololokelwa habwo obuzune.
28 Ha bwéecho, nniinyeénda bwooli kumusiíndika asube hali íimwe zuba zuba, kuba obuchilo kamulamubona kaandi, mubóne kunulilwa. Niho nóobu omuganya gwaanze gulaachuleela. 29 Mbweenu, mumwiinaánkule aha manulilwa maháango, aha kuba ni muzeenzi wáanyu omu kumwiíkiliza Omukáma Yeézu. Nimweendelwa kumukúza omuuntu nko óogwo, 30 habwo kuba akaba ayililize kufwa habwe emilimo ya Kristu. Mazima akaleetelela obulami bwoómwe abone kuúnhikiza amagaambo go kuúnzuna áago íimwe nyini timwaákuhichize kugaánhikiza kuba mukaba muli hala.