Olwaandiko Lwa Paulo Ha
Abafilipi
Empola
1
1 Íinye Paulo, hamo na Timoteo, omuzáana muzeenzi waanze omuli Kristu Yeézu, nniimbandikila íimwe abatakatíifu bóona, áabo muli omumutégeko gwa Kristu Yeézu hamo na abahalila na abeémeelelezi, abo omu chaalo cho óokwo Filipi.2 Embabazi no obuhóolo ebilikuluga hali Isiichwe Múungu, na aha Mukáma Yeézu Kristu, bibe hamo neemwe.
Paulo Naasiima No Kubasabila Abafilipi
3 Buli kubateékuza, mba nniimusiima Múungu waanze. 4 Kaandi, buli kaanya óobu mba nniimbasabila íimwe mwéena, mba nniinsaba aha manulilwa, 5 habwo obumo bwéenyu omu kwoólekeelela Empola Nzima, kulugiilila echilo éecho cha mbele kuhicha leélo éeli. 6 Ne eenye éecho ndikweétegeeleza nka nikwo Múungu óogwo ataandikile omulimo óogu muluunzi omumiganya yaanyu, alaáguzeendeleza kuhicha aguhikiilize aha chilo éecho Kristu Yeézu alisuba.
7 Nniinyeendelwa kubateékuliza éebi habweenyu mwéena habwo kuba íimwe muli omumuganya gwaanze, nniimbeénda bwooli. Mukobeene hamo neenye omu mbabazi yo kukola emilimo yoómwe, keelaaba mbohilwe omwiibóhelo nali keelaaba nniintoonganila no kusuumba amazima ge Empola Nzima. 8 Kuba Múungu ni lubona waanze, niindígila bwooli kubonana neemwe kaandi. Naamanya nka nikwo nniimbeénda aha ngoonzi ezo nyini nka Kristu Yeézu kwa abeénda.
9 Nniimbasabila ahali Múungu nka nikwo engoonzi zaanyu zizeendelele kwoongela bwooli hakusaagiliza, omu bweétegeelezi na amasala góona, 10 mubóne kusombookelwa áago ageene omugaso. Áaho niho nimuba abeena emiganya miluunzi, kaandi nimuba batéena kábi kuhicha echilo éecho Kristu alisuba. 11 Obulami bwéenyu nibuba bwiizwiile amagaambo ge ntúungwa nzima áago agalikubonwa aha muháanda gwa Yeézu Kristu. Áago góona na habwo kumusiima no kumukúza Múungu.
Paulo Naasiima Nka Nikwo Empola Nzima Ya Kristu Nelangaanwa
12 Mbweenu, badugu baanze, nniinyeénda musoomboókelwe nka nikwo, amagaambo góona áago agaangwiilemo gahweéliile bwooli kukumuucha Empola Nzima. 13 Habwa áago, abazunangoma bóona be echikaali chikúlu cha áaha cho omutégeki Kaizaali, hamo na abáandi bóona, nibasoomboókelwa nka nikwo mbohilwe habwo kumuheéleza Kristu. 14 Hamo na áago, nniinsoombookelwa nka nikwo óoku kubohwa kwaanze kukozile abeekiliza bazeenzi béetu béenzi batiimbibwe emiganya no Omukáma Yeézu. Ha bwéecho, beenaankwiile obugimi bwooli kwoólekeelela abaantu echigaambo cha Múungu batéena kutíina.
15 Na mazima nka nikwo, baliho abáandi áabo balikwoólekeelela empola habwa Kristu ahi ichubi na aha ndwaana. Nóobu bityo, baliho abáandi áabo balikwoólekeelela aha chihika chizima. 16 Abeena echihika chizima niboolekeelela aha ngoonzi, habwo kuba nibasoomboókelwa nka nikwo Múungu anntoolize mbone kutoónganila Empola Nzima. 17 Náho áabo abeene ichubi, baaba niboolekeelela empola habwa Kristu aha lwaango, mala ti habwe echihika cha amazima. Áabo nibateékuza kwoongela olwaágalalo lwaanze omwiibóhelo.
18 Náho chisaasize chi? Ti kaantu, íinye nniinulilwa kabilaaba empola habwa Kristu nizoolekeelelwa, eébe ahi ichubi nali aha chihika chizima. Kaandi nniinzeendelela kunulilwa, 19 habwo kuba nniinsoombookelwa nka nikwo omuli byóona éebyo ebingwiileho, nniinchuungulwa. Bilyáaba bityo, habwo kuba nimuunnsabila ahali Múungu, no Omwooyo Mutakatíifu gwa Yeézu Kristu niguunzuna. 20 Nyina echihika chiháango ni itegezo lyaanze ni nka nikwo, tiínkukola choóna chóona echokuúnziza ensoni nakáti, náho nniinzeendelela kumulamiliza Kristu aha bugimi buháango omuli góona áago ndikukola. Niinkola ntyo omwáanya gwóona, nóobu nyini, eébe nniinsigala omulame nali eébe niínfwa.
21 Habwo kuba obulami bwaanze nibuba bwo kumukolela Kristu. Kaandi kiíndaáfwa, kufwa kwaanze nikuba omugaso bwooli, habwo kuba nniímba hamo na Kristu. 22 Náho kiíndaasigalila omulame omúunsi, nniinhicha kuzeendelela kubona amagoomba ge emilimo éezo ndikukola. Óobu tiínkumanya nsole chiíha! 23 Nnichiindemeélela iinye kusola omu magaambo ábili. Nniindígila kuluga lugulu éezi mbone kúba hamo na Kristu, habwo kuba éecho nicho echigaambo chizima bwooli hali íinye. 24 Náho, hali íimwe ne echigaambo chizima bwooli keelaaba nzeendelele kutúula omúunsi éezi. 25 Mazima nyina obweétegeelezi habwe echigaambo éecho, ha bwéecho nniinsoombookelwa nka nikwo nniinzeendelela kutúula omúunsi no kuba hamo neemwe mwéena, mbone kubahwéela muhiche kukula no kunulilwa omu kwiikiliza kwéenyu. 26 Obuchilo óobwo ndaaba ndi hamo neemwe kaandi, nimuzila omweésiingizo habwa Kristu Yeézu habwo kubaho kwaanze hali íimwe.
Akazeendele Akalikweendelwa Ne Empola Nzima
27 Mbweenu, akazeendele kaanyu kabe óokwo elikweendelwa ne Empola Nzima habwa Kristu. Áaho kaandeeza kubaleeba nali nóobu nteezile, nniinyeénda kuhuliza nka nikwo nimuzeendelela kweémeelela bweémi no kuba no obumo, kunu muli hamo aha kutoónganila okwiikiliza kwe Empola Nzima. 28 Kaandi mutaákutiina ababisa baanyu no obuche bwa akáti. Bityo, obugimi bwaanyu nibubooleka butúnu nka nikwo boónyini niboolekela omu kusiingaalichwa, náho íimwe nimwoolekela kuchuúngulwa. Éebyo byóona nibiluga hali Múungu. 29 Habwo kuba muheelwe busa buli chiintu habwo kumugomookela Kristu, ti ha kumwiíkiliza kwoónka, náho ha kwaágalazwa habwa weényini. 30 Nimusiingaangana na áago nyini áago nkaba nniinsiingaangana nago, nko óokwo mukabona. Kaandi nóobu nyini nimuhulila nkokwo nniinzeendelela kusiingaangana nago.