Olwaandiko Lwo Kubáanza Lwa Paulo Ha
Abateesalonike
Empola
1
1 Iinye Paulo, hamo na Silwaanoa na Timoteo. Nitubaandikila íimwe áabo muli omukelezia yo omumuzihwa gwa Teesalonike, áabo muli embága ya abaantu áabo mumwiikiliize Isíichwe Múungu hamo no Omukáma Yeézu Kristu.Embabazi no obuhóolo kuluga hali Múungu zibe hamo neemwe.
Okusiima Habwo Obweésige Bwa Abateesalonike
2 Nitumusiima Múungu buchiile habwi íimwe mwéena, na nitubasabila obutóosa. 3 Katulikubasabila hali Isíichwe Múungu, nitwiizuka obutóosa omuméeso goómwe omulimo óogwo mulikukola habwo okwiikiliza. Nitwiizuka echifu chéenyu éecho chilikuluga aha ngoonzi zéenyu, kaandi okweégumya kwéenyu okulikulugiilila omukutegeza óokwo twiina ha kusuba kwo Mukáma wéetu Yeézu Kristu.
4 Íimwe beene béetu, áabo muli enfula za Múungu, nitusoombookelwa nkokwo mtooziibwe na Múungu kuba abaantu boómwe. 5 Nitusoomboókelwa tútyo, habwo kuba obuchilo twaayolekeeliile owéenyu Empola Nzima, titulayolekeeliile ha magaambo kanaku goónka. Náho tukoolekeelela ha buhicha na ha Omwooyo Mutakatíifu, twíina ne echihika nka nikwo empola éezo ne eza amazima. Íimwe nimusoomboókelwa óokwo twaabele tuli hamo neemwe, tubone kubahwéela. 6 Nóobwo mukaágalazibwa bwooli habwo okwiikiliza kwéenyu, mkeenaankula empola éezo ha manulilwa áago agalikuluga ha Mwooyo Mutakatíifu. Nka nikwo mwaakozile mútyo, mukasubiiliza omususaniso gwéetu no omususaniso gwo Omukáma Yeézu. 7 Niho omuli áago, mubeele emanyiso nduunzi aha abeekiliza bóona abali omuchaalo cha Makedonia na aba Akaya. 8 Kuluga omuli íimwe, Empola habwo Omukáma Yeézu ehuliílwe. Tiyo kwoónka ha abaantu bo omuli Makedonia na abo omuli Akaya, náho okwiikiliza kwéenyu hali Múungu kukumuukile hoona. Habwa éecho titukweéyagalaza kugaamba choóna chóona. 9 Abaantu boónyini nibasoomboola habwa akazeendele áako mwaatwiinaánkwiile obuchilo tweezile hali íimwe. Nibateékelela nka nikwo mwaabilekile ebisusano byéenyu no kumusubila Múungu, mubóne kumuheéleza weényini óogwo ali omulami na niwe owa amazima, 10 no kumuliindilila omwaana woómwe Yeézu kuluga omwiigulu. Weényini akazoolwa na Múungu, kaandi niwe alikutuchuúngula omu chihulumuko cha Múungu echilikwiiza.