Omulimo Gwa Paulo Na Bazeenzíbe Óokwo Teesalonike
2
1 Íimwe beene béetu, íimweényini nimusoomboókelwa nkokwo íichwe kwiiza hali íimwe, tikulabeele kwa busa. 2 Kaandi nimusoomboókelwa nka nikwo obuchilo tuchaali kuhika hali íimwe, tukaágalazwa no kuzúmwa omumuzihwa óogwo gwa Filipi. Nóobwo hali íimwe hakaba heena okusiingaangana kuháango, náho Múungu akatuha obugimi bwo kwoólekeelela Empola zoómwe Nzima.3 Amagaambo áago tulikukomeenteleza hali íimwe, titukweenda kubahabisa, nali kuboólekeelela ha bwe ensoonga mbi yo obucheluke, nali obugóbya, nali oluhagali. 4 Náho nitwoolekeelela habwo kuba tukakuundilwa na Múungu kutegezwa ne emilimo yo kwoólekeelela Empola Nzima. Titukutegeza kubanuliza abaantu, náho nitweénda kumunuliza Múungu, óogu alikugema góona áago gali omuunda omu miganya yéetu. 5 Nimusoomboókelwa nka nikwo, tukaba titukugaamba empola mubóne kutunulilwa, noobwo kugaamba ebigaambo éebyo bitali bya amazima kuba tubone omugaso. Múungu ni lubona! 6 Kaandi tukaba tutakuloondela echikumuuko kuluga ha abaantu, noobwo kuluga hali íimwe, noobwo kuluga ha abaandi bóona. Nóobwo íichwe ne entumwa za Kristu, na twaakaáhichize kweenda ebiintu bunaanka kuluga hali íimwe, náho titulakozile tútyo. 7 Tukaba tuli abafula hali íimwe nko omukázi obuchilo naayemanya abaana boómwe. 8 Tukabazilila engoonzi íimwe bwooli. Niho tukanulilwa tí habwo kubaha Empola Nzima ya Múungu yoónka, náho kaandi kubaha omwáanya gwéetu na amagala géetu, habwo kuba íimwe mwaaba enfula zéetu.
9 Beene béetu, nimwiizuka echifu chéetu no kwaágalala kwéetu, twaabele nitukola emilimo omuchilo na nyemisana. Tukakola tútyo kuba tutaákwiiza kwaágalaza omuuntu weéna wéena omuli íimwe obuchilo nitwoolekeelela Empola Nzima ya Múungu. 10 Íimwe ni baalubona béetu, na Múungu nawe ni lubona nka nikwo twaatuleene neemwe abeekiliza, tukaba na entuungwa zéetu nzima, kaandi zo obuteéka, na tutéena kugaywa. 11 Kaandi nimusoomboókelwa nkokwo obuchilo tukaba tuli hali íimwe tukaba nitubakolela mwéena nko táata óokwo alikubahana abaana boómwe. Tukaba nitubagumya emiganya no kubahooyesa no kubaneémbelela, 12 nka nikwo mube nimutooléla omubulami bwe engeso éezo Múungu alikweenda. Múungu niwe alikubaháma nka nikwo, mtaahemo omu obukáma no omu ikuzo lyoómwe.
13 Kaandi nitumusiima Múungu tutéena kwóosa, ha kuba kimwaahuliile echigaambo choómwe kuluga oweetu, timulachiinaankwiile nke echigaambo cha abaantu. Náho mkacheenaankula nke echigaambo kuluga hali Múungu, mazima nikwo bili. Echigaambo éecho nichikola emilimo omumiganya yéenyu, íimwe áabo mumwiikiliize. 14 Beene béetu, amagaambo áago nyini agaabasaangile abaantu áabo abalikumukulaatila Yeézu Kristu omumakelezia ga Múungu omuunsi ya Yudea, nigo áago nyini neemwe gabasaangile. Abaana nzaálwa bazeenzi béenyu babaagaleéze, nka nikwo Abayahudi ba óokwo baabaágaleeze bazeenzi baabo habwo kumwiikiliza Yeézu. 15 Abayahudi áabo, nibo bamwiísile Omukáma Yeézu na ababáasi ba kala. Kaandi nibo batwaágaleze neechwe. Abaantu áabo, nibamutamisa Múungu, kaandi nibo ababisa ba abaantu bóona, 16 ha kuba nibatwaangila kuboólekeelela Abanyamahaánga Empola Nzima éezo ezakubaleetiile obuchuúnguzi. Bityo nikwo nibazeendelela kuhikiiliza ebiheno byóona éebyo balikukola buchiile. Náho óobu echihulumuko cha Múungu chaábahikila!
Paulo Na Bazeenzíbe Nibazila Ensoonga Yo Kubugana Na Abateesalonike
17 Beene béetu, kulekaana kwéetu ne éemwe kukaba kuli omwáanya muche kwoónka, kaandi kulekaana óokwo kukaba kuli kwo omubili, tikwo kwe emiganya. Ha buchilo óobwo bwoona, tukaba nituligila nka nikwo tubonane neemwe kaandi. 18 Niho tukeenda twiíze hali íimwe, muno muno iinye Paulo nkaba nyeénda kwiiza buli kaanya, náho Izimu Elikúlua likatuzibila. 19 Obuchilo Omukáma Yeézu kaáleeza, ni baáhi áabo balaaba ensiimbililo yi itegezo lyéetu? Kaandi ni ba aáhi áabo balaaba ensiimbililo ya amanulilwa no omukáko gwéetu gwo kweésiingiza? Tibo íimwe? 20 Mazima, íimwe nibo áabo mulikutukola tweésiingize no kunulilwa.