Paulo Naamusiindika Timoteo Teesalonike
3
1 Hamuheleeluko twaalemwa kweégumisiliza bwooli, ha kuba titulamanyile áago agalikukolwa óokwo Teesalonike. Niho twaabona nkokwo, íichwe tusigale tweénka omu chaalo cha Atene, 2 tumusiíndike Timoteo mweene wéetu, abone kwiiza kubagumisa no kubatiimbya emiganya omukwiikiliza kwéenyu. Weényini ni muzéenzi wéetu omuhalila wa Múungu omu kwoólekeelela Empola Nzima habwa Kristu. 3 Tukakola tútyo kuba omuuntu weéna wéena ataákugwa omuganya habwe ebyaágalalo byéenyu éebi. Íimwe nimusoomboókelwa nkokwo, nitweendelwa kulabila omulwaágalalo. 4 Kuba obuchilo tukaba tuli hamo neemwe, tukaba nitubagaambila nka nikwo tulyaáyagalazibwa, na nikwo bili nkokwo mulikusoomboókelwáaho.5 Niho neenye obuchilo naálemwa kweégumisiliza, naámusiíndika Timoteo hali íimwe, mbone kusoombookelwa habwo okwiikiliza kwéenyu. Nkakola ntyo, ha kuba bitaákuba nka nikwo lúundi Omuleengesi yaábaleengesize no kubahabisa ne éezo emilimo yóona éezi twaákozile hali íimwe, eébe ya busa.
Empola Nzima Kuluga Ha Abateesalonike
6 Náho óobu Timoteo yeézile kuluga owaanyu, yaatumanyisize empola nzima habwo okwiikiliza na engoonzi zeenyu. Atusoombooliile nka nikwo nimutwiizuka bwooli buchiile, na nimuligila kubonana neechwe, nka nikwo neechwe twiina ne echihika kubonana neemwe.
7 Beene béetu, empola habwo okwiikiliza kwéenyu, kututiimbize emiganya kuluga omu byaágalazo byéetu byóona. 8 Óobu nitwiícha, ha kuba íimwe mwaáguma kwiimeelela bweémi ahali Omukáma Yeézu. 9 Óobu tukaáhicha kumuliha Múungu chiintu chi tubone kumusiima, habwi íimwe? Nóobu habwa amanulilwa maháango áago twiinago omuméeso ga Múungu habwi íimwe? 10 Nitumusaba Múungu ha bweeyomeleza omuchilo na nyemisana, nka nikwo atuzune twiíze tubonane neemwe, tubone kubahwéela éecho mwaálebesa habwo okwiikiliza kwéenyu.
11 Nitumusaba weényini Múungu, Isíichwe, no Omukáma wéetu Yeézu, atuloongeze omuhaanda gwéetu kwiiza hali íimwe. 12 Omukáma aboongele no kubakanyisiza engoonzi no kweendana íimwe no kweenda abaandi bóona, nke éechwe óokwo tulikubeenda íimwe. 13 Kaandi abagumise emiganya yéenyu, mubóne kuba abaantu abatakatíifu batéena ebilegelelo omuméeso ga Isíichwe Múungu, obuchilo obwo Omukáma wéetu Yeézu aleéza hamo na abatakatíifu boómwe bóona.a